Read Runyoro - rutooro Bir 26 Bible Online

Bir 26 - Runyoro - rutooro bible

Bir 26

¹“Obumuliba muhikire omunsi MUKAMA Ruhanga wanyu eyarukubaha kuba nsi yanyu ey'ebiro byona, kandi obumulikamara kugitunga mugiikairemu,

²mukwate emiganuro ey'ebintu, ebijuma ebi muliba mwereze haitaka, omunsi egi MUKAMA Ruhanga wanyu eyarukubaha. Omuganuro ogute omu kigega, ogende omukiikaro MUKAMA Ruhanga wawe ekyalikoma kumuramizaamuga.

³Ogende hali nyakatagara ow'aliba naroleerra ekiikaro eki omugambire oti: ‘Ha kiro kinu, ninyaturra MUKAMA Ruhanga wange nti: Ntaahire omunsi MUKAMA ei yaraganiize kuha baisenkuruitwe.’

⁴Nyakatagara nubwo akwiheho ekigega ekyoliba okwasire, akite hansi omumaiso g'itambiro lya MUKAMA Ruhanga wawe.

⁵Ogambire MUKAMA Ruhanga wawe oti: ‘Ise nyowe akaba ali Omwaramu, engenzigenzi, akagenda omunsi Misiri n'abantu bake, kandi oku, nuho yafookire ihanga likooto ery'amaani kandi erirukurangaanwa.

⁶Abanyamisiri baakatukora kubi, baatubonabonesa baatufoora bairu.

⁷Nubwo twataagiire MUKAMA owa baisenkuruitwe, yatuhurra yarora omuhito gwaitu, nkooku turukukozesebwa n'amaani, n'okuturukukorwa kubi.

⁸Kandi yatwiha omunsi Misiri naakoza omukono gw'obusobozi n'amaani ge, naakora ebirukutiinisa muno kandi ebyamahano.

⁹Akatuleeta omukiikaro kinu, kandi yatuha ensi enu enyakwijwire amata n'obwoki.

¹⁰Dora hati, Ai MUKAMA, ndeesire omuganuro ogw'ebintu ebimbandize kweza ha itaka eriwampaire.’ Omuganuro ogute hansi omumaiso ga MUKAMA Ruhanga wawe omuramye oli mumaiso ge.

¹¹Kandi okyanganuke muno habw'ebirungi byona Ruhanga wawe ebyakuhaire, ebi ahaire eka yawe, iwe hamu n'Omuleevi n'omusuuhuuki arukwikara na iwe.

¹²Obwolimara kutwara kimu kya ikumi eky'ebintu ebyotungire omu mwaka ogwa kasatu, nugwo omwaka ogw'okuheeramu kimu kya ikumi, n'okukiha Omuleevi rundi ensuuhuuki, enfuuzi, n'enfaakati, nukwo babiriire nambere oikara, baigute.

¹³Nubwo oligamba oli omumaiso ga MUKAMA Ruhanga wawe oti: “Omugabo gunu, ngwihire omunju yange, tikiri eki kyonka, nguhaireho Omuleevi, ensuuhuuki, enfuuzi n'enfaakati, nimpondera ebiragiro byawe byona ebiwampaire ekibigamba; tinyangire kiragiro kyawe na kimu, kandi timbyeberwe.

¹⁴Obu nkaba ninganya, ntalye kimu kya ikumi eki, n'obuhakubaire kwihaho ekicweeka kyakyo obunkaba ninzira, rundi kukigabira emizimu. Nkahurra iraka lya MUKAMA Ruhanga wange, nakora byona nkooku wandagiire.

¹⁵MUKAMA oyeme omwiguru, ekiikaro kyawe ekirukwera orole hansi, ohe omugisa abantu bawe Abaisirairi, n'itaka eriwatuhaire, ensi enyakwijwire amata n'obwoki, nkooku waraganize baisenkuruitwe.”

¹⁶“Kiro kinu, MUKAMA Ruhanga wawe naakuragira kukwataga ebiragiro bye nebigambo bye, kandi otehoga omutima gwawe gwona n'omwoyo gwawe gwona, kukoraga ekibirukugamba.

¹⁷Kiro kinu, ogambire, MUKAMA nkooku ali Ruhanga wawe, nkooku oraakoraga ebi agonza, nkooku oraataga omutima ha biragiro bye, na ha bigambo bye, kandi nkooku oraamuhurraga.

¹⁸Kiro kinu, MUKAMA na uwe, nkooku yabaraganiize, abagambiire ati, muli ihanga lye bweremera, kandi ati, mukwatege ebiragiro bye ekibirukugamba.

¹⁹Obu nubwo alibanyumiza abakize amahanga agandi goona agayahangire, omu kurangaanwa n'omu kitiinisa, nubwo mube ihanga lya MUKAMA Ruhanga wanyu erirukwera nkooku yagambire.”