Read Runyoro - rutooro Yoh 11 Bible Online

Yoh 11 - Runyoro - rutooro bible

Yoh 11

¹Betaniya hakaba haliyo omurwaire ayayetwaga Lazaaro. Kandi Betaniya nikyo kyaro Mariya na Malita owanyina, nambere baikaraga.

²Mariya ogu, munyaanya Lazaaro ow'akaba arwaire, nuwe yasiigire Yesu amagita g'obwotere kandi yamuragaza ebigere n'isoke rye.

³Nubwo banyaanya baatumireho Yesu bati: “Waitu, enganjani yawe arwaire.”

⁴Baitu Yesu obu yahuliire eki, yagamba ati: “Endwara egi teri y'okumwita, baitu y'okuhaisa Ruhanga ekitiinisa, n'okuhaisaniza Omwana wa Ruhanga.”

⁵Yesu yagonzaaga Malita na Mariya owanyina, na Lazaaro;

⁶baitu obu yahuliire Lazaaro nkooku arwaire, yamara ebiro ebindi bibiri nambere akaba ali.

⁷Ebiro ebi obu byahoire, yagambira abeegesebwa be ati: “Ka tugaruke Buyudaaya.”

⁸Abeegesebwa nukwo kumukaguza bati: “Mwegesa, biro binu Abayudaaya babaire nibakuserra kukuteera amabaale, kandi nooyenda kugarukayo?”

⁹Nandiki Yesu ati: “Omwizooba limu tiharumu saaha ikumi na ibiri? Omuntu obu agenda nyamusana tateerwa nkonge, habwokuba naamulikirwa omusana gw'ensi enu.

¹⁰Baitu omuntu obu agenda ekiro ateerwa enkonge, habwokuba aba ataina musana ogw'okumumulikira.”

¹¹Obu yamazire kugamba ebi yayongera ati: “Munywani waitu Lazaaro agwijagiire, kandi ningenda kumusisiimura.”

¹²Nukwo abeegesebwa be kumugambira bati: “Waitu obu araaba agwijagiire, araakira.”

¹³Yesu akaba naabaza ha kufa kwa Lazaaro, baitu bbo baatekereza ngu, naagamba ha kugwijagira okw'oturo.

¹⁴Nubwo Yesu yabaatuliire bbwa ati: “Lazaaro afiire;

¹⁵kandi nyowe kinsemiize okutasangwayo. Kinu nikiija kubagasa n'okubongeraho okwikiriza. Hati nu tugende nambere ali.”

¹⁶Tomasi, arukwetwa Omurongo, yagambira abeegesebwa bagenzi be ati: “Naitwe tugende, tufe hamu nawe.”

¹⁷Yesu obu yahikireyo, yasanga Lazaaro amazire ebiro bbina omu kituuro.

¹⁸Betaniya ekaba eri kilomita nka isatu okuruga Yerusaalemu.

¹⁹Abayudaaya baingi bakaba baizire kuhumuuza Malita na Mariya habwa munyaanyabo.

²⁰Malita obu yahuliire Yesu nkooku arukwija, yagenda kumutangaana. Mariya yasigara aikaliire omunju.

²¹Nubwo Malita yagambiire Yesu ati; “MUKAMA wange, kakuba wasangirwe hanu, munyaanya nyowe taakufiire.

²²Na hati nimmanya ngu, kyona eki oraasaba Ruhanga, naija kukikuha.”

²³Yesu yamugarukamu ati; “Munyaanyoko naija kuhumbuuka.”

²⁴Nandiki Malita ati: “Mmanyire nkooku alihumbuuka ha kuhumbuuka okwa ha kiro kya ha mpero.”

²⁵Yesu yamugambira ati: “Ninyowe kuhumbuuka, ninyowe bwomeezi; arukunyikiriza noobu alifa, baitu alyomeera;

²⁶kandi omuntu weena omwomeezi arukunyikiriza, talifa. Eki nookiikiriza?”

²⁷Malita yamugarukamu ati: “Ego, MUKAMA wange; ninyikiriza nkooku oli Kristo, Omwana wa Ruhanga niiwe ogu ow'okwija omunsi.”

²⁸Obu yamazire kugamba eki, yagenda yayeta owanyina Mariya, yamugambira ebihwa ati: “Omwegesa ali hanu, naakweta.”

²⁹Mariya obu yahuliire eki, yabandaatuka, yagenda nambere ali.

³⁰Yesu akaba atakahikire omu kyaro Betaniya, baitu akaba akyali omu kiikaro Malita nambere yamusangire.

³¹Abayudaaya abakaba bali omunju nibahuumuza Mariya, obu baarozire yaimuka bwango, yaturuka aheeru, baamuhondera nibateekereza ngu, naagenda ha kituuro kulirirrayo.

³²Mariya, obu yahikire nambere Yesu ali, yamurora, yagwa ha bigere bye, naagamba ati: “MUKAMA wange, kakuba wasangirwe hanu, munyaanya nyowe taakufiire.”

³³Yesu obu yarozire Mariya narra, n'Abayudaaya abamuhondiire nabo nibarra, yatuntura omu mutima, yasaalirwa muno.

³⁴Nukwo kubakaguza ati: “Mukamuziika nkaha?” Baamugarukamu bati: “Waitu, ija orole.”

³⁵Yesu nawe yarra.

³⁶Nubwo Abayudaaya baagambire bati: “Murole nkooku yamugondeze!”

³⁷Abamu omuli bo baakaguza bati: “Onu ayaigwire amaiso ga kihimbaara, taakusoboire kutanga omuntu onu kufa?”

³⁸Yesu yahika ha kituuro, aijwire obusaalizi. Kikaba kiri bwingira obukingirweho ibaale.

³⁹Nukwo kubaragira ati: “Mwiheho ibaale.” Malita, munyaanya omufu, yamugambira ati: “MUKAMA wange, hati naanunka, habwokuba amazire ebiro bbina afiire.”

⁴⁰Nandiki Yesu ati: “Tinkugambiire nti: Obu oraikiriza, noija kurora ekitiinisa kya Ruhanga?”

⁴¹Aho baihaho ibaale. Yesu yararamira haiguru yagamba ati: “Taata, ninkusiima habw'okumpurra.

⁴²Mmanyire nkooku ompurra butoosa, baitu kinu nkigambire habwa banu abanyehinguliriize, baikirize nkooku wantumire.”

⁴³Obu yamazire kugamba eki, yayamirra n'iraka likooto ati: “Lazaaro, turuka!”

⁴⁴Ow'akaba afiire yaturuka aheeru, emikono ye n'amaguru biboherwe n'ebikoba, amaiso ge gasemberwe ekitambaara. Yesu nukwo kubaragira ati: “Mumubohorre, mumuleke agende.”

⁴⁵Abayudaaya baingi abakaba bahondiire Mariya, obu baarozire Yesu eki akozire, baamwikiriza;

⁴⁶baitu abamu omuli bo baagenda kugambira Abafalisaayo ekyabaireho.

⁴⁷Nukwo abanyakatagara abakuru hamu n'abafalisaayo kusorooza orukurato. Baakaguzangana bati: “Tukole ki? Dora omusaija ogu naakora ebirukuhuniriza bingi.

⁴⁸Obu turaamuleka akongera kukora ati, boona nibaija kumwikiriza; kandi Abarooma baliija bahwerekereze ekiikaro kyaitu ekirukwera kinu n'ihanga lyaitu.”

⁴⁹Omu omuli bo, Kaayafa, ow'akaba ali mukuru w'abanyakatagara omu mwaka ogu, yabagambira ati: “Timwina eki murukumanya.

⁵⁰Timurukwetegereza nkooku kihikire omuntu omu kufeera boona, okukira ihanga lyona kuhwerekerra.”

⁵¹Eki atakigambe habwe wenka, baitu habw'okuba mukuru w'abanyakatagara omu mwaka ogu. Akaragura Yesu nkooku asemeriire kufeera ihanga lyona;

⁵²kandi tarukufa habw'ihanga lyonka, baitu na habw'okusorooleza hamu abaana ba Ruhanga abaararangiire omu mahanga.

⁵³Okuruga ha kiro eki, baamalirra kumwita.

⁵⁴Nahabweki Yesu atagaruke kugendagenda bwerebwere omu Bayudaaya; baitu yarugayo, yagenda omu kicweka ekiheriire irungu, omu kyaro ekirukwetwa Efuraimu; oku nuho yaikaire aina n'abeegesebwa be.

⁵⁵Obugenyi obw'Abayudaaya obw'okwijuka Okuhingurwaho bukaba buli haihi kuhika, abantu baingi baaruga omu byaro, baagenda Yerusaalemu kweyeza, obugenyi obu butakahikire.

⁵⁶Bakaba nibaserra Yesu beemeriire omunju ya Ruhanga, nibakaguzangana bati: “Nimuteekereza muta? Mara, tarukwija ha kiro kikuru?”

⁵⁷Baanyakatagara abakuru n'Abafalisaayo bakaba baragiire ngu, obu haraaba haroho anyakumanyire nambere ali, aije abamayise, bamukwate.