Read Runyoro - rutooro Yoh 14 Bible Online

Yoh 14 - Runyoro - rutooro bible

Yoh 14

¹“Emitima yanyu ereke kutuntura. Mwikirize Ruhanga, na nyowe munyikirize.

²Omwa isenyowe harumu ebiikaro bingi; kakuba kitali kyo, tinakubagambiire nti: Ningenda kubateekaniriza ekiikaro.

³Kandi obu ndigenda nkabateekaniriza ekiikaro, ndigaruka mbatwale nambere ndi, oku na inywe nuho mwikale.

⁴Kandi omuhanda ogurukutwara nambere ndukugenda, mugumanyire.”

⁵Nukwo Tomasi kumukaguza ati; “MUKAMA wange, titurukumanya nambere orukugenda; omuhanda turaagumanya tuta?”

⁶Yesu yamugarukamu ati: “Ninyowe muhanda, ninyowe mazima, ninyowe bwomeezi. Tiharoho anyakuhika hali Isenyowe atarabire omuli nyowe.

⁷Kakuba mwammanyire, na Isenyowe mwakumumanyire; okuruga hati nimumumanya kandi mumuboine.”

⁸Filipo yamugambira ati: “MUKAMA wange otwoleke Sso, eki kiraatumara.”

⁹Nandiki Yesu ati: “Filipo, nambere nakaba kwikara na inywe tokammanyaga? Ogu anyakundora, buli aba arozire Isenyowe. Habwaki ogamba oti: ‘Twoleke Sso?’

¹⁰Timurukwikiriza nkooku ndi omuli Isenyowe, na Isenyowe nkooku ali omuli nyowe? Ebigambo ebi mbagambira, timbigamba habwange; baitu Isenyowe anyakwikara omuli nyowe, nuwe akora emirimo ye.

¹¹Munyikirize nkooku ndi omuli Isenyowe, na Isenyowe nkooku ali omuli nyowe; kitali eki, munyikirize habw'ebikorwa ebi nkora.

¹²“Mazimakwo nimbagambira nti: Arukunyikiriza, nawe alikora ebi ndukukora, kandi alikora ebirukukiraho; habwokuba nyowe ningenda owa Isenyowe.

¹³Kyona eki muraasabaga omu ibara lyange, ndikikora, nukwo Isenyowe anyumirizibwe omu Mwana we.

¹⁴Kyona eki murakasabaga omu ibara lyange ndikikora.”

¹⁵“Obu muraaba nimungonza, muraakwataga ebiragiro byange.

¹⁶Na nyowe ndisaba Isenyowe abahe Omuhabuzi ondi, aikalege na inywe ebiro byona.

¹⁷Ogu nuwe Mwoyo ow'amazima, abantu ou batarukusobora kujwahukirra, baitu inywe mumumanyire, habwokuba aikara na inywe kandi aliba omuli inywe.

¹⁸“Tindukwija kubasiga muli nfuuzi; ndigaruka hali inywe.

¹⁹Hasigaire akasumi kake abantu tibaligaruka kundora, baitu inywe mulindora; habwokuba nyowe ndi mwomeezi, na inywe mulyomeera.

²⁰Ha kiro eki mulimanya nkooku ndi omuli Isenyowe, na inywe nkooku muli omuli nyowe, na nyowe omuli inywe.

²¹Anyakwikiriza ebiragiro byange akabikwata, ogu nuwe angonza; kandi arukungonza, aligonzibwa Isenyowe, na nyowe ndimugonza kandi ndimweyoleka.”

²²Yuda (atali Isikalyota) yamukaguza ati: “MUKAMA wange, kiri kita iwe okutweyoleka, kunu oteeyolekere abantu boona?”

²³Yesu yamugarukamu ati: “Omuntu obu aba nangonza, alikwata ebigambo byange, na Isenyowe alimugonza; tuliija nambere ali, twikale nawe.

²⁴Atangonza takwata bigambo byange; kandi kunu ebigambo ebi murukuhuura tibiri byange, baitu bya Isenyowe ayantumire.

²⁵“Ebi mbibagambiire nkyali na inywe.

²⁶Baitu Omuhabuzi, nuwe Mwoyo Ahikiriire, Isenyowe ou alituma omu ibara lyange, nuwe alibeegesa byona, kandi alibaijukya byona ebi nakabagambiire.

²⁷Nimbasigira obusinge, obusinge bwange nimbubaha; baitu tindukubuha ensi nkooku ebuha. Emitima yaanyu ereke kutuntura, noobu kwakuba kutiina.

²⁸Mwampurra nimbagambira nti: ‘Ningenda, kandi ndigaruka nambere muli.’ Obu mwakubaire nimungonza, mwakusemeriirwe, habwokuba ningenda hali Isenyowe; kandi Isenyowe nankira obukuru.

²⁹Eki, nakibagambira kitakahikire; obu kirihika nukwo mwikirize.

³⁰Tindukwongera kubabaliza bingi, habwokuba omulemi w'ensi enu naija. Uwe tannyinaho busobozi;

³¹baitu nyowe nkora Isenyowe nkooku yandagiire, nukwo abantu bamanye nkooku mmugonza. Mwimuke, turuge hanu.”