Read Runyoro - rutooro Bir 17 Bible Online

Bir 17 - Runyoro - rutooro bible

Bir 17

¹“Otalitambira MUKAMA Ruhanga wawe ente rundi entaama enyakuyina akamogo, ekintu kyona ekinyakunyina akamogo, eki MUKAMA Ruhanga wawe takigonza.

²“Omumbuga zanyu MUKAMA Ruhanga wanyu ezi arukwija kubaha, omuli inywe kakuba hasangwamu omusaija rundi omukazi anyakukozire ekibi ekirukubiihiza MUKAMA Ruhanga wawe, akacwa endagaano ye,

³akagenda akaheereza embandwa akaziramya; akaramya izooba, okwezi, rundi ebintu ebindi ebinyakuli omumwanya gw'iguru ebi natangire,

⁴bakakugambira ekigambo eki okakimanya kurungi; okikaguliirize muno, kandi kakuba kiba ky'amazima kwo bitali bisuba, ekintu ekibi nkeeki okukikozirwe omu Isirairi,

⁵omusaija rundi omukazi ogu anyakukozire ihano eri, omuleete ha malembo gawe, omwise amabaale.

⁶Obu harabahoga abakaiso babiri rundi basatu omuntu ogu arukwija kwitwa nubwo aitwege; omuntu tasemeriire kwitwa habw'okurumirizibwa kaiso omu.

⁷Abakaiso nubo babanze kumuteera amabale, nukwo hakurateho abantu abandi boona. Obwolikora oti, nubwo olicwekereza obubi bwona obunyakukurumu.

⁸“Obuharaabahoga omusango ogw'obwisi, rundi ogw'okurwanirra obusobozi otarukusobora kwetegereza, obu, oimukege ogende omukiikaro MUKAMA Ruhanga wawe ekyalikoma.

⁹Obwolihikaho banyakatagara Abaleevi n'omucwi w'emisango ow'aliba aroho biro ebi, nubo oyekaguzeeho, bakwoleke encwa y'omusango ogu.

¹⁰Hanyuma, ohikirize kyona eki balikugambira omukiikaro eki, MUKAMA eki alikoma. Oteho omutima okukora byona ebi balikuragira,

¹¹kyona eki olikora, ogendere ha biragiro ebi bakuragiire, na ha ncwa ei bakugambiire; otalirengaho okaruga ha ncwa ei bakwolekere, okeecwera nkooku orukwenda.

¹²Omuntu kakuba alengaho kuteeza empaka nyakatagara arukukora omulimo omumaiso ga MUKAMA Ruhanga wawe, rundi akaiteeza omucwi w'emisango, omuntu ogu kimuhikiriire kwitwa; eki nikyo olikora, nukwo ocwekereze obubi omu Isirairi.

¹³Eki abantu boona obu balikihurra, balitiina, tibaligaruka kukora kintu nkeeki.

¹⁴“Obwolihika omunsi MUKAMA Ruhanga wawe eyarukwija kukuha, okagitunga okagiikaramu, okagamba oti: ‘Ka nyeteereho Omukama w'okundema nk'amahanga agandi goona aga mperiire nago nkooku gaakozire;’

¹⁵oyeteereho ogu, MUKAMA Ruhanga wawe owalikoma. Ogu ow'aliruga omu baanyoko, nuwe okome abe mukama ow'okulema; otalikisura okeekomera omunyaihanga atali wanyoko.

¹⁶Kyonka omukama ogu, atalyekanyisiza embaraasi, rundi kuleetereza abantu kugaruka Misiri habw'okukanyisa embaraasi, habwokuba MUKAMA akamara ira kukugambira ati: ‘Oku otaligarukayo.’

¹⁷Ataliswera abakazi baingi, habwokuba eki, kirimucwa hali MUKAMA, kandi atalyekanyisiza efeeza n'ezaabbu.

¹⁸“Kandi obu aliikarra ha kitebe ky'obukama, ekopi ey'ebiragiro bya Ruhanga binu, agihandiike omukitabu, naihirra hali eya banyakatagara Abaleevi.

¹⁹Aikalege na byo, abisomege obwomeezi bwe bwona, nukwo ayege kutiina MUKAMA Ruhanga we, n'okukwata ebigambo byona ebinyakuli omu biragiro binu, kandi abihikirize.

²⁰Eki nikyo kirimutanga kwenyumirizaaho bagenzi be, kimugumye ha biragiro binu; nukwo aleme emyaka nyingi kandi abaijukuru be, baleme Isirairi ebiro byona.