Read Runyoro - rutooro Bir 19 Bible Online

Bir 19 - Runyoro - rutooro bible

Bir 19

¹“MUKAMA Ruhanga wawe, obwalihwerekereza abantu ab'amahanga agaarukwija kukuha, okatunga amahanga ago oraikara omumbuga zaago n'omumaju gaazo,

²omunsi egi MUKAMA eyarukwija kukuha kutunga, oyesoroorremu embuga isatu.

³Olime enguudo, omunsi MUKAMA Ruhanga wawe eyakuhaire kwetungira, ogicwemu ebicweka bisatu, omuntu anyakwisire ondi nuho asingirwege.

⁴“Eki nikyo ekiikaro ekinyakutairweho habw'omwisi w'abantu, nukwo asobole kutabura obwomeezi bwe. Omuntu kakuba aita mutaahi we atagenderiire, owatagira na uwe bubi,

⁵eki kiri nk'omuntu oku agenda omukibira kusenya enku n'omutaahi, obwaimukya endemu kutema omuti, endemu ekasomoka omu muhini ekatema omutaahi ekamwita, airukire omu rumu ha mbuga ezi, akize obwomeezi bwe.

⁶Habw'omuhanda kuba hara, kihoora nzigu akyaina ekiniga kingi, taikara kumukurata akamukwata akamwita, kandi kunu tasemeriire kwitwa, habwokuba omu biro ebyahingwire, akaba atanyina bunyanzigwa n'omutaahi ou yaisire.

⁷Habweki, ninkuragira kusoroora embuga isatu.

⁸MUKAMA Ruhanga wawe obwaligalihya omutaano gwawe nkooku yarahiriire baswenkuru, akakuheera kimu ensi yoona ei yabanihiize,

⁹obwoliba otaireho omutima okukwata ebiragiro bye, ebindukukuragira kiro kya hati, okamugonza kandi okakora ebyasiima, obu hambuga ezi isatu nubwo oyongereho isatu zindi,

¹⁰abantu abatanyina musango nukwo, baleke kwitirwa omunsi yawe, MUKAMA Ruhanga wawe eyarukwija kukuha ebe bugwetwa bwawe, kandi iwe okajunaanwa omusango ogu.

¹¹“Baitu omuntu kakuba agira enobi hali omutaahi, akamweserekerra akamwita, akairukira omu rumu ha mbuga ezi,

¹²bakuru b'orubuga orw'owaabu batumeyo abantu bamwiheyo, bamunagire kihooranzigu, na uwe aitwe.

¹³Omuntu nkoogu, otalimuganyira, baitu, ofuuhize kimu omu Isirairi ekibi eky'okwitira busa abantu, nukwo obe kurungi.

¹⁴“Omu bugwetwa obwolitunga omunsi MUKAMA Ruhanga wawe eyarukwija kukuha kutunga, otaliihurra akarorwaho ak'omutaano ogw'omutaahi wawe, abantu abaira akabaataireho.

¹⁵“Obwakaiso obw'omuntu omu, tiburukwikirizibwa kusingisa omuntu omusango, habw'ekibi rundi habw'ensobi ei aba akozire; obuharaabahoga bakaiso babiri rundi basatu abarukumurumiriza, omuntu ogu nubwo acwerwege omusango.

¹⁶Kaiso omunyaitima kakuba arumiriza omuntu, naamutaho ekibi ekyatakozire,

¹⁷abantu bombi abanyakuli omu mpaka, bagendege omukiikaro eky'okuramizaamu, banyakatagara n'abacwi b'emisango, nubo babacweremu.

¹⁸Abacwi b'emisango beetegereze muno omusango ogu, kaiso ogu kakuba aba kaiso w'ebisuba, ahangiriire mugenzi we,

¹⁹aheebwe ekifubiro ekyaakuhairwe kinyegererwa; nukwo olifuuhya oti obubi obunyakuli omuli iwe.

²⁰Abandi obubalihurra ekintu nkeeki, balitiina, tihalibaho noomu omuli inywe aligaruka kukora ekintu nkeeki.

²¹Omuntu nkoogu otalimuganyira; obwomeezi bulehwe obwomeezi, eriiso lirehwe eriiso, eriino lirehwe eriino, omukono gulehwe omukono, n'ekigere kirehwe ekigere.