Read Runyoro - rutooro Yoh 15 Bible Online

Yoh 15 - Runyoro - rutooro bible

Yoh 15

¹Ninyowe muzaabbibbu nyakabara, kandi Isenyowe nuwe mulimi.

²Itaagi lyange lyona eritarukwana bijuma, alitemaho; kandi buli itaagi erirukwana ebijuma alikonera, nukwo lyane ebirukukiraho.

³Inywe mumazire kusemezibwa habw'ebigambo ebi nabagambiire.

⁴Mwikale omuli nyowe, nka nyowe oku nyikara omuli inywe. Itaagi nkooku litasobora kwana ebijuma habwalyo lyonka, litali ha mizaabbibbu, nukwo na inywe mutasobora kukora ebikorwa ebirungi, rundi buli mugumiire hali nyowe.

⁵Ninyowe muzaabbibbu, inywe muli mataagi. Ogu anyakwikara omuli nyowe, na nyowe omuli uwe, nuwe akora ebirungi bingi; habwokuba timwina eki musobora kukora mutali na nyowe.

⁶Weena ataikara omuli nyowe anagwa nk'itaagi eritemerwe ha muti kandi ayoma. Amataagi nk'ago gasoroozebwa, ganagwa omu murro, gahya.

⁷Obu muraikaraga omuli nyowe, n'ebigambo byange bikaikara omuli inywe, muraasobora kusaba kyona eki murukugonza, kandi kiribakolerwa.

⁸Ekirukuhaisa Isenyowe ekitiinisa nukwo inywe kukora ebirungi bingi, nimwoleka nkooku muli beegesebwa bange mali.

⁹Nka nyowe oku yangondeze, nukwo na nyowe nabagondeze; na inywe mwikale omu ngonzi zange.

¹⁰Obu muraakwataga ebiragiro byange nyowe nkooku nakwasire ebya Isenyowe, muliikara omu ngonzi zange nyowe nkooku naikaire omu ngonzi ze.

¹¹Ebi mbibagambiire nukwo okusemererwa kwange kwikale omuli inywe, kandi okusemererwa oku kwijurre kimu.

¹²“Kinu nikyo ndukubaragira: Mugonzangane nka nyowe oku nabagondeze.

¹³Tiharoho anyakwina engonzi ezirukukira zinu, ezihambiriza omuntu kufeera enganjani ze.

¹⁴Inywe muli nganjani zange obu muraaba nimukora ebi ndukubaragira.

¹⁵Tinkyabeeta bairu, habwokuba omwiru tamanya mukama we ebi akora; baitu mbeesire nganjani, habwokuba nkabamanyisa byona Isenyowe ebi yangambiire.

¹⁶Tibali inywe abankomere, baitu ninyowe nabakomere, nabataho nukwo mukole ebirungi, kandi ebikorwa byanyu biikaleho. Nahabweki kyona eki musaba Isenyowe omu ibara lyange, akibahe.

¹⁷Eki ndukubaragira nkinu: Mugonzangane.”

¹⁸“Abantu obu balibanoba, mumanye nkooku baabandize kunoba nyowe.

¹⁹Kakuba mubaire muli b'ensi enu, ensi yakubagondeze nk'abaayo; baitu timuli b'ensi habwokuba nkabakoma nabaiha omunsi, nikyo ensi erukubanobera.

²⁰Mwijuke eki nabagambiire nti: ‘Omuheereza takira mukama we’. Obu baraaba nibampiiganiza, na inywe balibahiiganiza. Obu baraaba baahuliire ebi nabagambiire, n'ebyanyu balibihurra.

²¹Baitu ebi byona balibibakora nibabatura nyowe, habwokuba tibarukumanya Ogu ayantumire.

²²Kakuba ntaraizire nkabagambira, tibaakubaire na kibi; baitu hati tibaina ky'okwekwasa habw'ekibi kyabo.

²³Ogu anyakunnoba, anoba na Isenyowe.

²⁴Kakuba ntarakozire omuli bo ebikorwa ebitakakorwaga ondi weena, tibaakubaire na kibi; baitu hati babirozire kandi baanoba nyowe hamu na Isenyowe.

²⁵Eki kikabaho kihikirize ekyahandiikirwe omu Biragiro byabo kiti: ‘Bakannobera busa’.

²⁶Baitu Omuhabuzi ou ndibatwekera, naaruga hali Isenyowe, nuwe Mwoyo ow'amazima anyakuruga hali Isenyowe, Ogu obu aliija aliba kaiso wange.

²⁷Na inywe muli bakaiso, habwokuba okuruga ha kubanza twikaire hamu.”