Read Runyoro - rutooro Bir 31 Bible Online

Bir 31 - Runyoro - rutooro bible

Bir 31

¹Musa yayongera okubaliza Abaisirairi boona ebigambo binu ati:

²“Kiro kya hati, nahikya emyaka kikumi mu abiri ey'obukuru, tinkyasobora kuba mwebembezi wanyu, kandi ekindi, MUKAMA angambiire ati: ‘Tindukwija kwambuka Yorudaani.’

³MUKAMA Ruhanga wanyu wenka, nuwe arukwija kubeebembera; naija kuhwerekereza abantu ab'amahanga ago goona, inywe mutakahikireyo, nukwo mulye ensi yago.

⁴Abantu ab'amahanga ago, MUKAMA naija kubakora nkooku yakozire Sihoni, na Ogi abakama b'Abamooli n'ensi yabo.

⁵Naija kubabaha mubasingule, nimugendera ha biragiro byona ebimbaragiire.

⁶Mube b'amaani kandi mugume, mutabatiina kandi mutabeekanga: habwokuba MUKAMA Ruhanga wanyu nuwe arukwija kugenda na inywe, taabahemukire rundi kubarugaho.”

⁷Kandi Musa yayeta Yoswa yamugambira omumaiso g'Abaisirairi boona ati: “Obe w'amaani kandi ogume omutima; habwokuba noija kwebembera abantu banu, obatwale omunsi MUKAMA ei yarahiriire baisenkurubo ngu aligibaha; niwe oligibataahya.

⁸MUKAMA nuwe araagendaga akwebembiire; araikaraga na iwe, talikuhemukira kandi talikurugaho; habweki, oleke kutiina n'okuhwa amaani.”

⁹Musa nubwo yahandiikire ebiragiro ebi, yabiha banyakatagara batabani ba Leevi, abaayetwekaga ensanduuko ey'endagaano ya MUKAMA, kandi yabiha n'abakuru boona aba Isirairi.

¹⁰Yabaragira naagamba ati: “Emyaka musanju obu erabaga neehwaho eti, ha kasumi ak'omwaka ogw'okulekera akaatairweho, ha kiro eky'obugenyi obw'ensiisira,

¹¹Abaisirairi boona obu baraijaga omumaiso ga MUKAMA Ruhanga wawe, hakiikaro ekyaliba akomere, obasomerege ebiragiro binu, boona bategere amatu.

¹²Osoroozeege abantu boona: abasaija, abakazi n'abaana, n'abasuuhuuki abanyakwikara omumbuga zawe, nabo nukwo bahurre, kandi beege kutiina MUKAMA Ruhanga wawe; bateho omutima okuhikiriza ebigambo ebinyakuli omubiragiro ebi.

¹³Kandi n'abaana baabo abatabimanyire, nabo nukwo bahurre, kandi beege kutiina MUKAMA Ruhanga wawe, akasumi koona akabalimara omunsi eyorukwija kulya enyakuli obuseeri bwa Yorudaani.”

¹⁴MUKAMA akagambira Musa ati: “Akasumi kawe ak'okufa kairiire haihi; yeta Yoswa, mugende omu Heema ey'okutangatanganiramu, mmuragire eby'omulimo.” Musa na Yoswa bagenda omu Heema.

¹⁵MUKAMA yazooka omu Heema ali omu nyomyo ey'ekicu; enyomyo egi, yayemerra ha mulyango ogw'Eheema.

¹⁶MUKAMA yagambira Musa ati: “Dora oli haihi kufa nka baaswenkuru; obwolimara kufa, abantu banu, nibaija kweta ha by'orwanju, bakuraatire embandwa ezabanyamahanga ab'ensi ezibarukwija kutaahamu, balindugaho, bacwe endagaano ei ndagaine nabo.

¹⁷Kandi ha kiro eki, ndibabiihirirwa muno, ndibarugaho ndeke kubarolerra, bahwerekerre, balihikwaho obubi bwingi n'emihito nyingi, ha kiro eki, nubwo baligamba bati: ‘ekituleetiire obubi bunu bwona, tinukwo MUKAMA habw'okutaba na itwe?’

¹⁸Ha kiro eki, habw'ebibi ebi byona ebibaakozire nibagaruka hali embandwa mananu kwo ndibeesereka.

¹⁹Hati nu, muhandiike ekizina kinu, mukyeegese abantu ba Isirairi boona; okibakwase omumutwe baikale nibakizina kitalibahwa omukanwa, nikyo kibe bwakaiso bwange ha bantu ba Isirairi.

²⁰Habwokuba, obundaamara kubaleeta omunsi enu enyakwijwire amata n'obwoki ei narahiriire kuha baisenkurubo, bakamara kulya bakaiguta, nibaija kuhindukira embandwa nizo baheereze, nyowe bangaye, kandi bacwe endagaano yange.

²¹Kandi obubalimara kuhikwaho obubi n'emihito enyingi, ekizina kinu nubwo buliba bwakaiso oburukubarumiriza (habwokuba tikiri ky'okwebwa, baijukuru baabo tikyabahwege omu kanwa); habwokuba, mmanyire ebi barukutegeka kukora ntakabahikize omunsi ei narahiire kubaha.”

²²Ha kiro eki kyonyini, Musa yahandiika ekizina eki, yakyegesa Abaisirairi.

²³MUKAMA akateererra Yoswa mutabani wa Nuuni ati: “Obe w'amaani kandi ogume, habwokuba, niiwe orukwija kutwara abaana ba Isirairi omunsi ei naraahiire kubaha: ndaikaraga na iwe.”

²⁴Musa obu yamazire kuhandiika omu kitabu ebigambo byona eby'ebiragiro ebi,

²⁵yaragira Abaleevi abaahimbaga esanduuko ey'endagaano ya MUKAMA ati:

²⁶“Ekitabu eky'ebiragiro kinu, mukitwale mukite haihi n'esanduuko ey'endagaano ya MUKAMA Ruhanga wanyu, nikyo kibege bwakaiso obw'okubarumiriza.

²⁷Habwokuba, mmanyire nkooku muli beereme, kandi ngumangani; murole, hati mwemiire MUKAMA, nkyali mwomeezi ndi na inywe; leero obundimara kufa, mulisura ki?

²⁸Munsoroleze bakuru b'enganda zanyu boona, n'abalemi banyu, nukwo mbagambire ebigambo binu, babyehulirre, nyete iguru n'ensi nibyo bibe bwakaiso obw'okubarumiriza.

²⁹Habwokuba mmanyire obundimara kufa, mananukwo mulisiisikara, muruge omumuhanda ogunabaragiire kukwata; kandi omu biro eby'omumaiso, habw'okukora MUKAMA ebi atasiima, mukambiihiza, muliizirwa obubi.”

³⁰Kandi Musa yazina ebigambo eby'ekizina eki yabimarayo, ekitebe kyona ekya Isirairi kihuliriize.