Read Runyoro - rutooro Bir 27 Bible Online

Bir 27 - Runyoro - rutooro bible

Bir 27

¹Musa hamu n'abakuru b'enganda za Isirairi, nubwo yaragiire abantu n'agamba ati: “Mukwatege ebiragiro binu ebindukubaragira kiro kya hati.

²Kandi ha kiro ekimulyambukiraho Yorudaani, mukahika omunsi MUKAMA Ruhanga wanyu eyarukwija kubaha, mubyaale amabaale amakooto, mugasiige inoni;

³Obu mulyambuka kutaaha omunsi MUKAMA Ruhanga wanyu eyarukwija kubaha nkooku yabaraganiize, mugahandiikeho ebigambo byona ebinyakuli omu biragiro binu.

⁴Kandi obumulimara kwambuka Yorudaani, ha rusozi Ebbali mubyaleho amabaale agarukubazaaho ebindukubaragira hati, kandi mugasiige inoni.

⁵Oku nuho mwombekere MUKAMA Ruhanga wanyu itambiro, amabaale ag'itambiro eri, mutaligaasa n'ekyooma.

⁶Mwombekere MUKAMA Ruhanga wanyu itambiro ery'amabaale agatabaizirwe; niryo muhongerehoga ebihongwa eby'okwokya,

⁷niryo mutambirehoga ebihongwa eby'okusaba obusinge, nuho muliirege, kandi nuho mukyanganukirege, omumaiso ga MUKAMA Ruhanga wanyu.

⁸Ha mabaale ago, ohandiikeho kurungi ebigambo byona ebinyakuli omubiragiro binu.”

⁹Musa n'abanyakatagara Abaleevi nubwo baagambiire Abaisirairi boona bati: “Inywe Abaisirairi muculeere, kandi mutege amatu: Kiro kya hati, mwafooka bantu ba MUKAMA Ruhanga wanyu.

¹⁰Habweki, MUKAMA Ruhanga wanyu ogu, mumuhurrege, nimukwata ebiragiro bye n'ebigambo bye, ebi ndukubagambira kiro kya hati.”

¹¹Ha kiro eki kyonyini, Musa akateererra abantu naagamba ati:

¹²“Obu muraamara kwambuka Yorudaani, abantu banu: Simyoni, Leevi, Yuda, Isakara, Yosefu na Benyamiini, beemerre harusozi Gerizimu, basabire abantu omugisa.

¹³Kandi banu: Rubbeni, Gaadi, Aseri, Zebbuluuni, Daani na Nafutaali, beemerre harusozi Ebbali, bakyeene.

¹⁴Abaleevi bagambire Abaisirairi n'iraka likooto bati:

¹⁵“‘Akyenwe omuntu ogu anyakubaija ekisisani, rundi okukyaagya omubintu, ekintu MUKAMA eki anuga, ekinyakukozirwe abantu, akakita harubaju nuho akiramize.’ Abantu boona bagarukiremu hamu bati: ‘Amina.’

¹⁶“‘Akyenwe omuntu ogu, atatamu ise na nyina ekitiinisa.’ Abantu boona bagarukiremu hamu bati: ‘Amina!’

¹⁷“‘Akyenwe ogu anyakwihurra akarorwaho k'omutaano ogw'omutaahi.’ Abantu boona bagarukiremu hamu bati: ‘Amina!’

¹⁸“‘Akyenwe ogu anyakuhabisa kihimbaara akamwiha omu muhanda.’ Abantu boona bagarukiremu hamu bati: ‘Amina!’

¹⁹“‘Akyenwe omuntu anyakuzindiriza ensuuhuuki, enfuuzi n'enfaakati.’ Abantu boona bagarukiremu hamu bati: ‘Amina!’

²⁰“‘Akyenwe omuntu ogu, anyakubyama na muka ise.’ Abantu boona bagarukiremu hamu bati: ‘Amina!’

²¹“‘Akyenwe omuntu ogu anyakusiihana n'ekisoro.’ Abantu boona bagarukiremu hamu bati: ‘Amina!’

²²“‘Akyenwe omuntu ogu anyakusiihana na munyaanya arukuzaarwa ise rundi nyina.’ Abantu boona bagarukiremu hamu bati: ‘Amina!’

²³“‘Akyenwe omuntu ogu, anyakusiihana na nyinazaara.’ Abantu boona bagarukiremu hamu bati: ‘Amina!’

²⁴“‘Akyenwe ogu anyakwita omutaahi omunsita.’ Abantu boona bagarukiremu hamu bati: ‘Amina!’

²⁵“‘Akyenwe omuntu ogu anyakulya enguzi, aite omuntu ataine omusango.’ Abantu boona bagarukiremu hamu bati: ‘Amina!’

²⁶“‘Akyenwe omuntu ogu, atarukukwata bigambo ebinyakuli omu Biragiro binu.’ Boona hamu ngu: ‘Ego nukwo kibe.’