Read Runyoro - rutooro Bir 24 Bible Online

Bir 24 - Runyoro - rutooro bible

Bir 24

¹“Omusaija kakuba aswera omukazi, hamazire kuhingura akasumi akagamba ngu: omukazi ogu tarukumugonza, habwokuba anyina ekyamuboineho ekyatarukwenda, akamuhandiikira ebbaruha erukumuha obusobozi obw'okwahukana na uwe akagimuha,

²omukazi ogu kakuba aswerwa omusaija ondi,

³omusaija ogu na uwe akagamba ngu: omukazi ogu tarukumugonza, akamuhandiikira ebbaruha erukumuha obusobozi obw'okwahukana na uwe akagimuha akamubinga omunju ye, omusaija ogu ayamuswire hanyuma kakuba afa,

⁴iba oli kimuswera okubanza ayamubingire, tarukwikirizibwa kumuswera obwa kabiri, amazire kusiisikara; habwokuba, eki Ruhanga takigonza, kandi ensi MUKAMA ei arukwija kukuha otaligireetaho omusango.

⁵“Omusaija obwaraabaga yakaruga kugabura, ataligenda kutabaara rundi kuheebwa omulimo ogundi; amale omwaka gwona omuka naakyayegonza n'omugole ou agabwire.

⁶“Hatalibaho omuntu akwata, rundi aikiriza orubengo rundi ensiiso okuba musimbo; habwokuba obu, obwomeezi nubwo aba naafoora musimbo.

⁷“Omuntu kakuba bamusanga naanyaga omu ha bagenzibe Abaisirairi, akamufoora nk'omwiru, rundi akamuguza omuntu ondi, omunyagi ogu kimusemeriire afe, obu olikora oti, nubwo olyeihamu obubi bwona obwonyinabwo.

⁸“Kinu okiteho omutima, kakuba okwatwa ebigenge, oyekambe okuhikiriza byona banyakatagara Abaleevi ebibaraakwoleka; byona ebinabaragiire kukora nibyo okole.

⁹Obu mukaba nimuruga omunsi Misiri, mwijukege MUKAMA Ruhanga wanyu ekiyakozire Miryamu.

¹⁰“Kakuba ogira ekintu kyona ekyohozire omutaahi, olekege kumutaahirra omunju kwihayo omusimbo.

¹¹Oyemerrege aheeru, agukusangiseeyo.

¹²Kandi kakuba aba ali muntu munaku, omusimbo gwe otaliguraazaayo;

¹³ogumugarurrege izooba niriigwa, nukwo abone ekyokubyamira, nukwo akusabire omugisa, eki kiriba kirungi omumaiso ga MUKAMA Ruhanga wawe.

¹⁴“Otalikerereza okusasura omusaara gw'omuntu omunaku, kandi omuseege anyakukukoliire, ou wayetiire omulimo, noobu aliba omu ha bagenzi bawe, rundi omu ha banyamahanga abanyakuli omunsi yawe, omumbuga zaawe.

¹⁵Omusasulege empeera ye ha kiro ekyagikoleriireho, izooba litakagwire, habwokuba munaku, kandi omutima gwe gwona guli ha sente ezi; ataliikara kukusabira kubi hali MUKAMA, eki kikakurugirramu ekibi.

¹⁶“Baise baana bataliitwa habw'emisango enyakucwirwe abaana baabo, n'abaana bataliitwa habw'emisango enyakucwirwe baisebo, buli muntu aitwege habw'omusango ogu acwiire wenka.

¹⁷“Otalinyigiriza omunyaihanga rundi enfuuzi, rundi kwihaho enfaakati ekyokujwara kye gube musimbo;

¹⁸baitu oijukege nkooku okaba oli mwiru omunsi Misiri, kandi MUKAMA Ruhanga wawe nkooku yakucungwire yakwihayo; nikyo ndukukuteerererra kukoraga ekintu kinu.

¹⁹“Obworaabaga noogesa omumusiri gwawe, okeebwayo omuganda gw'engano, olekege kugarukayo kugutabarra; ogulekege gukonyere abanyamahanga, enfuuzi n'enfaakati; MUKAMA Ruhanga wawe nukwo akuhe omugisa omu mirimo yawe yoona.

²⁰Obworabaga noonoga ebijuma byawe ebya oliva, omuti otaligunogororra kimu.

²¹Obworaabaga noonoga ebijuma eby'emizabbibbu yawe, olekege okubimarraho kimu, olekehoga eby'okukonyera: abanyamahanga, enfuuzi, n'abafakati;

²²na iwe oijukege nkooku okaba oli mwiru omunsi Misiri, nikyo ndukukuteerererra kukoraga ekintu kinu.