Read Runyoro - rutooro Bir 22 Bible Online

Bir 22 - Runyoro - rutooro bible

Bir 22

¹“Otalirora ente rundi entaama ya mugenzi wawe neehaba, okalema kugira ekyokozireho, osemeriire ogitwarre mugenzi wawe.

²Kakuba aba atali haihi, rundi kakuba oba otamumanyire, ogireete omuka yawe, ogitaahye omunju yaawe. Ekisoro eki oikale nakyo, okuhika mugenzi wawe obwalikiserra, okimugarurre,

³nukwo okole oti, obwaraabaga abulirirwe enkaina ye, ekyokujwara kye rundi ekintu kye ekindi kyona, ekinyakubuzire, iwe okakizoora, nukwo okolege oti, otalyanga kumukonyera.

⁴Otalirora enkaina rundi ente y'Omwisirairi mugenzi wawe ebutamire ha muhanda okanga kugikonyera, mukonyere kugiimukya.

⁵Omukazi atalijwara ekintu kyona ekirukwetwa eky'omusaija, omusaija na uwe atalijwara ekijwaro eky'omukazi; weena arukukora ebintu ebi MUKAMA Ruhanga wawe tamugonza.

⁶Kakuba ogwaho ekiju ky'ekinyonyi omumuti rundi haitaka, harumu ebyana rundi amahuli, nyinabyo ebumbaatiire ebyaana, rundi eraaliire amahuli, nyinabyo n'ebyana otalibitwarra hamu.

⁷Oleke nyinabyo egende, osobora kutwara ebyana, nukwo otunge omugisa kandi ohangaale.

⁸“Obworaayombekaga enju empyaka, orusu oruzitiirrehoga ekisiika, omuntu obwalirugaho akagwa, enju yawe oleke kugireetaho omusango ogw'esagama.

⁹“Omusiri gwawe ogw'emizabbibbu, otaligubyaramu embibo endi, ebinyakwaniremu byombi bitalikara kutangwa kuleetwa omukiikaro ekirukwera.

¹⁰Ente n'enkaina otalibirimisiza hamu.

¹¹Otalijwara ekitabiraine ekirukirwe omubyoya by'entaama na kitaani.

¹²“Oyekorrege ebitutu ha byebu bbina eby'ekijwaro kyawe ekyoyenagira.

¹³“Omusaija kakuba agabura omukazi akatemba ekitabu kye,

¹⁴kandi akamuhangirra engeso erukumuhemura, hanyuma akamunoba akamutaho ibara libi naagamba ati: ‘Nkaleeta omukazi onu, mahano, obunamuhikire ntamusange.’

¹⁵Obu, ise na nyina omukazi ogu empikiirre, bakwate ekyokubyamira ekirukwoleka obuhikiriire bwe, babitwale omurukurato rw'abakuru b'orubuga.

¹⁶Ise omukazi ayasangirwe, agambire abakuru b'enganda ati: ‘Muhara wange nkamugabira omusaija onu amuswere, hati tarukumwenda,

¹⁷kandi mahano, amuhemwire naagamba ati: Muhara wanyu ntamusange mpikiirre. Kandi kunu, haroho obwakaiso mbunu, oburukugumya muhara wange nkooku akaba ali mpikirre.’ Banjurre ekyokubyamira omumaiso g'abakuru b'orubuga.

¹⁸Hanyuma, bakuru b'orubuga bakwate omusaija;

¹⁹bamuteere, bamulehese ebicweeka by'efeeza kikumi, bagihe ise omukazi ayasangirwe ali mpikiirre, habwokuba omwisiki empikirre ow'omu Isirairi, amutaireho ibara libi, kandi aikale ali mukazi we, atalimwanga obwomeezi bwe bwona.

²⁰Baitu ekintu kakuba kiba ky'amazima, hataroho bwakaiso oburukwoleka, ngu omukazi ogu nkooku akaba ali mpikirre kwo,

²¹obu, baleete omukazi ogu ha mulyango gwa ise, abasaija ab'omurubuga bamuteere amabaale afe, habwokuba, anugisize Isirairi, naakorra obwamalaya omunju ya ise; nukwo mwihe muti ekibi omuli inywe.

²²“Omusaija kakuba akwatwa abyamire na mukazi muk'omusaija, bombi omusaija n'omukazi baitwe, nukwo mwihe muti ekibi omu Isirairi.

²³“Kakuba habaho omwisiki empikirre anyakujumbiirwe, omusaija akamwitirana omurubuga akabyama na uwe,

²⁴abo bombi mubaturukye orubuga mubaleete ha irembo, mubateere amabaale bafe. Habwokuba omwisiki, noobwakubaire akaba, ali omurubuga, atateere nduuru ati: ‘Munjune’, kandi omusaija, habwokuba akabyama n'omwisiki anyakujumbiirwe, nukwo mwihe muti ekibi omu Isirairi.

²⁵“Baitu eki kakuba kibaho omukyaro, omusaija akaitirana omwisiki anyakujumbiirwe, akamugwera, akabyama na uwe, obu, omusaija wenka kibyama na mukazi, nuwe aitwe.

²⁶Baitu omukazi mutalimukoraho kantu na kati, omukazi tanyina nsobi ey'okumwisa, habwokuba ekintu kinu, nikisisana n'eky'omusaija anyakuseesa akaita omutaahi.

²⁷Habwokuba akamugwaho ali omukyaro, omwisiki kijumbirwa noobu yataagire ati munjune, hatabeho muntu noomu ow'okumwirukiirra, hatabeho noomu ow'okumujunira.

²⁸“Omusaija kakuba aitirana omwisiki empikirre atajumbiirwe, akamuhamba akabyama na uwe, hanyuma abantu bakabakwata

²⁹obu, omusaija ayamuhambire, ahe ise omwisiki efeeza erukuhikya ebicweeka makumi ataano, omwisiki abe mukazi w'omusaija ogu, habwokuba nuwe yamuhambire, atalimwanga ebiro bye byona.

³⁰“Omusaija ataliswera muka ise kandi atalimujuura.