Read Runyoro - rutooro Bir 25 Bible Online

Bir 25 - Runyoro - rutooro bible

Bir 25

¹“Abantu obu baraagiraga empaka bakaija omu kooti, abacwi b'emisango bakabacweramu, omu akasiinga, ondi gukamusinga,

²kisingwamusango obwaraaba asemeriire kuteerwa, omucwi w'emisango nuwe amuragire kubyama hansi, bamuteere na uwe aroho, bamuteere enkoba ezirukwingana omusango gwe ogucwirwe.

³Asemeriire kuteerwa kibbooko makumi ana, hatali kukiraho; kumuteera ezikizire aho, nukwo kumuswaza omumaiso g'abantu boona.

⁴“Ente obweraabaga n'erubata engano, otaligiboha akanwa.

⁵“Banyineemu obu baraabaga nibaikara hamu, omu hali bo akafa atasigire mwana omwojo, omufaakati ataliruga omu ruganda rwa iba akaswerwa omunyaihanga; muramu we amuswere, mugenzi we nkooku akaba amuswire.

⁶Kandi omwana omwojo ow'okubanza ou balizaara, arukwe ibara lya kifa, mugenzi we, nukwo aleke kuherra kimu omu Isirairi.

⁷Baitu mugenzi wa kifa obwaraaba atarukwenda kuswera omufaakati ogu, omufaakati agende ha irembo ly'abakuru abagambire ati: ‘Muramu wange ayangire kwikaza ibara lya mugenzi we omu Isirairi; tarukugonza kunswera.’

⁸Nubwo abakuru b'ekiikaro muramu we ekyaikaramu, bamwete babaze na uwe; kakuba ayangira kimu akagamba ati: ‘Tindukwenda kuswera omufaakati ogu’,

⁹aho omufaakati, airirre muramu we, aho omumaiso g'abakuru, amujuulemu enkaito ye, amucwere amacwanta omumaiso; agambe ati: ‘Eki nikyo kikorwege ha musaija anyakwanga kwombeka eka ya mugenzi we.’

¹⁰Kandi ibara ly'enju y'omusaija ogu, omu Isirairi, eraayetwaaga ‘enju yoogu ayaihirwemu enkaito.’

¹¹“Abasaija babiri obubaraabaga nibarwana, omukazi woomu ha basaija abo akairra haihi kujunira iba, amwiheho oli arukumuteera, akanaga omukono gwe akasika obusaija bwooli arukuteera iba,

¹²omukazi ogu omutemeho omukono, otalimugirra embabazi.

¹³“Omunsahu yawe, otalibamu n'amabaale abiri, erikooto n'eritoito agatarukwingana.

¹⁴N'omunju yawe, otaligiramu endengo ibiri, enkooto n'entoito.

¹⁵Obege n'ibaale erinyakuhikire, kandi eritarukunyaga, obege n'endeengo enyakuhikire; etarukunyaga; nubwo olihangaara omunsi MUKAMA Ruhanga wawe eyarukwija kukuha.

¹⁶Habwokuba abo boona abanyakukora ebintu nkeebi, eby'obugobya, MUKAMA Ruhanga wawe abanoba.

¹⁷“Obumukaba muli omumuhanda nimuruga omunsi Misiri, oijukege Amaleki ekiyabakozire,

¹⁸nkooku yabaseesiire, mugwiire ensazi kandi mujwahire, tiyatiina Ruhanga, yaita boona abakaba basigaire enyuma.

¹⁹Habweki, MUKAMA Ruhanga wawe obwaraamara kukuhuumuza, akakwiha omu banyanzigwa bawe boona abanyakukwehinguliriize abanyakuli omunsi eyarukwija kukuha, ogyetwarre ebe bugwetwa bwawe, obu nubwo olimarraho kimu Amaleki, aleke kugaruka kwijukwa hansi y'iguru; eki kitalikweba.