Read Runyoro - rutooro Yoh 16 Bible Online

Yoh 16 - Runyoro - rutooro bible

Yoh 16

¹“Ebi byona mbibagambiire muleke kugarukirra.

²Balibabinga omu masorrokaniro; kandi akasumi kalihika omuntu weena arukubaita mbere aliteekerereza ngu, naaheereza Ruhanga.

³Ekiribakoza eki nukwo kutamanya Isenyowe noobwakuba nyowe.

⁴Baitu akasumi obu kalihika, muliijuka nkooku nabibamanyisize.” “Ebigambo binu ntabibagambire kuruga ha kubanza, habwokuba tukaba tukyali hamu.

⁵Hati nu ningenda hali Ogu ayantumire, kandi busaho n'omu omuli inywe arukunkaguza ati: ‘Noogenda nkaha?’

⁶Baitu habw'okubibagambira, emitima yanyu ijwire obujune.

⁷Nabwo nimbagambira amazima nti: Okugenda kwange nikubagasira. Kakuba ntagenda, Omuhabuzi talibaizira; baitu obu ndigenda ndimubatumira.

⁸Uwe obu aliija alirumiriza abantu habw'ekibi, habw'obuhikiriire na habw'okucwerwa omusango.

⁹Alibarumiriza ekibi habw'okutanyikiriza.

¹⁰Aligumya obuhikiriire bwange, habwokuba ningaruka hali Isenyowe kandi timulyongera kundora.

¹¹Alinanura abantu nkooku balicwerwa omusango, habwokuba omulemi w'ensi enu amazire kusingwa omusango.

¹²“Nkyaina bingi eby'okubagambira, baitu timurukwija kubisobora hati.

¹³Mwoyo w'amazima obu aliija, alibeebembera abooleke amazima goona. Uwe talibaza habw'obusobozi bwe, baitu kyona eki alihurra, nikyo aligamba; kandi alibamanyisa n'ebirukwija kubaho.

¹⁴Aliinyumiza habwokuba araihaga ha byange, naabibamanyisa.

¹⁵Byona Isenyowe ebi ainabyo, byange; nikyo mbagambiriire nti: Mwoyo, ebyange nibyo araabamanyisaaga.”

¹⁶“Hasigaire akacu kake muliba mutakyandora, kandi halihinguraho akacu kake mulindora.”

¹⁷Abamu ha beegesebwa be nukwo kukaguzangana bati: “Kinu kiki eki atugambiire ati: ‘Hasigaire akacu kake, muliba mutakyandora’; kandi ati: ‘Halihinguraho akacu kake, mulindora’? Kandi ati: ‘Ningenda hali Isenyowe’?”

¹⁸Baayongera kukaguzangana bati: “Naamanyisa ki obu arukugamba ati: ‘Hasigaire akacu kake’? Titurukwetegereza eki arukugamba.”

¹⁹Yesu yakenga nkooku barukugonza kumukaguza, nukwo kubagambira ati: “Kinu tinikyo murukukaguzangana: Nyowe eki ngenderiire obu ngambire nti: ‘Hasigaire akacu kake muliba mutakyandora’?

²⁰Mazimakwo nimbagambira nti: Inywe mulirra, muliganya; baitu ensi, yo erisemererwa. Mulisaalirwa, baitu okusaalirwa kwanyu kulirugwamu okusemererwa.

²¹Omukazi obu aba naarumwa kuzaara, asaalirwa, habwokuba akasumi ke kaba kahikire; baitu obu amara kuzaara, obusaalizi aba atakyabwijuka habw'okusemererwa, habwokuba omwana azairwe omunsi.

²²Inywe nimusaalirwa hati, baitu ndigaruka mbasuule, nukwo emitima yanyu erisemererwa, kandi okusemererwa kwanyu oku busaho n'omu alikubaihaho.

²³Ha kiro eki timulinkaguza kantu. Mali mali nimbagambira nti: kyona eki mulisaba Isenyowe omu ibara lyange, alikibaha.

²⁴Mwakaba kuba, timukasabaga kantu omu ibara lyange. Musabe, muliheebwa, nukwo okusemererwa kwanyu kuhikirre.

²⁵“Ebi mbibagambiire omu nfumo; akasumi kalihika obu ntalibagambira omu nfumo, baitu ebya Isenyowe ndibibagambira bbwa.

²⁶Ha kiro eki mulisaba omu ibara lyange, kandi tindukubagambira nti: Nyowe ndibasabira hali Isenyowe;

²⁷ningira Isenyowe nawe abagonza, habwokuba inywe mukangonza mwaikiriza nkooku narugire hali Uwe.

²⁸Nkaruga hali Isenyowe, naija omunsi; hati ensi ningirugamu, ningaruka owa Isenyowe.”

²⁹Abeegesebwa be baagamba bati: “Weza! Hati noogamba bbwa, tokyagamba omu nfumo!

³⁰Twetegeriize nkooku omanyire ebintu byona, kandi torukulindirra muntu n'omu kukukaguza; nikyo turukwikiririza nkooku warugire hali Ruhanga.”

³¹Yesu yabagarukamu ati: “Hati mwaikiriza?

³²Akasumi nikaija, na hati kahikire, aka mulirarangiramu, buli muntu akwate ogwe, nimunsigaho nyenka; baitu nabwo tindi nyenka, habwokuba nyina Isenyowe.

³³Ebi mbibagambiire nukwo muzoole obusinge omuli nyowe. Omunsi mwina obujune, baitu mugume. Nyowe, ensi ngisingwire.”