Read Runyoro - rutooro Bir 32 Bible Online

Bir 32 - Runyoro - rutooro bible

Bir 32

¹Tega okutu mbaze, iwe iguru; nsi hurra ebindukugamba.

²Ebigambo byange nibikagwe nk'enjura, orubazo rwange nirukatonye nk'orume, nk'enjura enkenke erukugwa habunyansi obuto, nkobutonyatonya obunyakugwa habinyansi.

³Habwokuba ninyija kuhaisa ibara lya MUKAMA, muteekereze ekitiinisa kya Ruhanga waitu!

⁴Akakora omwandara yaguhikiriza kurungi, ebikorwa bye byona biba by'obwinganiza. Aba Ruhanga omwesigwa atagira kabi, aba mwinganiza kandi w'obulyo.

⁵Abantu bakamusiisira tibakyali baana be, abantu abaikara omububi, kandi abaramaire habw'akamogo kaabo.

⁶Inywe abantu abadoma kandi abatarukwetegereza, ebi nibyo mukorra MUKAMA? Tinuwe isiinywe ayabahangire? Kandi ayabakozire anyakuboomeeza?

⁷Mwijuke ebiro ebya ira, muteekereze emyaka ey'obusinge obwingi, mukaguze baisiinywe babagambire, mukaguze baisiinywe babasubirre.

⁸Anyakuli haiguru muno obuyahaire amahanga obugwetwa bwago, obu yasoroire abaana b'abantu, akateera emitaano y'amahanga, naarorra hamuhendo ogw'abaana ba Ruhanga.

⁹Ngira omugabo gwa MUKAMA nubo abantu be, Yakobbo nubwo bugwetwa bwe obwasoroire.

¹⁰Akamusanga omunsi ey'irungu, mwirungu wadudu erirukugambirwamu enyamaiswa, akamutaho omutima yamulinda, akamurolerra k'emboni ey'eriiso lye.

¹¹Nk'isamba okuliimukya ekiju kyalyo nkooku liharrukira ha bwana bwalyo, nkooku lyanjurra amapapa galyo kubukwata, likabuhimbira omumapapa galyo.

¹²MUKAMA wenka nuwe yamwebembiire, hatabeho embandwa ey'abanyamahanga eyabaire na uwe.

¹³Akamutembya omubiikaro ebikuru eby'omunsi, yalya ebyokulya eby'omubwerre; akamunywisa obwoki obw'omwandara, yamuliisa amagita ag'omwandara ogurukuguma dai.

¹⁴Akamunywisa amata ag'ente n'ag'embuzi akamuliisa ebisajwa eby'entaama ento n'enkuru, eby'ente n'embuzi eza Basani, akamuliisa engano erukukirra kimu oburungi yamunywisa amarwa ag'emizabbibbu.

¹⁵Isirairi abantu bawe banyesere, bayema banyeeta, bametameta; hanyuma barugaho Ruhanga ayabahangire, bagaya omujuni ow'obusobozi.

¹⁶Baakwasa Ruhanga ihali habw'okuramya embandwa ez'abanyamahanga bamubiihiza habw'ebintu ebibi ebibakoraga.

¹⁷Bakatambira ebyonzira emizimu etali ruhanga kwo, baabitambira embandwa ezi bakaba batakamanyahoga, embandwa ezaizire hanyuma, embandwa ez'abaisenkuru inywe batararamize.

¹⁸Okeebwa omwandara ogwakuhaire kubaho, okeebwa Ruhanga ayakuhaire obwomeezi.

¹⁹Eki MUKAMA obuyakirozire yabihirwa, habw'okubiihizibwa batabani be na bahara be, nukwo kubanoba.

²⁰Nikyo kyamugambisize ati: Ninyija kubeecwaho, ndole nkooku baraaba, habwokuba bantu b'obusinge obuukugumira omububi, baana abataine bwesige.

²¹Bakankwasa ihali habw'okuramya ekitali ruhanga baambiihiza habw'okuheereza embandwa. Habweki ndireetera abanyamahanga kubakwatirwa ihali, Ndibabihiza nimbeyetera ihanga eridoma.

²²Habwokuba, nyina ekiniga ekirukwaka nk'omurro, nigwija kwokya buli kintu okuhika Nyabuyonga, guhwerekereze ensi na byona ebinyakugirumu, gwokye emisingi y'ensozi.

²³“Ndibarundaho obubi bwingi ndibamarraho emyambi yange.

²⁴Balihwerekerezibwa enjara, bacwekerezibwe ekibabu ekirukwokya, ndibatwekera enyamaiswa ez'omwirungu ibaseesire, ndibasindikira enjoka ez'obusegu ibateme.

²⁵Aheeru, abaana baabo baliitwa empirima, ab'omunju balimarwaho obutiini, abasigazi n'abaisiki empikiirre, balihwerekerra, abarukwonkya n'abagurusi boona balifeera hamu.

²⁶Naakubaire ngambire nti: ‘Ndibararangya mbatwale hara, nukwo mbeebese abantu boona.’

²⁷Baitu ntaikirize abanyanzigwa baabo kwenyumiza, nibagamba ngu: ‘bakasingura abantu bange, kandi kunu nyowe nyenka, ninyowe nabasingwire.’”

²⁸Habwokuba bali ihanga eritahaburwa, bali bantu abatarukwetegereza.

²⁹Kakuba banyina amagezi eki baakukikengere, baakwetegeriize empero yabo nkooku eriba.

³⁰Omuntu omu yaakubingire ata orukumi, kandi ababiri baakwirukize bata emitwaro ebiri, kakuba MUKAMA Ruhanga wabo atarabarugireho, kakuba Ruhanga wabo ow'obusobozi atarabahoiremu?

³¹Abanyanzigwa baabo nibamanya embandwa nkooku ziri nceke, nkooku zitali z'amaani nka Ruhanga owa Isirairi

³²Habwokuba omuzabbibbu gwabo guruga ha muzabbibbu ogwa Sodomu, noomu misiri eya Gomora, ebijuma byabo by'obusegu, empagara zaabyo niisarra.

³³Amarwa gaabo g'obusegu obw'enjoka, obusegu obubi obw'encwera.

³⁴Ebi byona mbitaire harubaju, biboherwe byayahurwa omumaahuro gange. MUKAMA naamanya abanyanzigwa baabo eki baakozire, ategeriize akasumi akahikire ak'okubafubira.

³⁵Akasumi kaabu ak'okugwa obukalihika, okuhoora enzigu n'okusasura byange, ekiro eky'omuhito gwabo kiri haihi, kandi bali haihi muno okucwerwa omusango.

³⁶MUKAMA alijuna abantu be, kandi alibagirra embabazi, MUKAMA obwalirora bahoire amaani. Hatakyasigaireho munyankomo rundi w'obugabe.

³⁷Obu nubwo alikaguza ati: Hati ziri nkaha embandwa zaabo, omwandara ogu baayebingire,

³⁸abalyaga ebisajwa eby'ebyonzira byabo, abaanywaga amarwa ag'ekihongwa kyabo eky'okunywa? Hati baimuke baije babakonyere, baije babajune!

³⁹Hati nu mumanye, nyowe nyenka, ninyowe Ruhanga, busaho ruhanga ondi okwihaho nyowe, ninyowe nyita kandi ninyowe nyomeeza,

⁴⁰Mazima kwo nkooku ndi Ruhanga omwomeezi, ninyimukya omukono gwange haiguru kandi nindahira nti: mputaaza kandi ntamba busaho noomu asobora kunteeza empaka.

⁴¹“Nditeekera empirima yange etoole, nkole omu bwinganiza. Abanyanzigwa bange ndibahoora enzigu, naabo abanyakunoba ndibafubira.

⁴²Ndirasa, emyambi yange ejube esagama, ndikwata empirima, nyite boona ebanyakunteeza empaka, tindiganyira noomu hali abo abanyakundwanisa; emputa n'abanyagwa boona balifa.

⁴³Inywe amahanga, muhaisanize abantu ba Ruhanga, afubira boona abanyakubaita. Abanyanzigwa be abahoora enzigu, kandi abantu be abaganyira ebibi byabo.

⁴⁴“Musa yaija hamu na Yoswa mutabani wa Nuuni yagamba ebigambo byona eby'ekizina eki, Abaisirairi boona bahuliriize.”

⁴⁵“Obuyamazire kubagambira ebigambo ebi byona,

⁴⁶yayongera yagamba ati: ‘ebigambo byona ebi ndukubagambira kiro kya hati, mubite ha mutima, mubyegese abaana banyu, mwekambe okuhikiriza ebiragiro binu.

⁴⁷Habwokuba, ekintu kinu kikuru muno, hali iwe nubwo bwomeezi bwawe bwonyini, kandi nikyo kirikuhangaaza omunsi eyorukwija kulya obuseeri bwa Yorudaani.’”

⁴⁸Kandi ha kiro eki kyonyini, MUKAMA yagambira Musa ati:

⁴⁹“Temba orusozi Nebo orunyakuli omunsi Abarimu, enyakuroleriire Yeriko, oleebe ensi ei ndukwija kuha Abaisirairi bagirye.

⁵⁰Ofeere harusozi oru, orworukwija kutemba, okurate abaawe nka Arooni mugenzi wawe okuyafeeriire harusozi Hooli, yakurata abe,

⁵¹habwokuba obumukaba muli hamaizi ga Meriba omwirungu erya Zini, okasiisa obwesige hali nyowe, hagati y'Abaisirairi, okanyihamu ekitiinisa omumaiso g'abantu ba Isirairi.

⁵²Ensi ei ndukwija kuha Abaisirairi noija kugirora, baitu torukwija kugitahamu.”