Read Runyoro - rutooro Yoh 13 Bible Online

Yoh 13 - Runyoro - rutooro bible

Yoh 13

¹Ekiro kikuru eky'obugenyi Obw'okwijuka Okuhingurwaho kikaba kitakahikire; kandi Yesu yamanya akasumi ke ak'okuruga omunsi munu n'okugaruka hali Ise nkooku kahikire. Okumanya yagondeze abe abakaba bali omunsi, akabagondeza kimu okuhika ha mpero.

²Obu bakaba nibalya ekyekiro, Sitaani amazire kutaahya omu mutima gwa Yuda Isikalyota mutabani wa Simooni, ekiteekerezo ky'okumugobeza,

³Yesu akaba naamanya Ise nkooku yamukwasize byona kandi nkooku yarugire hali Ruhanga naija n'okugaruka hali Ruhanga;

⁴yaimuka, yaruga ha meeza, yajuura omwegereko gwe, yayeteega etaulo omunda.

⁵Yaseesa amaizi omu bbeseni, yatandika kunaabisa abeegesebwa be ebigere, n'okubisusuza taulo ei akaba ayeteegere.

⁶Aho yahika hali Simooni Petero, kandi Petero yamukaguza ati: “MUKAMA wange, noonaabisa nyowe ebigere?”

⁷Nandiki Yesu ati: “Eki ndukukora torukukimanya hati, baitu olikimanya hanyuma.”

⁸Petero yamugambira ati: “Toliinaabisa bigere naakake.” Nukwo Yesu kumugarukamu ati: “Obu ndaaba ntarukukunaabisa, tokyateerana na nyowe.”

⁹Simooni Petero yamugambira ati: “MUKAMA wange, otannabisa ebigere byonka, baitu onnabise engaro n'omutwe!”

¹⁰Nandiki Yesu ati: “Anyakwogere, tayetaaga kindi rundi okunaaba ebigere byonka, habwokuba weena aba naayera. Na inywe nimwera, baitu timuli inywena.”

¹¹Habwokuba akamanya araamugobeza; nikyo yagambira ati: “Timurukwera inywena.”

¹²Obu yamazire kubanaabisa ebigere, yajwara omwegereko gwe, yagaruka ha meeza, yabakaguza ati: “Mwetegeriize eki mbakozire?

¹³Inywena munyeta Mwegesa kandi MUKAMA wanyu; muhikya, habwokuba nukwo ndi.

¹⁴Hati nu, nyowe MUKAMA kandi Omwegesa wanyu, obu ndaaba mbanaabisize ebigere, na inywe nukwo musemeriire muti okunaabisangana ebigere.

¹⁵Mbahaire ekyokurorraho, na inywe mukolege nkooku mbakozire.

¹⁶Mazimakwo nimbagambira nti: Omuheereza takira mukama we; kandi omukwenda takira ogu ayamutumire.

¹⁷Ebintu binu obu muraaba nimubikenga, muli b'omugisa kakuba mubikora.

¹⁸Tindukubagambaho inywena; habwokuba nimmanya aba naakomere, nukwo Ekyahandiikirwe kihikirre ekirukugamba kiti: ‘Ogu ayaliire ha byokulya byange, nuwe anyehindukiriire.’

¹⁹Eki nkibagambiire kitakabaireho; obu kiribaho, nukwo mwikirize ngu, ninyowe ogu.

²⁰Mazimakwo nimbagambira nti: Weena anyakujwahukirra ou ntuma, aba ajwahukiriire nyowe; kandi anyakujwahukirra nyowe, aba ajwahukiriire Oli ayantumire.”

²¹Yesu obu yamazire kugamba ebi, yakwatwa obujune, yayatura ati: “Mazimakwo nimbagambira nti: Omu omuli inywe naija kungobeza.”

²²Abeegesebwa be nukwo kurorangana batarukumanya ou agambireho.

²³Omwegesebwa Yesu ou yagonzaaga, akaba amwigamiire ha kifuba.

²⁴Nukwo Simooni Petero kumusima naagamba ati: “Mukaguza ou arukubazaaho.”

²⁵Ogu ow'akaba aigamiire Yesu ha kifuba yamukaguza ati: “MUKAMA wange, nooha ogu?”

²⁶Nandiki Yesu ati: “Nuwe ogu ou ndakoleza entonge nkagimuha.” Obu yakoleze entonge, yagiha Yuda, mutabani wa Simooni owa Isikalyota.

²⁷Obu yamazire kulya entonge egi, Sitaani yamutaahamu. Nukwo Yesu kumugambira ati: “Eki orukugenda kukora, kikole bwango.”

²⁸Omuli abo abakaba baikaliire ha kiihuro, busaho n'omu ayamanyire eki yamugambiire ati.

²⁹Baitu abamu mulibo, habw'okumanya Yuda nkooku yakwataga ensaho ya sente, nikyo batekeriize ngu, Yesu amutumire agule ebi barukwetaaga habw'obugenyi; rundi ngu, ahe abaseege akantu.

³⁰Yuda obu yamazire kulya entonge, ahonaaho yaturuka aheeru. Obwire bukaba bwizire.

³¹Obu yamazire kugenda, Yesu yagamba ati: “Hati Omwana w'omuntu anyumiziibwe, na Ruhanga anyumiriziibwe omuli uwe.

³²Kandi Ruhanga obu araaba anyumiriziibwe omu Mwana we, na Mwana naija kunyumirizibwa omu Ruhanga, kandi araamunyumiza bwango.”

³³“Baana bange, nkyali na inywe akacu kake. Nimwija kunserra; baitu nkooku naagambiire Abayudaaya, na inywe nukwo ndukubagambira nti: ‘Nambere ndukugenda, timulisobora kwijayo.’

³⁴Nimbaha Ekiragiro ekihyaka: Mugonzangane; nyowe nkooku nabagondeze, na inywe nukwo mugonzangane.

³⁵Obu muraaba nimugonzangana, aho nuho abantu boona balimanyira nkooku muli beegesebwa bange.”

³⁶Simooni Petero nukwo kumukaguza ati: “MUKAMA wange, noogenda nkaha?” Yesu yamugarukamu ati: “Nambere ndukugenda tosobora kumpondera hati; baitu olimpondera hanyuma.”

³⁷Petero yayongera yamukaguza ati: “Waitu, habwaki ntakuhondera hati? Nyeteekaniize kuhayo obwomeezi bwange habwawe.”

³⁸Nandiki Yesu ati: “Oyeteekanize kuhayo obwomeezi bwawe habwange? Mazimakwo ninkugambira nti: Enkoko tekooke, iwe otakanyehoogere emirundi esatu.”