Read Runyoro - rutooro Bir 18 Bible Online

Bir 18 - Runyoro - rutooro bible

Bir 18

¹“Baanyakatagara Abaleevi, nubo boona ab'oruganda rwa Leevi, tibalitunga mugabo rundi obugwetwa hamu na Isirairi; balyeege ebihongwa ebyokeze ebinyakuhongerwa MUKAMA, n'ebindi ebibamurabuka ebinyakumusemeriire.

²Tibaatungege bugwetwa omu bagenzi baabo; MUKAMA nuwe araabaga bugwetwa bwabo nkooku yabaraganiize.

³Gunu nugwo guraabaga mugabo gw'abanyakatagara, oguraihwaga hali abo abarukuhonga ekyonzira, ekyonzira eki, noobu eraabaga nte rundi ntaama; nyakatagara bamuhege omukono, ensaya zombi n'orugiisire.

⁴Omuganuro gwawe ogw'engano, ogw'amarwa, n'amagita n'ebyoya ebinyakubanza kusarwa ha ntaama zawe, ebi byona obihege nyakatagara.

⁵Habwokuba, MUKAMA Ruhanga wawe akamukoma, yamwiha omu nganda zanyu zoona, ayemeerrege, kandi akole omulimo ogw'okuheereza omwibara lye, akamukoma hamu n'abaana be ebiro byona.

⁶“Kandi Omuleevi kakuba aruga omu rumu ha mbuga zanyu omu Isirairi yoona nambere aikara, naikirizibwa kwija nkooku arukwenda, omukiikaro MUKAMA ekyalikoma,

⁷naikirizibwa kuheereza nka bagenzi be boona Abaleevi abanyakuheereza omumaiso ga Ruhanga omukiikaro eki.

⁸Baheebwege emigabo ey'ebyokulya erukwinganaingana, otataireho buli omu ebyatunga ebyarugire omu kuguza itaka ery'obugwetwa bwe.

⁹“Obwolihika omunsi MUKAMA Ruhanga ei arukwija kukuha, otalyetaho kukora ebintu ebibi, amahanga ago ebigakora.

¹⁰Omuli inywe hatalizookamu, arukwokya mutabani we rundi muhara we kumuhonga; arukuragura, omufumu, arukubandwa emizimu,

¹¹omunyenya, omubandwa rundi arukukaguza abaafiire.

¹²Habwokuba weena anyakukora ebintu nkeebi, MUKAMA amunuga; kandi habw'ebintu ebibi ebi, abantu ebibaakoraga, MUKAMA Ruhanga wawe, nikyo arukubabingira omunsi, iwe otakahikireyo.

¹³Obege murungi mali atanyina kamogo hali MUKAMA Ruhanga wawe.

¹⁴“Habwokuba amahanga ganu agooli haihi kutunga, gahuliiriza abaraguzi n'abateezi b'engisa, baitu iwe, MUKAMA Ruhanga wawe, ebi akabikutanga.

¹⁵“MUKAMA Ruhanga wawe, naija kukwimukiza omurangi arukunsisana, amwihe omuli iwe, omu baanyoko, nuwe ohurrege. Ha kiro kiri obu mwayesoroize

¹⁶harusozi Holebbu, kinu iwe wonyini, nikyo wasabire MUKAMA Ruhanga oti: ‘Ntagaruka kuhurra iraka lyawe MUKAMA Ruhanga wange, rundi kugaruka kurora omurro gunu ogurukwaka guti, ntarugaho nkafa.’

¹⁷MUKAMA akagamba ati: ‘Eki basabire ky'amagezi.

¹⁸Omu baanyinabo, ninyija kubaihiramu omurangi nkaiwe; ndimugambira ebigambo ebyalibaza, nukwo agambire abantu byona ebindiragira.

¹⁹Weena atalita mutima ha bigambo byange ebyalibaza omwibara lyange, nyowe nyenka, omuntu ogu ndimujunaana.

²⁰Baitu omurangi alikisura akabaza omu ibara lyange ekigambo ekintamuragiire, rundi ow'alibaza omwibara erya baaruhanga abandi, ogu kimuhikiriire kufa.’

²¹Kandi kakuba oyekaguza oti: ‘Ruhanga ekyagambire, tulikimanya tuta?’ Hanu nuho mulikimanyira.

²²Omurangi kakuba abaza omu ibara lya MUKAMA, eki agambire kikalema kubaho rundi kuba ky'amazima, ekigambo eki, buli tikigambirwe MUKAMA; buli abalize habw'obusobozi bwe, oleke kumutiina.