Read Runyoro - rutooro Bir 5 Bible Online

Bir 5 - Runyoro - rutooro bible

Bir 5

¹Musa akeeta Abaisirairi boona yabagambira ati: “Inywena Abaisirairi, muhunde amatu, muhurre ebiragiro n'ebigambo ebi ndukubagambira kiro kya hati, mubyetegereze, kandi muteho omutima kubihikiriza.

²Obu tukaba tuli harusozi Holebbu, MUKAMA Ruhanga waitu akakora na itwe endagaano.

³Endagaano egi atagikole na baisenkuruitwe bonka, baitu akagikora na itwe itwena abanyakuroho hati.

⁴Ha rusozi oru, akabaza na inywe nimurorangana amaiso n'amaiso, naayema omu murro hagati,

⁵omu kasumi ako, nyowe nkaba ndi hagati ya MUKAMA na inywe, mbasoborre eki akaba naagamba, habwokuba mukaba nimutiina omurro, mutarukusobora kutemba harusozi. Akagamba ati:

⁶“Ninyowe MUKAMA Ruhanga wawe ayakwihire omunsi Misiri nambere okaba otungirwe oli mwiru okaba otunyiirwe.

⁷“Otaliramya ruhanga ondi weena oihire nyowe.

⁸“Otalyebaizira ekisisani eky'ekintu ekindi kyona ekinyakuli omwiguru erinyakuli haiguru, rundi ekinyakuli omunsi, rundi ekinyakuli omumaizi hansi y'itaka.

⁹Otalibiinamira kandi otalibiramya; habwokuba nyowe MUKAMA Ruhanga wawe, mba Ruhanga ow'ihali, anyakufubira abaana nimbatura emisango eya baise bo, okugarukira habwijukuru obw'enyakasatu n'obw'enyakana abanyakuunnoba;

¹⁰baitu abo abanyakungonza bakakwata ebiragiro byange, mmbagonza muno.

¹¹“Otalirahirra busa ibara lya MUKAMA Ruhanga wawe: habwokuba MUKAMA Ruhanga wawe, afubira wena anyakurahirra busa ibara lye.

¹²“Olindege ekiro kya Sabbato kandi, okyezege, MUKAMA Ruhanga wawe nkooku yakuragiire.

¹³Omu biro mukaaga, otalibanege okolege emirimo yawe yoona,

¹⁴baitu ekiro ekya musanju, kiba kiro kya MUKAMA Ruhanga wawe otalikisura okakikorraho omulimo, iwe rundi mutabani wawe, rundi muhara wawe, omwiru wawe rundi omuzaana wawe, enimi yawe rundi endogoyi yawe, rundi ezimu ha nte zawe, rundi omunyaihanga owa ikara na iwe, omwiru n'omuzaana wawe, inywena muhuumulege.

¹⁵Oijukege nkooku okaba oli mwiru omunsi Misiri, MUKAMA Ruhanga wawe nuwe yakwihireyo, yakwihisaayo obusobozi n'amaani; nikyo yakuragiriire kusemezaaga ekiro kya Sabbato.

¹⁶“Sso na nyoko obatemuga ekitiinisa, MUKAMA Ruhanga wawe nkooku yakuragiire; nukwo ohangaale, obe kurungi omunsi ei arukwija kukuha.

¹⁷“Otaliita.

¹⁸“Otalisiihana.

¹⁹“Otaliiba.

²⁰“Otalihangirra omuntu weena.

²¹“‘Otalyegomba omukazi w'omuntu ondi kandi otalyegomba enju ye, omusiri gwe, omwiru we rundi omuzaana we, ente ye rundi enkaina ye, rundi ekintu kye ekindi kyona.’

²²“Ebiragiro ebi, MUKAMA akabibabaliza inywena, mwesoroliize harusozi, akabibabaliza n'iraka erirukuhulirwa naayema omu murro omu kicu, noomu mwirima kasira; hali ebi, atagire ekiyayongiireho. Akabihandiika ha bibbali ebibiri eby'amabaale, nukwo yabimpa.

²³“Obu mwahuliire iraka erirukuruga omu mwirima, kunu orusozi nirwaka omurro, mwanyirra haihi, bakuru b'enganda zanyu boona, n'abeebembezi banyu;

²⁴mwagamba muti: ‘Murole, MUKAMA Ruhanga waitu atwolekere ekitiinisa kye n'obukuru bwe, tumuhuliire naabaliza omu murro; kiro kinu, tuboine Ruhanga naabaza n'omuntu, kandi omuntu ogu yagaruka yayomeera.

²⁵Hati kituhikiriire kweta omu kabi k'okufa? Obu turagaruka kuhurra iraka lya MUKAMA Ruhanga waitu, omurro ogu ogw'amaani nigwija kutuhwerekereza, itwena nitwija kufa.

²⁶Omubantu boona, nooha ayali ahuliire Ruhanga omwomeezi naabaliza omu murro hagati nkooku itwe tumuhuliire, omuntu ogu akagaruka akoomeera?

²⁷Iwe genda oirre haihi, ohurre byona MUKAMA Ruhanga waitu ebi araagamba, oraatugambira byona ebi araaba akugambiire, nitwija kubikiriza kandi tubikole.’

²⁸“Obu mukaba nimungambira ebigambo ebi, MUKAMA akabahurra yangambira ati: Mpuliire ebigambo abantu bawe ebibarukugamba, byona ebibakugambiire; ebibagambire bihikire.

²⁹Kakuba baihiriire hali eki, bakaikara n'ekitekerezo nk'eki, butoosa bakantiinaga kandi bakakwata ebiragiro byange, baakubaire kurungi omunsi, hamu n'abaana baabo ebiro byona.

³⁰Genda obagambire oti: ‘Mugaruke omu Heema zanyu.’”

³¹Baitu iwe, banza onyemerre haihi hanu, nkugambire ebiragiro n'ebigambo ebi oraabeegesa; nukwo babihikirize omu nsi ei ndukwija kubaha bagirye.

³²Habweki, muteho omutima okukora kyona MUKAMA Ruhanga wanyu eki abaragiire; mutalicwa ebimu ha biragiro bye kukora ekindi.

³³Mubikwatire kimu byona nkooku aboolekere, nukwo mwomeere, mube kurungi, muhangaale omunsi ei murukwija kulya.