Read Runyoro - rutooro Bir 9 Bible Online

Bir 9 - Runyoro - rutooro bible

Bir 9

¹“Muhunde amatu inywe Abaisirairi, kiro kya hati nimwija kwambuka ekisaaru Yorudaani, mugende mutunge amahanga agarukubakira amaani n'obusobozi, mutunge embuga enkooto kandi ezinyakuzitiriirwe ebisiika ebiraihire okuhika

²haiguru. Ihanga ery'abantu abahango kandi abaraihire, nubo batabani ba Anaki abamurukumanya kandi abamwahuliire nibagambwaho ngu: ‘nooha asobora kuhakaniza batabani ba Anaki?’

³Habweki, kiro kinu, mumanye ogu anyakubeebembera, arukusisana omurro, kahwerekereza nuwe MUKAMA Ruhanga wanyu; naija kubasingura abahwerekereze, inywe mutakahikireyo, habweki, nimwija kubabinga mubahwerekereze bwango, MUKAMA nkooku yabanihize.

⁴“MUKAMA Ruhanga wanyu obu araamara kubabinga mutakahikireyo muteehaahira ngu habwokuba muli bahikiriire, MUKAMA nikyo atuleetiire kulya ensi enu, kandi kunu ekimubaleeseze, nubwo obubi bw'amahanga ago agaarukubinga.

⁵Mutagira ngu ekirukwija kubaliisa ensi enu, nubwo obuhikiriire bwanyu rundi oburungi obw'emitima yanyu; baitu nimwija kugirya habw'obubi bw'amahanga ganu, MUKAMA Ruhanga wanyu agaarukwija kubinga, mutakahikireyo, nukwo agumye eki yarahiire baisenkuru inywe: Abburahamu, Isaaka na Yakobbo.

⁶“Habweki, mumanye MUKAMA Ruhanga wanyu, ekyarukubaheera ensi enu enungi, kugirya, tibuli buhikiriire bwanyu, habwokuba muli ihanga eryereme.

⁷Mwijuke, muleke kwebwa nkooku mwabiihiize MUKAMA Ruhanga wanyu muli omu irungu, okuruga ha kiro eki mwarugiire omunsi Misiri, okuhika obu mwahikiire omukiikaro kinu, mutaaha nimweremera MUKAMA.

⁸Nobwakubaire harusozi Holebbu, mukamubiihiza, akababiihirirwa muno, yayenda n'okubahwerekereza.

⁹Obu natembere harusozi kwihayo ebyasi by'amabaale ebikaba biroho endagaano MUKAMA ei yaragaine na inywe, nkamara ebiro makumi ana n'emisana makumi ana, ntarukulya, kandi ntarukunywa kantu.

¹⁰MUKAMA yampa ebyasi by'amabaale bibiri ebinyakuhandikirwe n'orukumo rwa Ruhanga; ebyasi by'amabaale ebi, bikaba biroho ebigambo byona MUKAMA ebi akaba abagambiire omu irungu, naayema omu murro ha kiro ekimwayesorooliizeeho.

¹¹Ebiro makumi ana n'emisana makumi ana obu byahoire, MUKAMA Ruhanga yampa ebyasi by'amabaale bibiri ebikaba bihandiikirweho endagaano.

¹²Nubwo yangambiire ati: ‘Ruga hanu osirimuke bwango, habwokuba abantu bawe aba waihire Misiri, basiisikaire bakoora ekibi, omuhanda ogunaboolekere bagurugiremu bwango, baagize ebintu, baayekorra ekisisani.’

¹³“MUKAMA nukwo kungambira ati: ‘Abantu banu mbeetegeriize, bantu ntahurra;

¹⁴otangambaho, leka mbahwerekereze ndagalize kimu ibara lyabo litagaruka kwijukwa hansi y'iguru, baitu iwe, ndikwihamu ihanga ery'obusobozi kandi ery'amaani okukira bo.’

¹⁵Aho nubwo nakubutukire naruga harusozi, orusozi nirwaka omurro; nkwasire ebyasi bibiri eby'amabaale, eby'endagaano.

¹⁶Obu nagenzire kwetegereza, nkasanga mumazire kusobya hali MUKAMA Ruhanga wanyu, mwagize ebintu, mwayekorra enyana; omuhanda MUKAMA ogu yaboolekere, mukaba mugurugiremu ira.

¹⁷Nukwo kukwata ebyasi by'amabaale ebibiri, nabihungura n'emikono yange yombi, nabyaatira aho omumaiso ganyu.

¹⁸Hanyuma, nagaruka najuumara omumaiso ga MUKAMA, nkooku nakozire okubanza, habw'ekibi eki kyona eki mwakozire nimukora ekibiihiza MUKAMA mumukwase ekiniga, nkamara emisana makumi ana n'ebiro makumi ana, ntarukulya kantu, ntarukunywa kantu.

¹⁹Habwokuba nkatiina ekiniga kya Ruhanga n'okubiihirwa kwe, ebyamuhambiriize kucwamu kubahwerekereza. Baitu noomu kasumi ako, nabwo akampuliiriza

²⁰kandi akabiihirirwa muno Arooni, na uwe nukwo kwenda kumwita; omu kasumi ako, kandi nkasabira na Arooni.

²¹Hanyuma nakwata ekintu eki ekyarugirirweho ekibi, niyo enyana ei mukaba mukozire, naginaga omu murro, nagihondahonda, nagisaasangura, nagisa, okuhika obu yakaniinuukire yaba nk'ecuucu, ecuucu yayo egi nagiseesa omu kasaaru akaagerega nikaruga omu rusozi.

²²“Kandi noomu biikaro: Tabera, Maasa, na Kiburosi-hataava, nabwo mukabiihiza MUKAMA.

²³Kandi obu yabaragiire ati: ‘Muruge Kadesi-baraneya, mugende mulye ensi eyimbahaire,’ mukamwemera, mutamwikirize kandi mutakole eki yaragiire.

²⁴Okuruga ha kiro eki nabamanyiireho, nubwo mwatandikire kwemera MUKAMA.

²⁵“Nukwo kujumara omumaiso ga MUKAMA, emisana amakumi ana, n'ebiro amakumi ana, habwokuba nkamanya nkooku akaba amaliriire kubahwerekereza.

²⁶Nkamwesengereza nti: Ai MUKAMA Ruhanga otahwerekereza abantu bawe kandi obugwetwa bwawe obu, wacungwize ekitiinisa kyawe, abawaihire Misiri, wabaleesa obusobozi.

²⁷Oijuke abaheereza bawe: Abburahamu, Isaaka na Yakobbo; otarora okugumangana kw'abantu banu, otarora obubi bwabo n'ekibi kyabo,

²⁸Abantu nambere watwihire, bataikara kugamba bati:

²⁹‘Habwokuba MUKAMA atasobole kubataahya omunsi ei yabanihiize, kandi habwokuba akabanoba, nikyo yabaihiireyo abaitire omwirungu. Habwokuba bantu bawe, kandi bugwetwa bwawe, aba waleeseze obusobozi bwawe obutagambwa amaani n'obusobozi.’”