Read Runyoro - rutooro Bir 3 Bible Online

Bir 3 - Runyoro - rutooro bible

Bir 3

¹Hanyuma twakubuka, twakwata omuhanda ogurukugenda Basani; Ogi omukama wa Basani hamu n'abantu be boona yaija kuturwanisa omukiikaro Ederi.

²Baitu MUKAMA yangambira ati: “Otamutiina, mmazire ira kumukuta omungaro hamu n'abantu be, n'ensi ye, noija kumukora nkooku wakozire Sihooni omukama w'Abamooli abaikaraga Hesibboni.”

³MUKAMA Ruhanga waitu, omukama Ogi owa Basani n'abantu be, na uwe yabatuta omungaro, twamusingura, abantu be boona twabaita.

⁴Omu kasumi ako, twakwata embuga ze zoona, hatasigale rubuga na rumu oru tutarabanyagireho, embuga nkaaga, ensi yoona ey'Arugoobi, obukama bwa Ogi obw'omunsi Basani.

⁵Embuga ezi zoona zikaba zizitiriirwe ebisiika ebiraihire, zitairwemu amalembo n'ebihongozo, kandi hakaba haroho ebyaro bingi muno ebikaba bitazitiirweho bisiika.

⁶Embuga ezi tukazihwerekerereza kimu nkooku twakozire Sihooni omukama wa Hesibboni, oteho n'embuga ezindi zoona, twaita abasaija, abakazi n'abaana.

⁷Baitu ente zoona n'ebindi ebi twaihire omumbuga, nugwo gwabaire munyago gwaitu.

⁸Omu kasumi ako, ensi ey'ekaba eri y'abakama ababiri ab'Abamooli, abakaba bali obuseeribwa Yorudaani, okuruga hakihanga eky'Arumooli, okugarukira harusozi Herumooni, nukwo twagitwaire tuti;

⁹(Abasidoni, orusozi Herumooni barweta Siryoni, kandi Abamooli abo, bamweta Senira.

¹⁰Twakwata embuga zoona ez'omukyeya, Giryadi yoona na Basani, okuhikira kimu Saleka na Ederi, embuga ez'omubukama bwa Ogi owa Basani.

¹¹Ha Balefaimu endagalikwa, Ogi wenka omukama wa Basani, nuwe yali akyasigaireho. Ekitabu kye kikaba kiri ky'ekyoma; obura bwakyo bukaba buli bwa mita ina, obugazi mita ibiri kusigikira harulengo rw'akasumi ako; nahati kikyaliyo murubuga Rabba orw'Abamooni.)

¹²Omu kasumi ako obu twaliire ensi egi, Abarubbeni n'Abagaadi, nkabaha ensi erukutandikira harubuga Aroheri orunyakuli hansaro ey'ekihanga eky'Arumooni,

¹³n'ekicweka eky'ensozi eya Giryadi hamu n'embuga zaayo; ekicweka kya Giryadi ekyasigaireho, na Basani yoona, nziburo obukama bwa Ogi, (ensi yoona ey'Ara

¹⁴Yairo ow'oruganda rwa Manaase, akatwara ensi yoona ey'Aragobi, niyo Basani, okuhikira kimu ha mutaano ogw'Abagesura n'Abamaakati; ebyaro ebi yabiruka ibara lye “byaro bya Yairo”, na hati hoona, nukwo byetwa.)

¹⁵Makiri, nkamuha Giryadi,

¹⁶kandi ab'oruganda rwa Rubbeni n'aba Gaadi, nkabaha ensi ey'erukutandikira Giryadi ekahikira kimu ha kihanga eky'Aramooni, hagati y'ekihanga eki, nugwo omutaano, okuhikira kimu eruguru y'ekisaaru Yabboki, omutaano ogw'Abamooni.

¹⁷Kandi nabaha na Araba, okutandikira Kineresi, okuhikira kimu ha Nyanja ey'Araba ey'Ekisura, ha bweculiko bwa Pisiga, ha bukiizi bwa Burugaizooba, Yorudaani, nugwo omutaano.

¹⁸Omu kasumi ako, nkabaragira nti “MUKAMA Ruhanga wanyu abahaire ensi enu, bube butaka bwanyu, abasaija banyu boona emanzi, bagende bakwasire ebyokurwanisa byabo, beebembere bagenzi banyu Abaisirairi.

¹⁹Baitu bakazi banyu n'abaana banyu, basigale omumbuga ezi nabahaire, hamu n'ente zanyu (mmanyire nkooku mwina ente nyingi)

²⁰okuhika MUKAMA obu araahumuza bagenzi banyu nkooku yahuumwize inywe, nabo bakalya ensi MUKAMA Ruhanga wanyu ei ali haihi kubaha obuseeri bwa Yorudaani; obu, nubwo buli omu aligaruka omubutaka bwe obunabahaire.”

²¹Kandi omu kasumi ako, nkaragira Yoswa nti: “Oboine byona MUKAMA Ruhanga wanyu ebi akozire abakama banu ababiri, n'amakama agandi aga murukwija kurabamu nukwo arukwija kugakora ati.

²²Abakama abo mutalibatiina, habwokuba MUKAMA Ruhanga wanyu nuwe alibarwanirra.”

²³Omu kasumi ako konyini, nkeesengereza MUKAMA nti:

²⁴“Ayi MUKAMA Ruhanga, hati nubwo watandika kwoleka omwiru wawe obukuru bwawe n'obusobozi bwawe; ruhanga ki anyakuli omwiguru rundi omunsi, arukusobora kukora ebikorwa ebirukusisana nka binu, kandi eby'amaani nkeebi wakozire?

²⁵Nkwesengeriize, onyikirize nyambuke ndole ensi enungi eri, enyakuli obuseeri bwa Yorudaani, ensi enungi ey'ensozi eri, na Lebbbanooni.”

²⁶Baitu habwanyu, MUKAMA akambiihirirwa, eki namusabire; atakiikirize nukwo kungambira ati: “Waabalize lekera aho; otagaruka kumbaliza ha kintu eki.

²⁷Genda otembe hamutwe gw'orusozi Pisiga, onage amaiso, orole Bugwaizooba ha bukiizi bw'emoso, ha bukiizi bw'obulyo na Burugaizooba, ogirole kurungi ogyetegereze; habwokuba, ekisaaru Yorudaani torukwija kukyambuka.

²⁸Baitu oragire Yoswa, omuteererre kandi omugumye; habwokuba nuwe arukwija kwebembera abantu abataahye omunsi ei oraarora.”

²⁹Nubwo twaikaire omu kihanga ekinyakuroleriire Bbesi-Peyora.