Read Runyoro - rutooro Yoh 1 Bible Online

Yoh 1 - Runyoro - rutooro bible

Yoh 1

¹Kara na kara hakaba haroho Kigambo; Kigambo akaba ali hamu na Ruhanga kandi Kigambo akaba ali Ruhanga.

²Okurugirra kimu ha kubanza akaba ali hamu na Ruhanga.

³Ebintu byona bikahangwa nibiraba omuli uwe, kandi uwe haatali busaho kintu kyona ekyahangirwe.

⁴Omuli uwe obwomeezi numwo bukaba buli; kandi obwomeezi obu nugwo gwali musana gw'abantu.

⁵Omusana ogu gujwera omu mwirima, kandi omwirima tigukaguraazaaga.

⁶Hakaba haroho omuntu ayatumirwe Ruhanga, ibara lye nuwe Yohaana.

⁷Ogu akaija kuba kaiso ow'okumanyisa eby'omusana, abantu boona nukwo baikirize habwe.

⁸Uwe akaba atali musana, baitu akaija kuba kaiso w'eby'omusana.

⁹Omusana ogw'amazima ogujwera abantu boona, gukaba nigwija omunsi.

¹⁰Akaba ali omunsi, kandi ensi ekahangirwa omuli uwe, baitu nabwo etamumanyirre.

¹¹Akaija owaabu, kyonka abantu be batamutangirre.

¹²Baitu boona abaamutangiriire, baamwikiriza akabaha obusobozi obw'okufooka abaana ba Ruhanga.

¹³Abo nubo abatarazairwe omu buzarranwa bw'omuntu, rundi omu kwegomba kw'omubiri; baitu abaazairwe Ruhanga.

¹⁴Kigambo akafooka muntu, yaikara omuli itwe aijwire obwomeezi n'amazima; tukarora ekitiinisa kye, ekitiinisa ekiheebwa Omwana omu wenka owa Isiitwe.

¹⁵Yohaana akamumanyisa obu yarangiriire haiguru ati: “Onu nuwe ou nagambireho nti: ‘Arukwija ankuraatiire, nankira ekitiinisa, habwokuba akabaho nyowe ntakabaireho.’”

¹⁶Itwena tukatunga ha mbabazi ze, nituheebwa emigisa etarukubarwa.

¹⁷Habwokuba Ebiragiro bikaija nibiraba omuli Musa; obwomeezi n'amazima bikaija nibiraba omuli Yesu Kristo.

¹⁸Busaho n'omu ararozire Ruhanga, kwihaho Omwana omu wenka anyakumwigamiire, nuwe yamumanyisize abantu.

¹⁹Bunu nubwo bwakaiso bwa Yohaana, Abayudaaya obu baamutumireho banyakatagara n'Abaleevi abaarugire Yerusaalemu kumukaguza bati: “Niiwe oha?”

²⁰Akaatura, ataculeere, baitu akaatura bbwa ati: “Nyowe tindi Kristo.”

²¹Baamukaguza bati: “Kandi si niiwe oha? Niiwe Eriya?” Yabagarukamu ati: “Tindi ogu.” Nandiki bbo bati: “Niiwe murangi oli?” Yabagarukamu ati: “Nangwa.”

²²Baayongera kumukaguza bati: “Niiwe oha? Tugarukemu, otugambire eki turaamanyisa abo abatutumire. Nooyeyeta oha?”

²³Nukwo Yohaana kubagarukamu ati: “Ninyowe ogu arukwamirra omwirungu nti: ‘Muterekereze omuhanda gwa MUKAMA’, omurangi Isaaya nkooku yarangire.”

²⁴Abo abakaba batumirwe Abafalisaayo,

²⁵baamukaguza bati: “Kandi habwaki noobatiza obu oraaba otali Kristo, rundi Eriya, rundi omurangi oli?”

²⁶Yohaana yabagarukamu ati: “Nyowe nimbatiza n'amaizi, baitu omuli inywe heemeriiremu ou mutarukumanya;

²⁷nuwe ogu arukunnyija enyuma, kandi tinsemeriire kusuumurra orukoba rw'enkaito ze.”

²⁸Ebi bikabaho Betaniya, nseeri y'ekisaaru Yorudaani, nambere Yohaana akaba naabatiriza.

²⁹Ha kiro ekyakurasireho, Yohaana akarora Yesu namwizira, yagamba ati: “Murole Omwana gw'entaama wa Ruhanga, murole anyakwihaho abantu ebibi!

³⁰Ogu nuwe ou nagambireho nti: ‘Haroho arukunnyija enyuma, arukunkira ekitiinisa, habwokuba akabaho nyowe ntakabaireho.’

³¹Na nyowe nyenka nkaba ntamumanyire; baitu nikyo naiziire nimbatiza n'amaizi, nukwo amanyisibwe Isirairi.”

³²Yohaana akagumya naagamba ati: “Nkarora Mwoyo Ahikiriire naasirimuka naaruga omwiguru omu kisisani ky'eriiba, yamwikaraho.

³³Na nyowe nyenka nkaba ntarukumumanya; baitu Ogu ayantumire kubatiza n'amaizi, nuwe yangambiire ati: ‘Ogu ou oraarora Mwoyo naamusirimukaho naamwikaraho, nuwe abatiza na Mwoyo Ahikiriire.’

³⁴Eki nkakirora kandi naagumya nti: Ogu nuwe Mwana wa Ruhanga.”

³⁵Ha kiro ekyakurasireho, Yohaana akaba ayemeriire na babiri ha beegesebwa be;

³⁶obu yarozire Yesu naahingura, yabagambira ati: “Murole Omwana gw'entaama wa Ruhanga!”

³⁷Abeegesebwa ababiri bakamuhurra naagamba eki, nukwo kuhondera Yesu.

³⁸Uwe yakubutuka, yabarora bamuhondiire, yabakaguza ati: “Nimuserra ki?” Baamugarukamu bati: “Rabbi” (amakuru gaakyo ngu, Mwegesa). “Nooraara nkaha?”

³⁹Yabagarukamu ati: “Mwije muroleyo.” Baagenda baarora nambere yaraaraga, baraara nawe ekiro eki, habwokuba esaaha zikaba ziri nka ikumi eza rwebagyo.

⁴⁰Omu ha babiri abaahuliire Yohaana ebi yagambire kandi bahondera Yesu, nuwe Andereya, mugenzi wa Simooni Petero.

⁴¹Andereya akabanza kuhikaho mukuru we Simooni, yamugambira ati: “Turozire Mesiya” (amakuru gaakyo ngu, Kristo.)

⁴²Yamuhikya hali Yesu. Yesu yamugumyaho amaiso, yagamba ati: “Niiwe Simooni mutabani wa Yohaana? Oraayetwaga Keefa” (amakuru gaakyo ngu, Petero rundi mwandara).

⁴³Ekiro ekyakurasireho, Yesu obu yamazire kucwamu kugenda Galiraaya, yatangaana Filipo, yamugambira ati: “Mpondera.”

⁴⁴Filipo akaba ali wa Betisaida, ekyaro ky'owaabu Andereya na Petero.

⁴⁵Filipo yatangaana Nasanairi yamugambira ati: “Turozire ogu Musa ou yahandiikireho omu Biragiro, kandi abarangi ou baarangire. Nuwe Yesu owa Nazareeti, mutabani wa Yosefu.”

⁴⁶Nukwo Nasanairi kumukaguza ati: “Nazareeti esobora kurugwamu ekintu ekirungi?” Filipo yamugarukamu ati: “Ija oyerorre.”

⁴⁷Yesu obu yarozire Nasanairi naija nambere ali, yamugambaho ati: “Dora Omunyaisirairi mali ataina bugobya!”

⁴⁸Nasanairi yamukaguza ati: “Wammanya ota?” Nandiki Yesu ati: “Filipo obu abaire atakakwesire, nkurozirege oli hansi y'omutini.”

⁴⁹Nasanairi yamugarukamu ati: “Mwegesa, niiwe Mwana wa Ruhanga! Niiwe Mukama wa Isirairi!”

⁵⁰Nandiki Yesu ati: “Habw'okukugambira nti: Nkurozirege hansi y'omutini, nikyo oikiririize? Baitu olirora ebikuru ebirukukira binu.”

⁵¹Kandi yayongera ati: “Mazimakwo ninkugambira nti: Olirora iguru likingwirwe na bamalaika ba Ruhanga nibatembera kandi nibasirimukira ha Mwana w'omuntu.”