Read Runyoro - rutooro Bir 21 Bible Online

Bir 21 - Runyoro - rutooro bible

Bir 21

¹“Omunsi MUKAMA Ruhanga wanyu eyarukugenda kubaha, omuntu kakuba asangwa aisirwe agwire omukisaka, kimwita atamanyirwe,

²obu, bakuru b'enganda zanyu n'abacwi b'emisango, baije balenge omwanya kuruga ha muntu anyakwisirwe kuhika ha mbuga ezimwehinguliriize.

³Bakuru b'orubuga orurukukira kuba haihi n'omutumbi gw'omuntu anyakwisirwe, basoroole enyana etakakozesebwahoga mulimo omurundi na gumu,

⁴bagitwale omukahanga akanyakurumu amaizi agarukugera, nambere hali ekisaka ekitakalimwaga, rundi ekitakabyarwamuga kantu, oku nuho baginyoorre ebikya.

⁵Baanyakatagara abaana ba Leevi nabo babeho habwokuba MUKAMA Ruhanga wanyu akabakoma kumuheereza kandi kusabiraga abantu omugisa, omwibara lye, ekibaraacwamuga, nikyo kiraamaraga empaka n'obwisi.

⁶Bakuru b'enganda boona ab'orubuga orurukukira kuba haihi n'omutumbi ha gusangirwe, banaabire engaro zaabo ha mutumbi gw'enyana enyakunyoirwe ebikya,

⁷nibagamba bati: ‘Omuntu onu tutamwite kandi tutarole ayamwisire.

⁸Ai MUKAMA, ganyira abantu bawe Abaisirairi aba wacungwire, otuganyire itwe abantu bawe, otatujunaana omusango gw'omuntu onu ayaisirwe atanyina musango.’

⁹Nukwo muliihaho abantu omusango ogw'okwita omuntu atanyina musango, habw'okukora ekinyakuhikire omumaiso ga MUKAMA.

¹⁰“Obumuraaramagaga ha bulemu kurwanisa abanyanzigwa banyu, MUKAMA Ruhanga wanyu akabaha kubasingura, mukabatwara bali banyagwa,

¹¹omu banyagwa abo, kakuba ororamu omukazi anyakusemiire okamuligira okagonza kumuswera,

¹²n'osobora kumutaahya omuka yawe, ayemwe isoke, ayecwe enono.

¹³Ajuule engoye ze eziyanyagiirwemu, aikale omuka yawe, kandi alirirre ise na nyina kumara okwezi kumu okwijwire, hanyuma y'ebi, otembe ekitabu kye, obe iba, na uwe abe mukazi wawe.

¹⁴Hanyuma, obwolirora otakyamugonza, omuleke agende h'arukusiima. Nkooku ali niiwe ayamuhambiriize kuteerana na iwe, otalimufora nk'omuzaana, kandi otalimutunda.

¹⁵“Omusaija kakuba aba anyina abakazi babiri, omu kiganzi, ondi kinobi, kiganzi na kinobi bombi bamuzaaliire abaana, kandi omwojo w'okubanza owa kinobe,

¹⁶ha kiro eky'okugweta abaana be, aleke kurora mutabani wa kiganzi, akafoora mutabani we w'okubanza akamukiza owa kinobe, ayabandize kuzaarwa.

¹⁷Baitu aikirize omwana ayabandize kuzaarwa, owa kinobe, atwale kimu kya kabiri eky'ebintu byona ebyanyinabyo, habwokuba nuwe mwana we ou yabandize kuzaara omu busigazi, omugabo ogunyakusemeriire, gube gwe.

¹⁸“Omuntu kakuba aba aine omwana ensikoomi kandi entahurra, atarukubafaaho,

¹⁹obu, ise na nyina nubwo bamukwate ha mukono, bamuleetere bakuru b'orubuga oru araaramu,

²⁰babagambire bati: ‘Omwana waitu onu, ntahurra kandi ensikoomi, tasobora kuhurra ebitumugamba, asiisa muno ebintu kandi mutamiizi.’

²¹Abasaija boona ab'orubuga nubwo bamuteere amabaale afe; nukwo mwihe ekibi muti, hagati yanyu, Abaisirairi boona bahurre kandi batiine.

²²“Omuntu kakuba aba acwire omusango ogw'okumwisa, akaitwa kandi mukamuhanika ha muti,

²³omutumbi gwe gutalikiisa obwire gukyali ha muti, baitu mumuziikireho, habwokuba omuntu anyakuhanikirwe aba akyenerwe Ruhanga, muleke kusiisa ensi yanyu, MUKAMA Ruhanga wanyu ei arukubaha kutunga, bube bugwetwa bwanyu.