Read Runyoro - rutooro Bir 28 Bible Online

Bir 28 - Runyoro - rutooro bible

Bir 28

¹“Obworaahurraga MUKAMA Ruhanga wawe, n'oyekamba kukwata ebiragiro bye byona ebindukukuragira kiro kya hati, alikunyumiza akukize amahanga goona ag'omunsi.

²Kandi obworaamuhurraga, oliheebwa emigisa enu yoona.

³Oliheebwa omugisa omurubuga, oheebwe omugisa omumusiri.

⁴Abaana bawe baliheebwa omugisa, n'ebijuma ebyolirima, ebyana eby'ebisoro byawe, ente zawe zirikanya n'entaama zaawe zirizaarwa muno.

⁵MUKAMA Aliha omugisa engano yaawe, n'ebyokulya ebi ogicumbamu.

⁶Oraaheebwaga omugisa n'otaaha, oraahebwaga omugisa n'oturuka.

⁷“Abanyanzigwa bawe abanyakukwimukirra, MUKAMA abaleetere kusingurwa n'orora oti; balikuseesira nibaleetwa omuhanda gumu, baitu okukwiruka balitoma emihanda musanju.

⁸MUKAMA Ruhanga wawe, byona ebyoraakoraga, araabihaga omugisa, amaguli gawe aligaijuza engano; alikuha omugisa omunsi eyarukwija kukuha.

⁹Obwolihurra MUKAMA Ruhanga wawe, okakora kyona eki aragira, nkooku yakunihiize alikufoora ihanga lye mali nkooku yakunihiize.

¹⁰Obu, amahanga goona ag'ensi, nubwo galirora MUKAMA nkooku yakukomere kuba muntu we, kandi nukwo gakutiine.

¹¹Omunsi egi MUKAMA ei yanihiize baaswenkuru ngu aligikuha, alikuheerayo ebirungi bingi muno; olizaara abaana baingi, ente zawe irizaara muno, kandi olyeeza ebyokulya bingi.

¹²Alikukingurra eryahurro lye, niryo iguru, anage enjura omunsi yawe omukasumi kaayo, ahe omugisa byona ebi oraakoraga; oholege amahanga maingi, baitu iwe otalyohoza.

¹³Kakuba okwata ebiragiro bya MUKAMA Ruhanga wawe ebindikukuragira hati, okataho omutima kubihikiriza,

¹⁴oligumya ebigambo ebindikukugambira kiro kya hati, okanga kuserra embandwa n'okwihereza, MUKAMA alikutwara omumaiso, talikugarra enyuma, oraikaraga n'otemba tolisirimuka.

¹⁵“Baitu obwotalihurra MUKAMA Ruhanga wawe, okataho omutima okukwata ebiragiro bye byona n'ebigambo bye ebindukukuragira kiro kya hati, emikyeno erikuhikaho ekwetuumeho.

¹⁶Olikyenwa omurubuga noomu musiri.

¹⁷MUKAMA alikyena engano yawe, n'ebyokulya ebyogicumbamu.

¹⁸Abaana bawe, n'ebijuma eby'itaka lyawe, bireme kukanya, ente zaawe n'amagana g'entaama bikeehe.

¹⁹Obworaabaga n'oturuka kandi n'otaaha, oraakyenwaga.

²⁰“MUKAMA habw'ebibi byawe wakozire, alikukyeena, alikuburanganiza, akukingire emihanda omu byona ebyoyenda kukora, okuhika obwolikahwerekerra okahwaho bwango.

²¹Alikwikazaaho edwara, okuhika obwalikakumara omunsi eyoli haihi kutaahamu okagyetungira.

²²Alikwisa akakonko, omuswija, obuzimba, ekiirro, ekyanda, ekiyaga ihunga n'oruhumbo; ebi byona birikubonesa okuhika obu olikahwerekerra.

²³Iguru eryoraramira, lirifooka mulinga, kandi ensi eyorubataho, erifooka kyoma.

²⁴Omukiikaro eky'okunaga enjura omunsi yawe, alisesamu ecuucu n'omusenyi; ebi biriruga omwiguru bikusesekere, okuhika obwolihwerekerra.

²⁵“MUKAMA alikulekera abanyanzigwa bawe bakusingule; kubaseesira, olitwarwa omuhanda gumu, baitu kubairuka, olitwarwa emihanda musanju; olitiinisa amakama goona ag'ensi.

²⁶Omutumbi gwawe guliboijwa amanyonyi ag'omumwanya, kandi guliibwe enyamaiswa ez'omunsi; tihalibaho muntu noomu ow'alibibinga.

²⁷MUKAMA n'aija kukwisa ebizimba nkeebi yarwaize Abanyamisiri, ebihoya, omuhago, okuliibwa, ebyotalitambirwa.

²⁸Alikunaga iraro, akwite amaiso, akubuze ebiteekerezo;

²⁹omubwire bwa nyamusana, oraahumahumaga nka kihimbaara. Byona ebyoraakoraga, tobitungiremuga mugisa; oraabonabonesibwaga, kandi oraikaraga n'onyagwa, tihalibaho muntu noomu ow'okukukonyera.

³⁰Obwolijumbira omukazi, omusaija ondi nuwe alimuswera; obwolyombeka enju toligiraaramu; obwolirima omusiri gw'emizaabbibbu, ebijuma byagwo tolibibonaho.

³¹Ente yawe baligikwitira omumaiso, baitu toligiryaho. Enkaina yawe erinyagwa norora oti, kandi terikugarulirwa; entaama zaawe ziriheebwa abanyanzigwa bawe, tihalibaho muntu noomu ow'okukukonyera.

³²Batabani bawe na bahara bawe, baliheebwa abantu abandi, na iwe oroleerire oti; izooba lyona, oraikaraga ohangire amaiso, obategeriize kugaruka.

³³Ihanga eryotakamanyahoga, niryo lirirya ebyokulya ebiwalimire haitaka lyawe n'ebintu ebindi ebi watalibaniire; baitu iwe, oraikaraga nobonabonesibwa, kandi n'okorwa kubi;

³⁴ebintu ebyolirora n'amaiso gawe, nukwo bikunage iraro.

³⁵MUKAMA naija kukurwaza ebizimba ebirukucumita ebyotasobora kutambirwa okuruga ha mara g'ekigere okuhika ha kasoke.

³⁶“MUKAMA alikutwara hamu n'omukama ou wayekomiire omu ihanga, iwe na baaswenkuru erimutakamanyahoga; oku nuho oliheerereza embandwa ezinyakukozirwe omumiti noomu mabaale.

³⁷Abantu barakwekangaga, ocwibwemuga orufumo, omu mahanga goona MUKAMA nambere alikutwara, oliba kintu eky'okugaywa.

³⁸Oraasigaga bingi, baitu oraagesaga bike; habwokuba biraamarwahoga enzige.

³⁹Olibyara kandi olime kurungi omusiri gw'emizabbibbu, oginogorre; baitu tolinywa marwa gaagwo, kandi tolinoga mizabbibbu yagwo.

⁴⁰Omunsi yawe yoona, habwokuba, erimarwaho enzito, olibyaramu emiti eya oliva, baitu amagita gaayo toligeesiiga, habwokuba ebijuma biriragara.

⁴¹Olizaara aboojo n'abaisiki, baitu tibaliba bawe; habwokuba balinyagwa.

⁴²Emiti yawe yoona n'ebijuma eby'itaka lyawe, biririibwa enzige.

⁴³Abanyamahanga abanyakubaikaramu balyeyongera kuba bamaani, kandi inywe mulifuberra.

⁴⁴Nubo barabahoraga, inywe timulibahora; nubo baliba mutwe inywe muliba mukira kwonka,

⁴⁵okuhika obumulikahwerekerra. Emikyeno egi yoona, eribahikaho, eribakuraatira, eribakwata habwokuba mutahurre MUKAMA Ruhanga wanyu, mutakwate ebiragiro bye n'ebigambo bye ebiyabaragiire.

⁴⁶Niyo eriba bwakaiso bw'omusango Ruhanga oguyabacweriire, inywe n'abaijukuru banyu, ebiro byona.

⁴⁷“Habwokuba, habw'okuburanganizibwa ebintu ebingi ebihinguraine mutaheereze MUKAMA Ruhanga wanyu n'omuhimbo, n'omutima ogwina okusemererwa.

⁴⁸Habweki muliheereza abanyanzigwa banyu, MUKAMA abaalituma kubarwanisa, kunu nimurumwa enjara, nimwitwa iroho, mutaina byokujwara, ebintu byona bibahoireho; alibaboha omubikya ekikoligo eky'ekyoma, okuhika obwalibahwerekereza.

⁴⁹Alibaleetera ihanga, ery'okubarwanisa, aliihe hara ha mpero y'ensi erirukwanguha nk'isamba eri erirukuhurrukira omu mwanya, erimutarukukenga ngambo yalyo.

⁵⁰Ihanga eritaina mbabazi, eritatamu kitiinisa bantu bakuru, kandi eritagirra mbabazi abaana abato,

⁵¹balirya enyama ey'ente zanyu n'ebijuma eby'itaka lyanyu, okuhika obumulikahwerekerra; ihanga eritalibalekera byokulya, eritalibalekera eviini rundi amagita, eririkeehya ente zanyu n'ebyana eby'amagana ganyu ag'entaama n'ag'embuzi, okuhika obubalibahwerekereza.

⁵²Balibagotera omumbuga zanyu zoona, okuhika ebiisiika byanyu ebiraihire kandi ebigumire ebimurukwesiga, obubirigwa omunsi yanyu yoona; kandi balibagota omumbuga zanyu zoona ez'omunsi, MUKAMA Ruhanga wanyu eyarukwija kubaha.

⁵³Habw'emihito ei mulibamu, abanyanzigwa banyu obubaliba babagosire, mulirya abaijukuru banyu, mulirya batabani banyu na bahara banyu, MUKAMA Ruhanga wanyu abayabahaire.

⁵⁴Omusaija ow'embabazi omuli inywe kandi ayayoroirwe kurungi, taliha owanyina ebyokulya, talibiha mukazi we, noobwakubaire omwana we macura anyakuli na uwe.

⁵⁵Abo boona, talibahaho nyama ey'abaana be abaarukulya; habwokuba habw'emihito nyingi ei muliba nayo, abanyanzigwa banyu obubalibafunza omumbuga zanyu, aliba atasigaize kantu.

⁵⁶Omukazi omworobi kandi ayayoroirwe kurungi, atasobora kurubata haitaka, ngu habwokuba murungi, taliha iba ebyokulya, nabwakubaire mutabani we rundi muhara we;

⁵⁷abanyanzigwa obubalimufundiza omurubuga rw'owabu, alibulirwa kimu ebyokulya. Ekirirugamu, alye omwana we ou yakaruga kuzaara, hamu n'ekyenyuma, ebi, talibihaho iba ou agonza muno, rundi abamu ha baana be.

⁵⁸“Obumutalitaho omutima okuhikiriza ebiragiro byona ebinyakuhandiikirwe omukitabu kinu, mukatiina MUKAMA Ruhanga wanyu ogu ow'ekitiinisa, kandi anyakutiinisa,

⁵⁹alibabonesa kandi alibonesa baijukuru banyu emihiito eyamaani etakarorwaga, kandi etalihwaho, alibarwaza endwara ez'amaani kandi ezitarukukira.

⁶⁰Aligaruka abarwaze endwara nk'ezimwarwaraga muli Misiri, ezimwatiinire; endwara ezi timulizikira.

⁶¹Kandi buli ndwara na buli muhito ogutaahandiikirwe omukitabu eky'ebiragiro binu, ebi byona MUKAMA alibibahikyaho, okuhika obumulihwerekerra.

⁶²Inywe abakaba bali baingi nk'enyunyuuzi eza haiguru, mulisigara muli mbarwa; habwokuba mutahurre MUKAMA Ruhanga wanyu.

⁶³MUKAMA nkooku yasemeriirwe kubakorra ebirungi n'okubakanyisa, kandi nukwo alisemererwa kubahweerekereza, n'okubamaraho; mulimeenywa muruge omunsi ei murukugenda kulya.

⁶⁴MUKAMA alibararangya omu mahanga goona, okuruga harubaju orumu orw'ensi, okuhika ha rundi; oku nuho muliheerereza embandwa ezakozirwe omumiti n'omumabaale, inywe na baisenkuru inywe abamutaramanyireho.

⁶⁵Omu mahanga ago, timulitungirayo businge, timulibona hookuta kigere. MUKAMA alibaheerayo omutima ogw'enkizi, alibaleetera okutahweza kurungi, n'omwoyo omuceke;

⁶⁶muraikaraga muharaize emitima; nimutiina obukiire n'obwizire; obwomeezi bwanyu bwona, timuligwagwana.

⁶⁷Omu bwire bwa nyenkya, muraagambaga muti: ‘Haa boojo, bubaire kwira!’ Kandi omukairirizi, muraagambaga muti: ‘Haa boojo, bubaire kukya!’ Eki kiraaletwaga obutiini obunyakubali omumutima, noomu bintu ebimuraaroraga.

⁶⁸MUKAMA alibatwaarra omumeeri, abagarre omunsi Misiri, abarabye omuruguudo ruli, orunabagambiire nti: ‘Oruguudo oru, timuligaruka kururora; oku nuho mulyeherayo hali abanyanzigwa banyu mugurwe, mube bairu n'abazaana, baitu busaho noomu alibagura.’”