Read Runyoro - rutooro Yoh 12 Bible Online

Yoh 12 - Runyoro - rutooro bible

Yoh 12

¹Obu hakaba hasigaire ebiro mukaaga obugenyi obw'okwijuka Okuhingurwaho buhike, Yesu yaija Betaniya, Lazaaro ou yahumbwire omu bafu nambere akaba ali.

²Oku bakamucumbirayo ekyekiro. Malita yabaheereza kandi Lazaaro akaba ali omu hali abo abakaba baikaliire na Yesu nibalya.

³Mariya yaleeta kimu kyakabiri kya lita ky'amagita ag'omuhendo agarukuboya kurungi, yagasiiga ebigere bya Yesu kandi yabiragaza n'isoke rye. Enju yoona yaijura okuboya kw'amagita ago.

⁴Omu ha beegesebwa be, Yuda Isikalyota ow'akaba naija kumugobeza, nukwo kukaguza ati:

⁵“Habwaki amagita ago gatatunzirwemu dinaali, bikumi bisatu, zikagabirwa abaseege?”

⁶Ekyamugambisize eki, tikuli kuganyira abaseege, baitu habwokuba akaba ali musuma, kandi nuwe yakwataga ensahu, yaikaraga naasomoraho ebi baatamuga.

⁷Nukwo Yesu kumugarukamu ati: “Omukazi mumuleke, amagita agaahurre ekiro eky'okuziikwa kwange.

⁸Abaseege mwikara nabo butoosa, baitu timuliikara na nyowe obutoosa.”

⁹Abayudaaya baingi obu baahuliire nkooku ali oku, baija. Bataizirre Yesu wenka, baitu n'okurora Lazaaro ou yahumbwire omu bafu.

¹⁰Nubwo abanyakatagara abakuru baahanwire n'okwita Lazaaro,

¹¹habwokuba baingi omu Bayudaaya bakaba nibabarugaho habwe, nibaikiriza Yesu.

¹²Ha kiro ekyakurasireho, ekitebe kikooto eky'abantu abakaba baizire ha kiro kikuru bakahurra Yesu nkooku arukwija Yerusaalemu.

¹³Baagenda kumutangirra bakwasire amataagi g'emikindo, nibaswagirra bati: “Ahaisanizibwe! W'omugisa Omukama wa Isirairi, ogu arukwija omwibara ly'Atahwaho.”

¹⁴Aho Yesu yarora omwana gw'endogoyi, yagwikarraho nkooku kyahandiikirwe kiti:

¹⁵“Otatiina iwe muhara wa Siyoni. Omukama wawe nguli naija, atembere omwana gw'endogoyi!”

¹⁶Okubanza abeegesebwa be, eki batakyetegereze; baitu Yesu obu yamazire kunyumizibwa, nubwo baijukire ebi nkooku byamuhandiikirweho kandi byamukozirweho.

¹⁷Kandi abo boona abakaba baroho obu yayesire Lazaaro kuruga omu kituuro, yamuhumbuura omu bafu, nabo baaha obwakaiso.

¹⁸Eki nikyo kyatwaire ekitebe ky'abantu kugenda kumutangirra, habwokuba bakaba bahuliire nkooku akozire ekirukuhuniriza eki.

¹⁹Abafalisaayo nukwo kugambirangana bati: “Murole nkooku tutakyaina eky'okukora; dora, ensi yoona emuhondiire.”

²⁰Kandi omuli abo abaizire ha bugenyi kuramya, hakaba harumu Abagiriiki.

²¹Abo bakaija hali Filipo owa Betisaida orw'omu Galiraaya, baamusaba bati: “Waitu, nitugonza kurora Yesu.”

²²Filipo yagambira Andereya; kandi Andereya yagenda nawe, bamanyise Yesu.

²³Uwe yabagarukamu ati: “Akasumi kahikire Omwana w'omuntu okunyumizibwa.

²⁴Mazimakwo nimbagambira nti: akajuma k'engano obu katagwa omu itaka kakafa, kaikara konka; baitu kakuba kafa, kaana ebyana bingi.

²⁵Weena anyakugonza obwomeezi bwe omunsi munu abuferwa, baitu anyakunoba obwomeezi bwe nuwe aliikara nabwo okuhika omu bwomeezi obutahwaho.

²⁶Weena anyakumpeereza asemeriire kunkuraatira; kandi nyowe nambere ndi, n'omuheereza wange nuho aliba. Weena anyakumpeereza, Isenyowe alimuha ekitiinisa.”

²⁷“Hati omutima gwange gutuntwire. Kandi ndaagamba ki? ‘Taata onjune, akasumi kanu kaleke kumpikaho’? Nangwa, habwokuba ekyandeesire nukwo kuhikwaho akasumi kanu.

²⁸Taata, nyumizibwa.” Omu kasumi ako iraka lyaruga omwiguru nirigamba liti: “Nkanyumizibwa ira kandi ndigaruka okunyumizibwa.”

²⁹Ekitebe ky'abantu abakaba beemeriire aho baahurra iraka eri, baagira ngu nkuba niyo ebbwatukire. Abandi bati: “Malaika nuwe abalize nawe.”

³⁰Baitu Yesu yabagambira ati: “Iraka eri liizire habwanyu, tihali habwange.

³¹Kanu nuko kasumi ensi enu aka eraacwererwamu omusango, kandi omulemi w'ensi enu naija kubingwa.

³²Nyowe obu ndikamara kuhanikwa, ndiiriza boona nambere ndi.”

³³Eki akakigamba kwoleka emifeere ye.

³⁴Nukwo abantu kumukaguza bati: “Tukasoma omu Biragiro ngu, Kristo aliikaraho ebiro byona. Osobora ota kugamba ngu, Omwana w'omuntu alihanikwa? Omwana w'omuntu ogu nooha?”

³⁵Nandiki Yesu ati: “Omusana gukyali na inywe akasumi kake. Murubate mukyaina omusana, obwire buleke kubairirra omu muhanda; ogu anyakugenda omu mwirima, tamanya nambere arukugenda.

³⁶Obu muraaba mukyaina omusana, mugwikirize nukwo mufooke baana b'omusana.” Yesu obu yamazire kugamba ebi, yarugaho, yabeesereka.

³⁷Noobu araaba yakozire ebihuniriza bingi omumaiso gaabo, nabwo batamwikirize.

³⁸Eki kikahikiriza ekigambo omurangi Isaaya eki yagambire ati: “Ai MUKAMA, nooha ayaikiriize ebi twamurangiire, kandi nooha ayasuukulirwe amaani ga MUKAMA?”

³⁹Nikyo balemiirwe okwikiriza, habwokuba Isaaya akagaruka yagamba ati:

⁴⁰“Akabaigara amaiso, yabagumanganiza emitima, nukwo amaiso gaabo galeke kuhweza n'emitima yabo ereke kwetegereza, bakampindukira, nkabakiza.”

⁴¹Eki Isaaya akakigamba habw'okurora ekitiinisa kya Kristo, kandi nuwe yabalizeho.

⁴²Baingi, noobu baakuba omu balemi babo, bakamwikiriza; baitu batakyatule habw'okutiina Abafalisaayo, tibaikara kubingwa omu isorrokaniro;

⁴³habwokuba bbo bakagonza okusiimwa abantu kukira kusiimwa Ruhanga.

⁴⁴Yesu yagambira haiguru ati: “Weena arukunyikiriza, tarukwikiriza nyowe, baitu naikiriza Oli ayantumire.

⁴⁵Kandi weena arukundora, buli arozire ayantumire.

⁴⁶Nyowe nkaija omunsi ndi musana, nukwo weena arukunyikiriza aleke kwikara omu mwirima.

⁴⁷Weena anyakuhurra ebigambo byange atabikwasire, nyowe timmusingisa musango. Habwokuba ntaije kusingisa ab'omunsi omusango, baitu nkaija kubajuna.

⁴⁸Arukunyanga, akanga n'okukwata ebigambo byange, haroho arukumucwera omusango. Ebigambo ebi nagambire nibyo birimusingisa omusango ha kiro kya ha mpero.

⁴⁹Habwokuba ntabigambe habwange, baitu Isenyowe ayantumire nuwe yandagiire eby'okugamba n'eby'okwegesa.

⁵⁰Kandi mmanyire Ebiragiro bye nkooku bireeta obwomeezi obutahwaho. Nahabweki ebi ngamba, mbigamba isenyowe nkooku yadagiire.”