Read Runyoro - rutooro Yoh 17 Bible Online

Yoh 17 - Runyoro - rutooro bible

Yoh 17

¹Yesu obu yamazire kugamba ebi, yararamira haiguru nagamba ati: “Taata, akasumi kahikire; nyumiza Omwana waawe, nukwo nawe akunyumize.

²Habwokuba okamuha obusobozi ha bantu boona, nukwo ahe boona aba wamukwasize obwomeezi obutahwaho.

³Kandi obwomeezi obutahwaho nubwo bunu: abantu bamanye iwe Ruhanga omu, ow'amazima, na Yesu Kristo ou watumire.

⁴Nyowe nkakunyumiza omunsi, mmazire kuhikiriza omulimo wampaire kukora.

⁵Hati nu Taata, onnyumiririze nambere oli nongarurra ekitiinisa eki nkaba nyinakyo ndi hamu na iwe ensi etakahangirwe.

⁶“Nkakumanyisa abantu aba wansoroliire omunsi. Bakaba bali baawe, okabampa, kandi bakwasire ekigambo kyawe.

⁷Hati bamanyire byona ebi wampaire nkooku biruga nambere oli;

⁸habwokuba byona ebi wangambiire nkabibamanyisa, baabiikiriza, baamanyira kimu nkooku narugire hali Iwe, kandi baikiriza ngu, niiwe wantumire.

⁹Abo nubo ndukusabira. Tindukusabira ab'ensi, kyonka ninsabira abo aba wampaire, habwokuba baawe.

¹⁰Abange boona, baawe; n'abaawe boona, bange. Ninyumiririzibwa omuli bo.

¹¹Hati tinkyali omunsi, baitu bbo bagirumu. Nyowe ninyija nambere oli. Taata Ahikiriire, abo aba wampaire obalinde habw'obusobozi bwawe obu wampaire babe bamu nka itwe oku tuli bamu.

¹²Obu nkaba nkyaina abo aba wampaire, nkabalinda habw'obusobozi bwawe obu wampaire. Nkabalinda, tihabuzireho n'omu kwihaho ogu ou akaba ali w'okuhwerekerra, nukwo Ebyahandiikirwe bihikirre.

¹³Baitu hati ninyija nambere oli. Binu nimbigamba nkyali omunsi, nukwo baijurre kimu okusemererwa kwange.

¹⁴Mbahikizeho ekigambo kyawe; kandi abantu babanobere habwokuba tibali b'ensi enu, nka nyowe oku ntali wayo.

¹⁵Tindukukusaba kubaiha omunsi, baitu obalinde hali Omubi.

¹⁶Tibali b'ensi nka nyowe oku ntali w'ensi.

¹⁷Obeeze omu mazima. Ekigambo kyawe nugo amazima.

¹⁸Nkooku wantumire omunsi, na nyowe nukwo ngibatumiremu.

¹⁹Nyowe ninyehayo habwabu, nukwo bbo beezibwe mali.”

²⁰“Tindukusabira banu bonka, baitu n'abandi abalinyikiriza habw'ebigambo byabo,

²¹nukwo boona babe bamu nka Iwe Taata oku oli omuli nyowe, na nyowe omuli Iwe. Nabo babe omuli itwe, nukwo abantu bamanye nkooku niiwe wantumire.

²²Ekitiinisa eki wampaire, nikyo mbahaire. Babe bamu nka itwe oku tuli bamu,

²³nyowe omuli bo na Iwe omuli nyowe. Bafooke bamu, nukwo abantu bamanye nkooku wantumire, kandi wabagonza nkooku wangondeze.

²⁴Taata, aba wampaire, ningonza baikale nambere ndi, barole ekitiinisa eki wampaire, habwokuba okangonza ensi etakahangirwe.

²⁵Taata Ahikiriire, abantu batakumanye, baitu nyowe nkakumanya; kandi na banu nibamanya nkooku niiwe wantumire.

²⁶Nkabakumanyisa, kandi ndibakumanyisa, nukwo okugonza oku wangondezeemu kwikale omuli bo, na nyowe nyikale omuli bo.”