Read Runyoro - rutooro Bir 8 Bible Online

Bir 8 - Runyoro - rutooro bible

Bir 8

¹“Ebiragiro byona ebi nabaragira kiro kinu, muteho omutima kubikwata, nukwo mwomeere, mukanye, mugende mulye ensi MUKAMA ei yarahiire kuha baisenkuru inywe.

²Mwijukege orugendo rwona MUKAMA Ruhanga wanyu oru yabeebembiire emyaaka makumi ana enu yabarabya omwirungu, nukwo ababundaaze, abalenge, amanye eki mukaba mutegekere, rundi kukwata ebiragiro bye, rundi kutabikwata.

³Akababundaaza yabarumya enjara kandi yabaliisa maanu ei mukaba mutamanyire, kandi na baisenkuru inywe ei bataramanyire; nukwo abeegese omuntu nkooku atayomeezibwa byokulya byonka, baitu ayomeezibwa kyona MUKAMA eki agamba.

⁴Omu myaka enu amakumi ana, ebyokujwara byanyu mutabikuze, kandi mutazimbe maguru.

⁵Hati mumanye, omuntu nkooku ahana omwana we, MUKAMA Ruhanga wanyu na uwe, na inywe nukwo abahana.

⁶Habweki, mukwatege ebiragiro bya MUKAMA Ruhanga wanyu nimukora ebi agonza, kandi nimumutamu ekitiinisa.

⁷Habwokuba naija kubataahya omunsi enungi enyakurumu obusaaru, ensoro n'emigera, ebirukuseesa omubihanga n'omunsozi;

⁸enyakurumu engano na sairi, ey'emizabbibbu, emitini, n'enkomamahanga, ey'emiti emizabbibbu n'obwoki.

⁹Ensi ei muliriiramu ebyokulya bikalema kukeeha, ei mutalibulirwamu kantu na kamu, ensi ey'amabaale agarugwamu ebyoma n'ensozi ezi musobora kuhaigamu omulinga.

¹⁰Mulirya mwigute, musiime MUKAMA Ruhanga wanyu habw'ensi enungi ei abahaire.

¹¹“Muteho omutima, mutaliija kwebwa MUKAMA wanyu, mukanga kukwata ebiragiro bye, n'ebigambo bye, ebi ndukubaragira kiro kinu.

¹²Obu mulimara kulya mukaiguta, mukoombeka amaju amarungi, mukagaraaramu,

¹³amagana ganyu ag'ente n'ag'embuzi obugalikanya, mukeeyongera kutunga efeeza n'ezaabbu, ekintu kyanyu kyona kikagenda nikikanya.

¹⁴Obu, mutaliikara kwekuza, mukeebwa MUKAMA Ruhanga wanyu ayabaihire omunsi Misiri, nambere mukaba mutungirwe muli bairu.

¹⁵Ayabeebembiire, yabarabya omwirungu erikooto kandi erirukutiinisa, erinyakurumu enjoka ez'obusegu, enge n'itaka eryoomere, nambere hatali maizi, ayabaihiire amaizi omumwandara ogurukuguma dai, nk'ekyoma.

¹⁶Ayabaliisize omu irungu yabaha maanu baisenkuru inywe ei bakaba batakamanyahoga nukwo ababundaaze kandi abalenge, hanyuma nukwo abakorre ebirungi.

¹⁷Mwerinde, mutaliikara kuteekereeza muti: obusobozi bwange n'amaani gange nibyo byantungisize binu byona.”

¹⁸Mwijukege MUKAMA Ruhanga wanyu, nuwe abasoboza kutunga, nukwo agumye endagaano, ei yarahiire baisenkuru inywe.

¹⁹Baitu obu mulikisura mukeebwa MUKAMA Ruhanga wanyu, mukakuraatira embandwa mukazihereza kandi mukaziramya, nimbananura kiro kya hati, mulihwerekerra.

²⁰Nk'amahanga gali agamwarwanisaga MUKAMA aga yahwerekeriize, na inywe nukwo murukwija kuhwerekerra, habwokuba mukanga kuhurra MUKAMA Ruhanga wanyu.