Read Runyoro - rutooro Bir 20 Bible Online

Bir 20 - Runyoro - rutooro bible

Bir 20

¹“Obumuraabaga nimuraamaga kurwanisa abanyanzigwa banyu, mukarora embaraasi, ebigaali niihe likooto okukira eryanyu, mulekege kubatiina; habwokuba MUKAMA Ruhanga wanyu ayabaleesire yabaiha omunsi Misiri, ali hamu na inywe.

²Kandi obumuraabaga muli haihi kutandika kurwana, nyakatagara aije omumaiso abalize abantu.

³Abagambire ati: ‘Iwe Isirairi hurra, kiro kya hati mwatandika kurwanisa abanyanzigwa banyu, mutahwa amaani, mutatiina, mutatukumira, kandi muteekanga!

⁴Habwokuba MUKAMA Ruhanga wanyu nuwe agenda na inywe, kubarwanisiza abanyanzigwa banyu, n'okubaha obusinguzi.’

⁵Abalemi nubwo balikaguza abantu bati: ‘Haroho omuntu anyakwombekere enju empyaka atakagihongiire MUKAMA? Obwaraaba aroho, agarukeyo omunju ye, taikara kugwa omu bulemu ekataahwa omuntu ondi.

⁶Kandi haroho omuntu anyakulimire omusiri gwe ogw'emizabbibbu atakaliire ebijuma byagwo? Agarukeyo omunju ye, taikara kugwa omu bulemu, omuntu ondi nuwe akalya ebijuma byagwo.

⁷Haroho omuntu anyakujumbiire omukazi atakamugabwire? Obwaraaba aroho agarukeyo, omunju ye, taikara kugwa omu bulemu, omukazi akagaburwa omusaija ondi.’

⁸Abalemi bongere bakaguze abantu bati: ‘Haroho omuntu omutini kandi ow'enkizi? Obwaraaba aroho, agarukeyo omunju ye, abantu abandi tibaikara kuba b'enkizi, nka uwe.’

⁹Abalemi obubaraamaraga kubaliza abantu, engabwa z'amahe nubwo zikomwege, zeebembere abantu.

¹⁰Obu murairraga haihi n'orubuga kuruseesira, abantu barwo mubanzeege mubahe akasumi ak'okwecweramu rundi kurwana.

¹¹Obubaraakinguraga amalembo bakagarukamu ngu nitwenda obusinge, boona bafookege bairu banyu, babakorrege emirimo ey'amaani.

¹²Baitu kakuba batagonza obusinge, bakakomaho kubarwanisa, orubuga oru; nubwo murugotege.

¹³Kandi MUKAMA Ruhanga wanyu obwararubakwasaga omungaro, abasaija barwo boona mubaitege.

¹⁴Baitu abakazi n'abaana, ebisoro ebitungwa n'ebintu byamwo ebindi byona, mubyetwarre, mwegondeze ha minyago ey'abanyanzigwa banyu, MUKAMA Ruhanga wanyu ebyabahaire.

¹⁵Embuga zoona ezinyakubali hara muno, ezitali mbuga z'amahanga aganyakuli hanu, nukwo muzikolege muti.

¹⁶Baitu omumbuga ez'amahanga ganu MUKAMA Ruhanga wanyu agaarukwija kubaha bube bugwetwa bwanyu, mutalisigaho kintu na kimu ekyomeezi.

¹⁷Muhwerekereze kimu: Abahiiti, Abamooli, Abakanaani, Abaperezi, Abahiivi n'Abayebusi, MUKAMA Ruhanga wanyu nkooku yaragiire;

¹⁸nukwo baleke kubeegesa kukora ebintu ebirukunugwa ebibakora nibaramya embandwa, mukasiisira MUKAMA Ruhanga wanyu.

¹⁹“Obumuraamaraga akasumi kakooto, mugosire orubuga nimururwanisa nukwo murunyage, mutalitema emiti yarwo ey'ebijuma ebirukuliibwa, mulye ebijuma, baitu emiti muleke kugitema. Emiti ey'omukisaka, bantu, ngu nayo neebalirwa omubintu ebi murukugota?

²⁰Kyonka emiti ei murukumanya ngu teriibwa nimusobora kugitema mukombekesa eby'okubayamba kugota orubuga orurukubarwanisa, kuhika runyagirwe.