Read Runyoro - rutooro Bir 4 Bible Online

Bir 4 - Runyoro - rutooro bible

Bir 4

¹Musa nubwo yagambiire Abaisirairi ati: Inywe Abaisirairi mute omutima ha biragiro na ha bigambo ebi ndukubeegesa kandi mubihikirize; nubwo mulyomeera, mugende mulye ensi, MUKAMA Ruhanga owa baisenkuru inywe ei arukwija kubaha.

²Ekigambo eki ndukubaragira, mutalikyongeraho, kandi mutalikikeehya; nukwo musobole kukwata ebiragiro bya MUKAMA Ruhanga wanyu ebi ndukubaragira.

³Mukeerorra n'agaanyu, MUKAMA eki yakozire omukiikaro Bbali-Peyora; MUKAMA Ruhanga wanyu, omuli inywe, abantu boona abaaramize embandwa eya Peyora, akabahwerekereza.

⁴Baitu inywe abaamugumiireho, okuhika na hati, mukyaroho.

⁵Nkabeegesa ebiragiro n'ebigambo MUKAMA Ruhanga wanyu nkooku yandagiire, nukwo mubikwate omunsi ei murukwija kulya.

⁶Mubikwate kandi mukole ebibirukuragira; eki nikyo kiryoleka abantu obwetegereza n'amagezi ganyu. Obu balihurra ebiragiro binu byona, baligamba bati: “Kandi mananukwo, ihanga linu erikooto liina obwetegereza n'amagezi.”

⁷Ihanga ki erikooto erinyakwine ruhanga anyakuliikara haihi nka Ruhanga waitu oku atwikara haihi, buli kasumi koona aka tumweteramu?

⁸Kandi ihanga ki erikooto erinyakwine ebiragiro n'ebigambo eby'obwinganiza buti nk'ebiragiro binu byona ebi ndukubooleka hati?

⁹“Kyonka oteho omutima, olinde kurungi omwoyo gwawe, otaliikara kwebwa ebintu ebi warozire, okabyeberwa kimu obwomeezi bwawe bwona; obimanyise abaana bawe n'abaijukuru bawe.

¹⁰Kiro kiri, nkooku wayemeriire omumaiso ga MUKAMA Ruhanga wawe harusozi Holebbu, nkooku yandagiire ati: ‘Sorooza abantu obaleete nambere ndi, mbagambire ebi ndukwenda, nukwo beege kuntiina, ebiro byona ebi balimara omunsi, kandi beegese n'abaana baabo kuntiina.’

¹¹Orusozi obu rukaba nirwaka omurro ogwahikiraga kimu haiguru, ruswekeriirwe omwirima, ekiho n'ekibunda, mukairra haihi, mwayemerra hansi yarwo.

¹²Nubwo MUKAMA yababaliza naayema omu murro; mukamuhurra ebigambo ebyarukugamba, baitu mutabone nsisana y'arukugamba naabaza kandi mutamubone; iraka lyonka niryo mwahuliire.

¹³Akabamanyisa endagaano ye, yabaragira kugihikiriza, endagaano egi, nibyo ebiragiro ikumi; akabihandiika ha byasi by'amabaale.

¹⁴Omu kasumi ako, nubwo yandagiire kubeegesa ebiragiro n'ebigambo, ebi mukaba muli b'okukwatira omunsi ei mukaba nimwija kulya.

¹⁵“Habweki mwerinde; Habwokuba ha kiro kiri MUKAMA eki yabaliizeeho na inywe harusozi Holebbu, naayema omumurro hagati mutagire kisisani eki mwarozire.

¹⁶Mwerinde mutaliikara kusobya mukeebaizira ekisisani ekya buli mulingo, ekirukusisana omusaija rundi omukazi,

¹⁷ekirukusisana ebisoro byona eby'omunsi, ekirukusisana ebinyonyi byona ebinyakwina amapapa ebinyakuhurruka omu mwanya,

¹⁸ekirukusisana ekintu kyona ekinyakwekururra ha itaka, ekirukusisana encu yoona enyakuli omumaizi hansi y'itaka.

¹⁹Mwerinde mutaliikara kuraramira haiguru okurora izooba, okwezi n'enyunyuuzi ebintu ebingi eby'omwiguru mukatwalirizibwa kubiinamira n'okubiramya, ebintu ebi, MUKAMA Ruhanga wanyu ebi yahangire kukonyera amahanga goona aganyakuli hansi y'iguru.

²⁰Baitu inywe akabakoma yabaiha omukikoomi eky'omurro ogw'ekyoma omunsi Misiri, yabeereetera mube bantu be habwe nkooku muli okuhika na hati.

²¹Kandi ekindi, MUKAMA akambiihirirwa habwanyu, nukwo kurahira, nyowe nkooku ntalyambuka Yorudaani, kandi nkooku ntalitaaha omunsi enungi eri, MUKAMA Ruhanga wanyu ei ali haihi kubaha bube bugwetwa bwanyu.

²²Nyowe, ndi w'okufeera omunsi enu, Yorudaani tindukwija kukyambuka; baitu inywe, nimwija kwambuka, mugende mulye ensi enungi eri.

²³Mwerinde, mutaliikara kwebwa endagaano ya MUKAMA Ruhanga wanyu, ei yaragaine na inywe, mukeebaizira ekisisani ekya buli mulingo, MUKAMA Ruhanga wanyu eki yabatangire.

²⁴Habwokuba MUKAMA Ruhanga wanyu aba murro kahwerekereza, aba Ruhanga ow'ihali.

²⁵“Noobu mulizaara abaana, mukatunga abaijukuru, mukagurusira rundi mukakaikurra omunsi egi, obu mulibihwabihwa mukeebaizira ekisisani ekiina ekintu eki kirukusisana, mukakora ekintu ekinyakubiihiza MUKAMA mukamukwasa ekiniga,

²⁶ha kiro eki, ndyeta iguru n'ensi bibasingise omusango, muhwerekererre kimu bwango, muruge omunsi ei murukwambuka kulya obuseeri bwa Yorudaani; timuligihangaaramu, baitu mulihwerekererra kimu kandi mulihwerekerra bwango.

²⁷MUKAMA alibararaangya omu mahanga, omu mahanga ago MUKAMA agaliba abararangiizeemu, mulisigara bake.

²⁸Oku nuho muliramiza embandwa ez'emiti n'amabaale, ezinyakukozirwe emikono y'abantu, ezitarukurora, ezitarukuhurra, ezitarukulya kandi ezitarukukaga.

²⁹Baitu oku, nuho, mulyema, muserre MUKAMA Ruhanga wanyu, kandi obu mulimuseruza omutima gwanyu n'omwoyo gwanyu gwona mulimuzoora.

³⁰Omu biro eby'omumaiso, obumuliba omu muhito, kandi ebintu ebi byona obubiribahikaho, mugaruke hali MUKAMA Ruhanga wanyu, mukole eki arukubaragira,

³¹habwokuba MUKAMA Ruhanga wanyu, aba munyambabazi; talibahemukira rundi kubahwerekereza, rundi kwebwa endagaano ei yaragaine n'abaisenkuru inywe, yataho n'ekirahiro.

³²“Hati mukaguze ha biro ebyahingwire, ebyabaireho inywe mutakabaireho, okuruga ha kiro MUKAMA eki yahangiireho omuntu omunsi, mukaguze okuruga ha mpero emu ey'iguru okuhika hali endi, ekintu ekikuru nka kinu kirabaireho rundi kiraahuliirweho?

³³Harabaireho abantu abaahuliire Ruhanga naabaliza omumurro hagati, inywe nkooku mwamuhuliire, kandi bakoomera?

³⁴Rundi harabaireho Ruhanga, ayalengereho kugenda kwereetera ihanga akaliihaho ihanga erindi, naalirenga, kandi naakora ebintu eby'amahano kandi ebihuniriza, naaleeta obulemu, naayoleka obusobozi, naatiinisa muno, naakora ebi byona, MUKAMA Ruhanga wanyu ebi yabakoliire omunsi Misiri nimurora n'amaiso ganyu?

³⁵Eki akakibooleka nukwo mumanye MUKAMA nkooku ali Ruhanga; busaho Ruhanga ondi okwihaho uwe wenka.

³⁶Akabahuliza iraka lye naayema omwiguru nukwo abegese, kandi omunsi akabooleka omurro gwe ogw'amaani, mwahurra ebigambo bye, nibiruga omumurro ogu hagati.

³⁷Kandi habwokuba akagonza baisenkuru inywe, kandi yakoma baijukuru baabo, bbo batakyaroho, nikyo yakomiire inywe, yabaiha omunsi Misiri, yabaleesa obusobozi bwe.

³⁸Yagenda naabinga amahanga amakooto kandi ag'obusobozi okukira inywe agakaba gabali omumaiso, nukwo abataahyemu, abahe ensi yabo, bube bugwetwa bwanyu, nkooku bukyali, okuhika na hati.

³⁹Habweki, kiro kya hati mumanye, kandi eki ndukubagambira mukite ha mutima, MUKAMA nkooku aba Ruhanga omwiguru eriri haiguru, n'omunsi eya hansi n'omunsi okuzimu, tiharoho Ruhanga ondi.

⁴⁰Habweki mukwatege ebiragiro bye n'ebigambo bye ebi ndukukugambira kiro kya hati; byona nukwo bibagendere kurungi, kandi bigendere kurungi n'abaana banyu inywe mutakyaroho, muhangaale omunsi MUKAMA Ruhanga wanyu ei arukwija kubaha, ebe yanyu ebiro byona.”

⁴¹Musa nubwo yakomere embuga isatu Buturukaizooba, obuseeri bwa Yorudaani,

⁴²nizo isingirwemuga omwisi w'abantu, ow'araitaga mutaahi we atagenderiire, ow'atarabaire na bunyanzigwa, omu kasumi akaahingwire, omuntu ogu, obu araasingirwaga omu rumu ha mbuga ezi, nukwo asobole kukiza obwomeezi bwe.

⁴³Embuga ezi nizo zinu: Bezeri, orunyakuli omwirungu omunsi ey'ekyeya, oru nurwo rw'ab'oruganda rwa Rubbeni, Ramosi orunyakuli Giryadi, rw'ab'oruganda rwa Gaadi, na Gorani orunyakuli Basani, oru rw'ab'oruganda rwa Manaase.

⁴⁴Kinu nikyo ekiragiro Musa eki yateerireho abaana ba Isirairi;

⁴⁵abaana ba Isirairi obubakaba nibaruga Misiri, binu nibyo ebiragiro, ebigambo Musa ebi yabagambiire.

⁴⁶Akabibagambirra obuseeri bwa Yorudaani omu kihanga ekinyakuroleriire Beesipeyora omunsi ya Sihooni omukama w'Abamooli, ayaikaraga Hesibboni, ayasingwirwe Musa n'abaana ba Isirairi, nibaruga Misiri.

⁴⁷Baalya ensi ye neeya Ogi omukama wa Basani, abakama ababiri ab'Abamooli abaikaraga harubaju orwa Burugaizooba, obuseeri bwa Yorudaani;

⁴⁸okurugirra Aroheri enyakuli ha mutaano ogw'ekihanga eky'Arumooni, okuhikira kimu harusozi Siryoni (nurwo Herumooni),

⁴⁹oteho na Araba yoona enyakuli ha bukiizi obwa Burugaizooba bwa Yorudaani, okuhikira kimu ha nyanja eya Araba bweculiko bwa Pisiga.