Read Runyoro - rutooro Bir 30 Bible Online

Bir 30 - Runyoro - rutooro bible

Bir 30

¹“Ebintu ebi byona, ebi nkwolekere, omugisa n'omukyeno obubirimara kukuhikaho, okabiijukira omu mahanga goona MUKAMA Ruhanga agayakubingiiremu,

²okamuhindukira, iwe n'abaana bawe, okakwata ekigambo kye noohikiriza n'omutima gwawe n'omwoyo gwawe gwona byona ebindukukuragira kiro kya hati,

³obu nubwo alikugirra embabazi, akugarurre obusinge, agaruke akusorooze, akwihe omu mahanga goona aga yakurarangiizeemu.

⁴Noobwoliba orarangiire omubicweka ebya hara muno eby'iguru, MUKAMA Ruhanga wawe alikusoroozaayo; alikutabarraayo,

⁵alikuleeta omunsi baswenkuru ei baatungire, na iwe ogitunge; alikuha obusinge, kandi akukanyise muno okukiraaho baswenkuru.

⁶MUKAMA Ruhanga wanyu alibaha hamu n'abaana banyu emitima erukuhurra, nukwo mumugonze n'emitima yanyu n'emyoyo yanyu yona, nubwo mulyomeera.

⁷Emikyeno egi yoona, aligitaho abazigu banyu abanyakubahiiganiza.

⁸Nukwo ogaruke ohurre MUKAMA, okwate ebiragiro bye byona ebindukukuragira kiro kya hati.

⁹Byona ebyoraakoraga, araabihaga omugisa mwingi muno ogutagambwa, aliguha abaana bawe, ente zawe, n'ebijuma eby'itaka lyawe, aligaruka asemerererwe kuguha obusinge, nkooku yasemeriirwe kuguha baaswenkuru.

¹⁰Baitu obwolimuhurra okakwata ebiragiro bye n'ebigambo bye ebinyakuhandiikirwe omukitabu kinu eky'ebiragiro, obu olimuhindukira n'omutima gwawe n'omwoyo gwawe gwona, nubwo alikukorra ebi.”

¹¹“Ekiragiro kinu ekindukukuragira kiro kya hati, tikigumire kuhindurana kandi tikikuli hara.

¹²Tikiri omwiguru, nukwo oyekwase oti: ‘Nooha alitemba omwiguru kukituleetera, nukwo tukihurre?’

¹³Kandi tikiri hara muno obuseeri bw'enyanja okeekwasa ngu: ‘Nooha araayambuka enyanja akakituleetera, nukwo tukihurre?’

¹⁴Baitu ekigambo kikuli haihi muno, omukanwa kawe noomu mutima gwawe, habweki, kihikirize.”

¹⁵“Oyetegereze, kiro kya hati, nkuhaire kwekomeraho obwomeezi n'oburungi, rundi orufu n'obubi.

¹⁶Obu olikwata ebiragiro bya MUKAMA Ruhanga wawe ebindukukuragira kiro kya hati, okamugonza, okakora ebyagonza, okahikiriza ebirahiro bye n'ebigambo bye, obu nubwo olyomeera kandi okanye; MUKAMA Ruhanga wawe nubwo alikuha omugisa omunsi ei arukwija kukuha.

¹⁷Baitu omutima gwawe obugulihuguka, okanga kuhurra, okatwalirizibwa omukuramya embandwa n'okwiheereza,

¹⁸kiro kya hati, ninkugambira kimu nti: ‘Olihwerekerra; ensi eyorukugenda kulya obuseeri bwa Yorudaani, toligimaramu biro bingi.

¹⁹Kiro kinu, ninyeta iguru n'ensi, nubwo obwakaiso oburukugumya nkooku nkwolekere obwomeezi n'orufu, omugisa n'omukyeno, habweki, wekomereho obwomeezi, nukwo oyomeere n'abaijukuru bawe.

²⁰Ogonzeege MUKAMA Ruhanga wawe, omuhurrege, kandi omugumireho; omu nuho halikurugira obwomeezi n'obuhangaazi, nukwo oikale omunsi MUKAMA ei yarahiire baswenkuru: Abburahamu, Isaaka na Yakobbo nkooku aligibaha.’”