Read Runyoro - rutooro Bir 23 Bible Online

Bir 23 - Runyoro - rutooro bible

Bir 23

¹“Hatalibaho musaija n'omu omukonwa rundi ayacwirweho obusaija aikirizibwa kubalirwa omubantu ba MUKAMA.

²Hatalibaho omwana ekitwekano alikirizibwa kubalirwa omu kitebe kya MUKAMA; okuhikira kimu ha bwijukuru obwa ikumi, hatalibaho noomu baijukuru be alibalirwa omu kitebe kya MUKAMA.

³“Hatalibaho Omwamoni rundi Omumowabbu alibalirwa omu kitebe kya MUKAMA; okuhikira kimu ha bwijukuru obwa ikumi, ebiro byona, hatalibaho omuntu noomu omuli bo, aikirizibwa kutaaha ekitebe kya MUKAMA.

⁴Habwokuba, obumukaba nimuruga Misiri, batabatangirize omugaati n'amaizi, kandi, bakagulirra Balaamu mutabani wa Beyora owa Pesora orubuga rwa Mesopotamiya abakyeene.

⁵Baitu MUKAMA Ruhanga wawe, atahurre Balaamu; kandi omukyeeno akagukwihiramu omugisa, habwokuba akakugonza.

⁶Obwomeezi bwawe bwona, otalirengaho kuserurra abantu abo, obusinge rundi omugisa.

⁷“Okolege kurungi Omunyedomu, habwokuba ogu mugenzi wawe; otalinoba Omunyamisiri, habwokuba okasuuhuukira omunsi ye.

⁸Abaana ab'obwijukuru obwa kasatu aba balizaara, abo nubo balikirizibwa kubalirwa omu kitebe kya MUKAMA.

⁹“Obworaabaga n'oramagira abanyanzigwa bawe, oli omurukande, oyerinde okutahikwaho ekintu ekibi kyona.

¹⁰“Omuli inywe kakuba habamu omuntu arukuzira habw'ekintu ekinyakumuhikireho ekiro, omuntu ogu aruge omurukande aikale aheeru.

¹¹Kakuba obwire bwira ayoge; izooba limazire kugwa, naikirizibwa kugenda omurukande.

¹²“Kikusemeriire kugira ekinazi aheeru y'orukande, nikyo ogendemuga;

¹³ha bintu byawe ebyokurwanisa, otwarrehoga esuuruuru, obworaagiraga nambere ositamire omu bwerre, olime akaina, oziike, oswekerre.

¹⁴Habwokuba MUKAMA Ruhanga wawe, araba hagati y'orukande rwawe, kukujuna n'okukusinguza abanyanzigwa baawe, habweki orusiisira rwawe, rusemeriire kwikara nirwera, nukwo aleke kurora omuli inywe ekintu ekitali kirungi akakurugaho.

¹⁵“Omwiru anyakwirukireho mukama we yakwebinga, otalimumugarurra;

¹⁶aikale na iwe omukiikaro ekyarukwenda, omurubuga orumu, ha mbuga zawe orwarukukira kugonza; otalimubonesa enaku.

¹⁷“Omu bahara ba Isirairi, hatalibamu endaza, kandi noomu batabani be, hatalibamu omukuuhya.

¹⁸Otalireeta omu Nju ya MUKAMA Ruhanga wawe, sente ezirugire omubwamalaaya, rundi empeera y'embwa nogenderra kuhikiriza eki araganiize MUKAMA, habwokuba ebi byona, MUKAMA Ruhanga wawe tabyenda.

¹⁹“Otalihora mugenzi wawe nogendeerra kutungamu amagoba, ha sente, ha byokulya, n'ebyokujwara, ha buli kintu kyona ekinyakwohorwa, habw'okutungamu amagoba.

²⁰Omunyaihanga, ogu, omuholege akuhe amagoba, baitu Omwisirairi mugenzi wawe otalimuhora akuhe amagoba, obu nubwo MUKAMA Ruhanga wawe alikuha omugisa omu byona ebyolikora omunsi eyoli haihi kuhikamu ogirye.

²¹“Obworaaragaanaga na MUKAMA Ruhanga wawe, otehoga omutima okuhikiriza ekyoragaine; habwokuba alikikukaguza, kandi okutakihikiriza, kirikurugiramu ekibi.

²²Obutakora endagaano na Ruhanga tikiri kibi kyonka.

²³Oyekambege okuhikiriza ekiwagambire, habwokuba habw'okwegondeza, okaraganiza MUKAMA Ruhanga wawe ekiwayatwire n'akanwa kawe.

²⁴“Obworaagendaga omumusiri gw'omutaahi ogw'emizabbibbu, olyege ebijuma oigute nkooku orukwenda, baitu otaligira ebyotwara omu kibindi rundi omu nsaho.

²⁵Obworaagendaga omu musiri gw'omuntu ogw'engano, olyege engano yoona eyosobora kunoga, baitu otalikisura okagitema n'enaijoro.