Read Runyoro - rutooro Bir 2 Bible Online

Bir 2 - Runyoro - rutooro bible

Bir 2

¹Hanyuma, twakubuutuka twataaha omwirungu ha bukiizi obw'Enyanja Ey'ebitoogo, MUKAMA nkooku yangambiire. Tukamara ebiro bingi nitujeerajeera harusozi Seyira.

²MUKAMA nubwo yangambiire ati:

³“Mumazire omwanya mukooto nimujeerajeera omunsi enu ey'ensozi; mukubuutuke mutome ha bukiizi obw'emoso.

⁴Gambira abantu oti: Muli haihi kuraba omunsi ya beene banyu batabani ba Esau, abanyakwikara omunsi Seyira; nibaija kubatiina;

⁵habweki mutalirinda mukabacwera obulemu; habwokuba tindukwija kucwaho ensi yabo nkagiha inywe, tinasobora kubahaho noobwakubaire akacweka akake muno akarukuhikya ekigere kimu, habwokuba orusozi Seyira nkaruha Esau rube rwe habwe.

⁶Mubaguleho ebyokulya na sente zanyu mulye; mubaguleho n'amaizi munywe.

⁷Habwokuba, MUKAMA Ruhanga wanyu kyona eki mwakozire akakiha omugisa, akamanya nkooku murukwija kuraba omu irungu linu erikooto liti, emyaka amakumi ana egi yoona, atabarugeho; kandi busaho kantu akaababuzire.”

⁸Nubwo twayeyongiire kugenda omumaiso, nitwehugura beene baitu batabani ba Esau abanyakwikara omunsi Seyira; nitwetantara oruguudo rw'Araba orunyakuruga Erasi na Eziyoni-gebere. Twakubuutuka twakwata ha bukiizi obw'irungu erya Mowabbu.

⁹Yangambira ati: “Otendereza Abamowabbu, kandi otabacwera obulemu, habwokuba tindukwija kucwaho ensi yabo, nkagiha inywe kugitunga, Ara nkagiha batabani ba Looti bube butaka bwabo.”

¹⁰(Ira Abeemimu, ihanga ery'abantu abakooto kandi nubo baikaraga omunsi egi, abaingi, abaraihire nk'Abanaaki.

¹¹Abalefaimu nabo baayetwaga Abaanaki, baitu Abamowabbu baabeetaga Abeemimu.

¹²Abahooli nabo, ira baikaraga omunsi egi bakagibabingamu baabahwerekereza, bagaruka omu biikaro byabo, nk'Abaisirairi oku baakozire ensi ey'obutaka bwabo, MUKAMA ei akaba abahaire.)

¹³Hati mwimuke mwambuke akasaaru Zeredi.

¹⁴Okuruga Kadesi-Baraneya okuhika obu twayambukire akasaaru Zeredi, oruzaaro rwona, orw'abantu abarwani ab'ebiro ebi, rumazire kuhwerekerra, ruhoire omunsiisira, MUKAMA nkooku yagambire, emyaka ekahika asatu na munaana.

¹⁵Mananukwo, MUKAMA nuwe akaba naabarwanisa abahwerekereze, abamale omu rukande okuhika obu baahwerekereriire kimu.

¹⁶Abantu boona ab'amaani obu baafiire baahwerekerra,

¹⁷MUKAMA nubwo yangambiire ati:

¹⁸Kiro kya hati, noija kuraba ha mutaano gwa Mowabbu omunsi Ara;

¹⁹obu oraahika ha mutaano ogwa batabani b'Abamooni, otabendereza kandi otabacwera obulemu, tindukwija kucwaho ensi ya batabani b'Abamooni ey'obutaka bwabo, nkagiha iwe habwokuba ensi egi nkagiha batabani ba Looti bube butaka bwabo.

²⁰(Kandi ensi egi, eba nsi y'Abalefaimu, ira nubo baagiikaramuga, baitu Abamooni, baabeetaga Abazamuzumi,

²¹ihanga ery'abantu ab'amaani kandi abaingi, abaraihire nk'Abanaaki; baitu MUKAMA akabahwerekereza, Abamooni nubo baagaruka omunsi yabo, baagiikaramu;

²²nkooku yakozire batabani ba Esau abaikaraga Seyira, obu yahwerekeriize Abamooli omumaiso gaabo, baababinga baikara omu biikaro byabo okuhika na hati, n'abo nukwo yabakozire.

²³Kandi Abaavimu abaikaraga omu byaro okuhikira kimu mu Gaaza, Abakafutolimu abaarugire Kafutooli bakabahwerekereza, baagaruka omu biikaro byabo.)

²⁴Obu twamazire kuraba Mowabbu, MUKAMA yatugambira ati: “Hati mwimuke mugende murabe omu kihanga eky'Arunooni, Sihooni Omumooli omukama wa Hesibboni n'ensi ye, mmukutaire omungaro; ensi ngigyo ebe yanyu, mumuseesire mumurwanise.

²⁵Okuruga kiro kinu n'okweyongerayo, amahanga goona aganyakuli hansi y'iguru, ninyija kugakutiinisa, weema ow'araakuhurrahoga araacwekwaga enkizi, aitwe obutini.”

²⁶Nubwo nayemere omwirungu erya Kedemosi, natuma abakwenda hali Sihooni omukama wa Hesibboni nimbaza amarungi nti:

²⁷“Onyikirize ndabe omunsi yawe; ninyija kuraba omu ruguudo rwonka, tinkubuke ha bukiizi obw'obulyo rundi obw'emoso.

²⁸Onguze ebyokulya, mbiheere sente ndye, n'amaizi ngaheere sente nywe; baitu onyikirize ndabe omunsi yawe nindubata,

²⁹nka batabani ba Esau abanyakwikara Seyira n'Abamowabbu abanyakwikara Ara nkooku banyikiriize kuraba omunsi yaawe, na iwe nukwo onyikirize okuraba omunsi yawe okuhika obu ndakambuka Yorudaani nkahika omunsi MUKAMA Ruhanga waitu ei arukwija kutuha.”

³⁰Baitu Sihooni omukama wa Hesibboni tarukwija kutwikiriza kuraba omunsi ye; habwokuba MUKAMA Ruhanga wawe akamugumanganiza omwoyo, yamukadadaza omutima, nukwo asobole kumukuta omungaro nkooku orukurora hati.

³¹MUKAMA yangambira ati: “Hati, Sihooni natandika kumukuta omungaro hamu n'ensi ye; ngigyo gitunge, ogiikalemu.”

³²Sihooni hamu n'abantu be boona, nubwo yatuseesiire kuturwanisa omukiikaro Yahaazi.

³³MUKAMA Ruhanga waitu akamututa omungaro, twamusingura n'abaana be, n'abantu be boona.

³⁴Omu kasumi ako, twakwata embuga ze zoona twazihwerekerereza kimu, oteho abasaija, abakazi, n'abaana, tutasigeho muntu noomu;

³⁵okwihaho ente zonka, nizo twayenyagiire n'ebintu ebindi ebi twaihire omumbuga.

³⁶Okuruga Aroheri enyakuli harubaju rw'ekihanga eky'Arumooni, n'okuruga ha rubuga orunyakuli omukihanga, okuhikira kimu Giryadi, hatabeho rubuga na rumu orwatulemere, MUKAMA Ruhanga waitu, embuga zoona akaituta omungaro.

³⁷Ensi eya batabani b'Amooni yonka, niyo tutarahikire haihi, na hamyegeego ey'ekisaaru Yabboki, n'embuga ez'ensi ey'ensozi, na handi hoona MUKAMA Ruhanga waitu ha yatutangire.