Read Runyoro - rutooro Bir 7 Bible Online

Bir 7 - Runyoro - rutooro bible

Bir 7

¹“MUKAMA Ruhanga wanyu obu alibahikya omunsi ei murukwija kutaahamu mugirye, akabinga amahanga amaingi: Abahiiti, Abagirigaasi, Abamooli, Abakanaani, Abaperezi, Abahiivi n'Abayebusi, amahanga musanju agarukubakira amaani n'obusobozi,

²akagabata omungaro mukagasingura, mubahwerekereze, mutalikora nabo ndagaano, kandi mutalibagirra embabazi.

³Mutaliswerrana nabo, kusweza bahara banyu batabani baabo, rundi kuswererra batabani banyu bahara baabo,

⁴habwokuba balitanga abaana banyu kunkuraatira, nibaheereza embandwa, ekirirugamu MUKAMA alibakwatirwa ekiniga abahwerekereze bwango.

⁵Baitu binu nibyo mubakole: Museese amatambiro gaabo, mutemateme enyomyo zaabo mucebacebe Asera embandwa yabo, ebisisani byabo ebinyakubaizirwe mubyokye.

⁶“Habwokuba inywe muli ihanga erirukwera erya MUKAMA Ruhanga; akabeekomera mube ihanga lye habwe, eryasoroirwe omumahanga agandi aganyakuli omunsi.

⁷Atabagonze, kandi atabakome, habwokuba ninywe mwabaire baingi okukira abantu ab'amahanga agandi, eki tikiri nikyo yasigikiireho kubagonza n'okubakoma, ninywe mwakiraga obuke omumahanga goona;

⁸baitu ekyamubakomeseze, nukwo kubagonza, kandi akagonza kuhikiriza endagaano ei yaragaine na baisenkuru inywe, nikyo yabaleetiire n'obusobozi bwingi, yabajuna obwiru, yabaiha omu busobozi bwa Faraaho omukama wa Misiri.

⁹Habweki, mwetegereze MUKAMA Ruhanga wanyu, nkooku nuwe ali Ruhanga wenka, Ruhanga omwesigwa, omutacwa ndagaano, kandi ow'engonzi ezitayuga, anyakugonza muno abo abanyakumugonza, kandi abanyakukwata ebiragiro bye, okuhika ha bwijukuru obw'orukumi.

¹⁰Kandi abo abanyakumunoba, abasasura empeera enyakubasemeriire, nibarora bati, nukwo kubahwerekereza; ogu anyakumunoba, talimwikazaaho, alimusasura empeera enyakumuhikiriire, naarora ati.

¹¹Habweki, muteho omutima okukwata ebiragiro, n'ebigambo ebi ndukubaragira kiro kinu.

¹²“Obu mulihurra ebiragiro binu mukabikwata, obu, MUKAMA Ruhanga wanyu nubwo alihikiriza hali inywe endagaano. Kandi nubwo aliikara n'engonzi ezitayuga, nkooku yaraganiize baisenkuru inywe;

¹³alibagonza, alibaha omugisa, kandi alibakanyisa; kandi aliha omugisa n'abaana banyu ebirimwa byanyu, engano yanyu, amaarwa ganyu, n'amagita ganyu, alikanyisa ente zanyu, ebyana eby'amagana ganyu, omunsi ei yaraganiize baisenkuru inywe ngu aligibaha.

¹⁴Muliheebwa omugisa okukira amahanga goona; omuli inywe tihalizookamu ngumba; omusaija rundi omukazi, n'omu nte zanyu.

¹⁵MUKAMA araabalindaga oburwaire bwona; ha ndwara embi ziri eza Misiri ezi mumanyire, timulihikwaho ndwara n'emu, endwara ezi zoona alizireetera abanyakubanoba.

¹⁶Abantu boona MUKAMA aba yabataire omungaro mubahwerekereze, mutalibagirra embabazi. Kandi mutalikisura mukaheereza embandwa zaabo, eki hali inywe guliba mutego.

¹⁷“‘Obu muraateekerezaaga muti, amahanga ganu ka gatuhinguraine, turaagabiinga tuta?’

¹⁸Mutaligatiina, mwijukege MUKAMA Ruhanga wanyu eki yakozire Faraaho, na Misiri yoona,

¹⁹emihito etagambwa eyababoneseze, ei mwarozire n'amaiso ganyu, ebyamahano, ebirukuhuniriza, obusobozi n'amaani ebi yabaleeseze; amahanga ago goona aga murukutiina, nago, nukwo aligakora ati.

²⁰Kandi ekindi, MUKAMA Ruhanga wanyu aligasindikamu enwa, okuhika abo abaliba basigaireho bakabeesereka, obu balihwerekerra.

²¹Mutalibatiina, habwokuba MUKAMA Ruhanga waitu ali hagati yanyu, Ruhanga omukuru kandi anyakutiinisa.

²²Amahanga ago aligababingira mpora mpora, timuligamaraho bwango, enyamaiswa ez'omu kisaka zitaliikara kubahingurana obwingi.

²³Baitu MUKAMA Ruhanga wawe aligakuta omungaro, agaburanganize okuhika obu galihwerekerra.

²⁴Bakama baago nabo alibakuta omungaro, olihwerekereza ibara lyabo lihweerre kimu hansi y'iguru; tihalibaho noomu alisobora kukwendereza, olibamaraho boona.

²⁵Ebisisani ebisarwiirwe eby'embandwa zaabo, obicumike omurro; otalyegomba efeeza n'ezaabbu enyakubiroho, rundi kugitwara kugyetungira, etaliikara kukufookera mutego, habwokuba MUKAMA Ruhanga wawe, eki akinuga.

²⁶Mutalitaahya ekintu ekinugwa omu maju ganyu, obu mulikikora, na inywe mulikyenwa nka kyo; mukinoberege kimu, mukinugirege kimu; habwokuba kikakyenwa.