Read Runyoro - rutooro Yoh 10 Bible Online

Yoh 10 - Runyoro - rutooro bible

Yoh 10

¹“Mazimakwo nimbagambira nti: Ataraba omu mulyango kutaaha omu isibiko ly'entaama, baitu akatembera handi, ogu aba musuma kandi munyagi.

²Anyakuraba omu mulyango nuwe muliisa w'entaama.

³Omukumirizi amukingurraho kandi entaama zihurra iraka lye; entaama ze azeeta amabara gaazo, aziturukya aheeru.

⁴Eze zoona obu amara kwiturukya aheeru, azeebembera, nazo zimuhondera, habwokuba zimanyire iraka lye.

⁵Ogu ou zitarukumanya tizimuhondera, baitu zimwiruka habwokuba tizirukumanya maraka g'abandi.”

⁶Yesu akabacwera orufumo oru, baitu bbo batakenge eki abagambiire.

⁷Yesu yagaruka yabagira ati: “Mazimakwo nimbagambira nti: Ninyowe mulyango gw'entaama.

⁸Abandi boona abaambandiize bakaba bali basuma kandi banyagi, n'entaama itabahurre.

⁹Ninyowe mulyango; weena anyakuraba omuli nyowe alijunwa. Araataahaga, naaturuka kandi abone iriisizo.

¹⁰Omusuma taizira kindi kwihaho kwiba, kwita, n'okuhwerekereza. Nyowe nkaija zibe n'obwomeezi, kandi bube bwingi muno.

¹¹Ninyowe omuliisa murungi. Omuliisa omurungi ahayo obwomeezi bwe habw'entaama ze.

¹²Anyakuliisiza empeera tali muliisa mali, kandi entaama tiziri ze. Obu arora omwaga nigwija, asigaho entaama, airuka; omwaga gugwera entaama, guzirarangya.

¹³Uwe airuka habwokuba naakorra empeera, kandi entaama tazitaho mutima.

¹⁴Ninyowe omuliisa omurungi; mmanyire ezange, kandi n'ezange niziimmanya:

¹⁵Nka Isenyowe oku ammanyire, na nyowe mmumanyire; kandi mpayo obwomeezi bwange habw'entaama zange.

¹⁶Nyina entaama ezindi ezitali z'omu isibiko linu; nazo ninsemerra kuzireeta, zihurre iraka lyange. Nukwo habeho igana limu eriina omuliisa omu.

¹⁷Nikyo Isenyowe angondeza, habwokuba mpayo obwomeezi bwange, nukwo ngaruke mbwegarurre.

¹⁸Busaho n'omu anyakubunyihaho, baitu nyowe mbweheerayo nyenka. Nyina obusobozi bw'okubuhayo n'obw'okubwegarurra; obusobozi obu nkabuheebwa Isenyowe.”

¹⁹Abayudaaya bakagaruka kwebaganizaamu habw'ebigambo ebi.

²⁰Abaingi omulibo baagamba bati: “Aina omwoyo mubi, kandi agwire iraro; nimumuhulirra ki?”

²¹Baitu abandi bati: “Ebigambo ebi tibigambwa omuntu anyakwina omwoyo omubi. Omwoyo omubi nigusobora kwigura amaiso ga kihimbaara?”

²²Omu bwire obu, omu rubuga Yerusaalemu, bakaba nibakuza ekiro kikuru eky'okwijuka okwezibwa kw'Enju ya Ruhanga.

²³Bukaba buli bwire bw'obutiti, kandi Yesu akaba naarubatarubata omunju ya Ruhanga, omu kisasi ky'omulyango gwa Solomooni.

²⁴Abayudaaya baamwehinguliriza baamukaguza bati: “Olihikya nkaha kutwehanikisa emitima? Obu oraaba oli Kristo, tugambire bbwa.”

²⁵Yesu nukwo kubagarukamu ati: “Nkabagambira ira, baitu timwaikiriza. Emirimo ei ndukukora omu ibara lya Isenyowe, niyo erukungumya;

²⁶baitu inywe timurukwikiriza, habwokuba timuli ntaama zange.

²⁷Entaama zange zihurra iraka lyange. Nzimanyire, nazo zimpondera;

²⁸kandi nziha obwomeezi obutahwaho, tizirihwerekerra ebiro byona. Busaho n'omu alizinsahuraho.

²⁹Isenyowe ayazimpaire naakira boona amaani kandi busaho n'omu asobora kuzimusahuraho.

³⁰Nyowe na Isenyowe tuli omu.”

³¹Abayudaaya baagaruka baakoma amabaale kugamuteera.

³²Yesu nukwo kubagambira ati: “Nkabooleka ebirungi bingi ebyarugire hali Isenyowe. Nikiha hali ebi ekirukubanteeza amabaale?”

³³Abayudaaya baamugarukamu bati: “Titurukukuteera amabaale habw'okukora ebirungi, baitu habw'okujuma Ruhanga. Iwe nooyeyeta Ruhanga, kandi kunu oli muntu.”

³⁴Nandiki Yesu ati: “‘Muli baaruhanga’?

³⁵Abo abaiziirwe ekigambo kya Ruhanga obu aliba yabeesire baaruhanga (kandi Ebihandiiko Ebirukwera tibisobora kucwibwa),

³⁶ogu Isenyowe ou yayereze kandi yatuma omunsi, inywe nimumugambaho muta: ‘Noojuma Ruhanga’, habw'okugamba ngu: ‘Ndi Mwana wa Ruhanga?’

³⁷Obu ndaaba ntarukukora bukwenda bwa Isenyowe, muleke kunyikiriza;

³⁸baitu obu ndaaba nimbukora, inywe noobu muraaba mutarukunyikiriza, haakire mwikirize ebikorwa ebi ndukukora. Nukwo mumanye kandi mwetegereze Isenyowe nkooku ali omuli nyowe, na nyowe nkooku ndi omuli Uwe.”

³⁹Bakalengaho kugaruka kumukwata, baitu yabeecwamu.

⁴⁰Yagaruka yayambuka ekisaaru Yorudaani omu kiikaro nambere Yohaana yabandize kubatiriza, yaikara oku.

⁴¹Baingi bakaija hali uwe, baagamba bati: “Yohaana atakole kintu ekirukuhuniriza na kimu, baitu byona Yohaana ebi yagambireho omusaija onu, bikaba biri by'amazima.”

⁴²Oku baingi baamwikiriza.