Read Runyoro - rutooro Bir 6 Bible Online

Bir 6 - Runyoro - rutooro bible

Bir 6

¹“Binu nibyo biragiro, kandi nibyo ebigambo, MUKAMA Ruhanga wanyu ebi yandagiire kubeegesa, nukwo mubihondere omunsi ei murukwambuka kulya;

²nibigamba biti: otemuga ekitinisa MUKAMA Ruhanga wawe, iwe na mutabani wawe na mwijukuru wawe, obu mulikwata ebiragiro bye n'ebigambo bye binu byona ebi ndukubaragira, obwomeezi bwanyu bwona, nubwo mulihangaara.

³Muhunde amatu, inywe Abaisirairi, kandi muteho omutima kubikwata nukwo mutunge omugisa, mukanye muno omunsi ijwire erukugera amata n'obwoki, MUKAMA Ruhanga wa baisenkuru inywe nkooku yabanihiize.

⁴“Muhunde amatu inywe Abaisirairi; MUKAMA Ruhanga waitu nuwe MUKAMA wenka,

⁵mumugonzeege n'omutima gwanyu gwona, n'omwoyo gwanyu gwona, n'amaani ganyu goona.

⁶“Ebigambo binu ebi ndukubaragira, mubiikazeege ha mutima,

⁷kandi mubyegeseege muno abaana banyu, obu muraabaga mwikaliire omumaju ganyu, obu muraabaga nimugenda omu muhanda, obu muraabaga mubyamire, n'obu muraabaga nimwimuka, mubibazeehoga.

⁸Mubyebohege hamukono bibaikaleho nk'akarorwaho, kandi bibege habuso hagati y'amaiso ganyu.

⁹Mubihandiikege hamikumirro ey'enyigi ez'amaju ganyu, na hamalembo ganyu.

¹⁰“MUKAMA Ruhanga wanyu, obu alibahikya omunsi ei yarahiire baisenkuru inywe Abburahamu, Isaaka na Yakobbo ngu aligibaha, ensi enyakurumu embuga enkooto kandi enungi ezi mutarayombekere,

¹¹n'amaju aganyakwijwiire ebintu byona ebirungi ebi mutaratairemu, n'amaziba agamutaralimire, emisiri ey'emizaabbibbu n'emiti eya oliva ei mutarabyaire, obumulirya mukaiguta,

¹²obu, mwerinde, mutaliikara kwebwa MUKAMA ayabaihire omunsi Misiri, nambere mukaba mutungirwe muli bairu.

¹³Mutemuga MUKAMA Ruhanga wanyu ekitiinisa, mumuheerezeege, kandi murahirege ibara lye.

¹⁴Mutaliramya embandwa zoona noobu hakubaire eza mahanga aga muherraine nago,

¹⁵habwokuba MUKAMA Ruhanga anyakuli hagati yanyu, aba Ruhanga ow'ihali; ataliikara kubakwatirwa muno ekiniga, akabahwerekereza akabamara omunsi.

¹⁶“Mutalikisura kulenga MUKAMA Ruhanga wanyu nkooku mwamulengere omunsi Maasa.

¹⁷Mwekambirege kukwata ebiragiro bye, n'ebigambo bye ebi yabaragiire.

¹⁸Mukolege ebihikire, kandi, MUKAMA ebi asiima nukwo mutunge omugisa, mugende mulye ensi enungi ei yarahiire kuha baisenkuru inywe,

¹⁹naabanza kubingamu abanyanzigwa banyu boona nkooku yakinihiize.

²⁰“Omu biro eby'omumaiso, abaana banyu obu balibakaguza bati: ‘Ebiragiro n'ebigambo ebi, MUKAMA Ruhanga waitu yabaragiire, biina makuru ki?’

²¹Mubagarukemu muti: ‘Tukaba tuli bairu ba Faraaho omunsi Misiri; MUKAMA yatwihisaayo obusobozi bwe obw'amaani;

²²akatukorra ebintu eby'amahano n'ebihuniriza, eby'amaani kandi ebitiinisa, naarwanisa Misiri, Faraaho neeka ye yoona.

²³Akatwiha kuli, nukwo atuleete hanu, atuhe ensi ei yarahiire okuha baisenkuruitwe.

²⁴Akaturagira okukwata ebiragiro bye byona, n'okutamuga MUKAMA Ruhanga waitu ekitiinisa, eki obutoosa nikyo kiraaturugiramuga oburungi, nukwo atwikaze tuli bomeezi nkooku tuli hati.

²⁵Obutulitaho omutima okukwata ebiragiro binu byona, MUKAMA nkooku yaturagiire, eki kiritufoora bahikiriire.’