Read Runyoro - rutooro Bir 29 Bible Online

Bir 29 - Runyoro - rutooro bible

Bir 29

¹Binu nibyo ebigambo eby'endagaano, MUKAMA ei yaragiire Musa kukora n'Abaisirairi omunsi Mowabbu, ebirukwongerwa ha ndagaano ei yaragaine nabo harusozi Holebbu.

²Musa akasorooza Abaisirairi boona yabagambira ati: “Omunsi Misiri mukeerorra byona MUKAMA ebiyakozire Faraaho n'abaheereza be boona,

³emihito etagambwa, ebyamahano n'ebihuniriza;

⁴baitu okuhika na hati, takabahaire mutima gw'okwetegereza, takabahaire maiso ag'okuroza, takabahaire matu ag'okuhurra.

⁵Mbeebembiire omwirungu okumara emyaka amakumi ana; mutaburwe ngoye n'enkaito ez'okujwara.

⁶Mukaba mutaina mugaati ogw'okulya, mukaba mutaina marwa ag'okunywa rundi eky'okunywa ekindi eky'amaani, baitu MUKAMA akabaha byona ebimukaba nimwetaaga, nukwo abamanyise nkooku aba Ruhanga wanyu.

⁷Kandi obumwahikire omukiikaro kinu, Sihoni omukama wa Hesibboni, na Ogi omukama wa Basani, baatuseesira kuturwanisa; baitu tukababinga;

⁸ensi yabo twaginyaga, twagigabira oruganda rwa Rubbeni noorwa Gaadi, n'ekicweka eky'oruganda rwa Manaase.

⁹Habweki, muteho omutima okuhikiriza ebigambo eby'endagaano enu, byona ebi murukukora nukwo bigende kurungi.

¹⁰“Kiro kinu inywena mwemeriire omumaiso ga MUKAMA Ruhanga wanyu; bakuru b'enganda zanyu, abeebembezi banyu, abalemi banyu, abantu ba Isirairi boona,

¹¹abaana banyu, bakazi banyu, n'abanyamahanga abamwikara nabo omurusiisira rwanyu, abanyakubaseenyera enku bakabaleetera amaizi,

¹²nukwo mutaahe omundagaano MUKAMA Ruhanga wanyu ei arukukora na inywe, kiro kya hati.

¹³Nukwo abagumye kiro kya hati, mube bantu be mali, na uwe abe Ruhanga wanyu nkooku yabaraganiize, kandi nkooku yarahiriire baisenkuru inywe: Abburahamu, Isaaka na Yakobbo.

¹⁴Endagaano enu, tindukugikora na inywe inywenka,

¹⁵baitu kandi ningikora noogu ow'atali hanu na itwe kiro kinu, kandi ningikora noogu anyakwemeriire hanu hamu na itwe omumaiso ga MUKAMA Ruhanga waitu.

¹⁶“Mumanyire nkooku twaikaire omunsi Misiri, kandi nkooku twarabire omumahanga hagati agamwaleesirwemu.

¹⁷Mukarora ebintu byago ebibi, mukarora ebisisani by'embandwa zaago ebigakaba gainabyo, ebyabaizirwe omumiti noomu mabaale, ebyaheesirwe omu feeza noomu zaabbu.

¹⁸Mwerinde, kiro kinu omuli inywe, hatabaho omusaija, omukazi,, ekika rundi oruganda, orunyakwina omutima ogw'okuruga hali MUKAMA Ruhanga waitu, rukagenda kuheereza embandwa z'amahanga ago. Omuli inywe, hatalizookamu ekikoro ekirukwana ekijuma eky'obutwa, kandi ekirukusarra.

¹⁹Omuntu omubi, nuwe omuntu ogu, obu amara kuhurra ebigambo eby'endagaano enu, agumiza kimu ati: ‘Noobu ndaikara ngumangaine, ninyija kutunga obusinge.’ Ekiriruga omuli eki, inywena abarungi n'ababi, nukwo kuhwerekerra.

²⁰Omuntu ogu MUKAMA talimuganyira, baitu ekiniga kye n'ihali rye, birimwakiraho, emikyeno enyakuhandiikirwe mu kitabu kinu, erimwizira MUKAMA alimuhwerekerereza kimu, aleke kugaruka kwijukwa hansi y'iguru.

²¹MUKAMA alimusoroora omunganda zoona eza Isirairi, amubonese emihito erukuhikaana n'emikyeno ey'endagaano enyakuhandiikirwe omu kitabu kinu eky'ebiragiro.

²²Omu kasumi akarukwija, abaana banyu abalibaho, inywe mutakyaroho, n'abanyamahanga abaliruga omunsi eya hara, obubalirora emihito ey'ensi egi, n'endwara MUKAMA ezaliba agirwaize, baligamba bati:

²³Ensi yoona efookere buganga n'ekisura, yoona ehiire yahwaho, tesobora kusigwamu kandi tesobora kumeza kantu. Busaho kinyansi ekisobora kumera, nesisanira kimu Sodomu na Gomora, Abima na Zeboyimu, MUKAMA eziyahwerekeriize anyina ekiniga kingi.

²⁴Ego, amahanga goona galikaguza gati: ‘Habwaki, ensi enu, MUKAMA yagikozire ekintu kinu? Kiki ekyamubiihiize muno kiti?’

²⁵Abantu nubwo baligarukamu bati: ‘Habwokuba abantu, MUKAMA Ruhanga owa baisenkurubo, obu yabaihire omunsi Misiri, bakacwa endagaano ei

²⁶yaragaine nabo, baaheereza embandwa, baaziramya n'okuziramya, embandwa ezibakaba batamanyire, kandi ezaakaba abatangire.

²⁷Ekiniga kya MUKAMA, nukwo kwakiraho ensi enu, yagitaho emikyeeno yoona enyakuhandiikirwe omu kitabu kinu;

²⁸abantu baamwo nukwo kubamenyamu abiihiirwe muno, kandi atanyina mbabazi, yabatwara omunsi endi ei barumu n'okuhika hati.’

²⁹“Haroho ebintu ebimu eby'ensita MUKAMA Ruhanga waitu ebiyaserekere; baitu ebi ebyaasuukwirwe, bikasuukulirwa itwe n'abaana baitu, nukwo tukwate ebigambo byona ebirukuragirwa ebiragiro binu.”