Read Runyoro - rutooro Bir 33 Bible Online

Bir 33 - Runyoro - rutooro bible

Bir 33

¹Musa omuntu wa Ruhanga obu akaba atakafiire, gunu nugwo omugisa oguyasabiire abantu ba Isirairi:

²MUKAMA akaruga Sinayi yamuliikana naayema Seyiri, akangasana naayema harusozi Paraani akaija n'abamalaika omutwaro, ha mukono gwe ogw'obulyo haroho omuro ogurukwaka.

³Mazima kwo akagonza abantu be, kandi aha omugisa abahikiriire be; habweki bakakuhondera, niiwe wabahaburaga

⁴Musa obuyaturagiire ebiragiro, tuli bantu abatungwa b'ekitebe kya Yakobbo.

⁵Bakuru b'abantu obu baayesoroize, enganda za Isirairi zoona zesoroize hamu, MUKAMA nukwo yafookere ati mukama w'abantu be aba Isirairi.

⁶“Rubbeni ounakomere ayomeere aleke kufa, kandi abantu be baleke kukeeha.”

⁷Kandi binu nibyo yabalizeeho Yuda: “Ai MUKAMA, hurra Yuda, ebi arukugamba kandi omugarre omubantu be.” Omurwaniirre kandi omukonyere asingule abanyanzigwa be.

⁸Kandi Leevi akamubazaaho ati: “Tumimu yawe ogihe Levi, kandi Ulimu yawe ogihe omuntu wawe anyakukugonza, ou walengere omukiikaro Maasa ou wayekambiire hamaizi ga Meriba;

⁹ayabalizeeho ise na nyina ati: Tindukubamanya bagenzi be, yayehakana bagenzi be, kandi tiyataho mutima abaana be. Habwokuba bakakwata ekigambo kyawe, kandi baahikiriza endagaano yawe.

¹⁰Nubo balyegesa Yakobbo ebigambo byaawe, nubo balyegesa Isaaka ebiragiro byawe; nubo balikucumikirra obubbani, nubo balita ekihongwa kyona eky'okwokya ha itambiro lyawe.

¹¹Ai MUKAMA, ebintu bye obihe omugisa, oikirize byona ebyarukukora; abanyanzigwa be obahende enyugunyu, osasangule abo boona abanyakumunoba, bataligaruka kwimuka.”

¹²Benyamiini akamubazaaho ati: “Enganzi ya MUKAMA aikara n'obusinge, MUKAMA amulinda ekiro kyona, amwikaza harusozi rwe.”

¹³Yosefu akamugambaho binu: “Ensi ya MUKAMA agihe omugisa, amuhe n'ebisembo ebirungi muno ebya haiguru, n'eby'enyanja ebinyakuli hansi,

¹⁴agihe ebijuma ebirungi muno ebyengiibwe omusana agihe ebijuma ebirungi ebya buli kwezi,

¹⁵agihe ebijuma ebirungi eby'ensozi ezaira, agihe ensozi enyingi muno ezitarukurugaho,

¹⁶agihe ebisembo ebirungi muno eby'omunsi na byona ebigirumu, agihe omugisa gwoogu ayaikaire omukisaka.

¹⁷Yosefu anyina amaani nk'ag'enimi, anyina amahembe nk'ag'embogo. Amahembe ago nugo alibingisa amahanga goona agahikye ha mitaano y'ensi; emitwaro ikumi eya Efuraimu nukwo erukusisa eti, kandi enkumi za Manaase nukwo zirukusisana ziti.”

¹⁸Zebbuluuni akamubazaaho ati: “Zebbuluuni osemererwege obworaabaga noogenda engendo; kandi iwe Isakara, osemererwege oli omu heema zawe.

¹⁹Balyeta abantu baije harusozi rwabo; oku nuho balihongera ebyonzira ebihikire; habwokuba batunga obuguuda oburuga omumayanja, n'ebintu ebinyakuserekerwe omumusenyi.”

²⁰Gaadi akamubazaaho ati: “Ahaisibwe ogu anyakugalihya ensi ya Gaadi, Gaadi abundaara nk'entale, ataagura omukono, asasangura oruhanga rw'omutwe.

²¹Akeekomera ensi erukukirra kimu oburungi, habwokuba oku nuho haayahwirwe omugabo ogw'engabwa, akahikaho bakuru b'abantu, yahikiriza ebiragiro hali Isirairi, n'ebigambo MUKAMA ebi yagambire.”

²²“Daani akamubazaaho ati: Daani kyana ky'entale ekinyakuguruka nikiruga Basani.”

²³Nafutaali akamubazaaho ati: “Iwe Nafutaali ayagiriirwe embabazi kandi MUKAMA ou yahaire emigisa nyingi, tunga enyanja n'obukizi obw'obulyo.”

²⁴Aseri akamugambaho ati: “Aseri aheebwe omugisa okukira enganda ezindi; abege nganzi hali bagenzi be, ensi ye ebemuga amagita maingi.

²⁵Ebihongozo byawe bibege by'ebyoma n'omulinga, oikalege oli w'amaani obwomeezi bwawe bwona.

²⁶Iwe Yesuruni, busaho ruhanga noomu arukusisana Ruhanga wawe, Anyakuraba omu mwanya akagucwanganiza kwija kukonyera anyakuraba omu mwanya, omu kitiinisa kye

²⁷Ruhanga atahwaho nuwe bwikaro bwawe, nuwe akwatiriire okuzimu n'emikono ye abinga abanyanzigwa abakwiha omumaiso, akuragira ati: Bahwerekereze.

²⁸Habweki, Isirairi akaikara omu businge, oruzaarorwa Yakobbo rwonka nurwo rwaikaire omunsi ey'ebyokulya n'amarwa; hali, iguru linaga orume.

²⁹Isirairi, k'ohiiriirwe! N'oha arukusisana iwe, ihanga eryajunirwe MUKAMA? Nuwe ngabu yawe, ey'okukukonyera nuwe mpirima yaawe ey'obusinguzi! Abanyanzigwa bawe baliija nibakwebundaliza, baitu iwe olibarubaatirra.”