Read Runyoro - rutooro Yoh 18 Bible Online

Yoh 18 - Runyoro - rutooro bible

Yoh 18

¹Yesu obu yamazire kugamba ebi, yaturuka n'abeegesebwa be baacwanganiza ekihanga eky'akasaaru Kederooni. Oku hakaba haliyo orugonjo oru yataahiremu aina abeegesebwa be.

²Yuda, ayamugobiize, akaba naamanya ekiikaro eki. Obundi n'obundi Yesu yagendayoga hamu n'abeegesebwa be.

³Nukwo Yuda kugendayo aina ekihanda ky'abaserikale n'abakuru baabo eki yahairwe banyakatagara abakuru n'Abafalisaayo, baina etaara n'ebimuli, hamu n'eby'okurwanisa.

⁴Yesu habw'okumanya byona ebirukugenda kumubaho, yarugayo naabakaguza ati: “Nimuserra oha?”

⁵Bbo baamugarukamu bati: “Yesu owa Nazareeti.” Nandiki Yesu ati: “Dara nyowe.” Yuda, ayamugobiize, akaba ayemeriire nabo.

⁶Yesu obu yabagambiire ati: “Dara nyowe”, baayekanga, baagwa hansi.

⁷Yagaruka yabakaguza ati: “Nimuserra oha?” Baamugarukamu bati: “Yesu owa Nazareeti.”

⁸Nandiki uwe ati: “Mbagambiire ira nti; Ninyowe ogu. Obu muraaba nimuserra nyowe, abasaija banu mubaleke bagende.”

⁹Kinu kikabaho kiikirize eki yagambire ira ati: “Hali abo aba wampaire, busaho n'omu ayabuzireho.”

¹⁰Simooni Petero ow'akaba aina empirima, nubwo yagisomoire, yatema omwiru w'omukuru w'abanyakatagara, yamucwaho okutu kw'obulyo. Ibara ly'omwiru ogu, nuwe Malikusi.

¹¹Yesu yagambira Petero ati: “Empirima yawe gigarre omu kiraaro kyayo; tindukwija kubonabona Isenyowe nkooku yandagiire?”

¹²Nubwo ekihanda ky'abaserikale n'omukuru waabo hamu n'abalinzi b'Abayudaaya baakwasire Yesu baamuboha.

¹³Baabanza kumutwara hali Annasi, habwokuba akaba ali isezaara Kaayafa, ow'akaba ali mukuru w'abanyakatagara omu mwaka ogu.

¹⁴Kaayafa ogu, nuwe yahaire Abayudaaya amagezi ati: Kihikire omuntu omu kufeera boona.

¹⁵Simooni Petero hamu n'omwegesebwa ondi, baahondera Yesu. Omwegesebwa oli, habw'okumanywa mukuru w'abanyakatagara, yataaha hamu na Yesu omu kizigati kya mukuru w'abanyakatagara;

¹⁶Petero akyayemeriire ha irembo. Nahabweki omwegesebwa oli, ow'akaba naamanywa mukuru w'abanyakatagara, yaturuka, yagambira omuzaana ayalindaga irembo, ataahye Petero.

¹⁷Omuzaana ogu nubwo yakagwize Petero ati: “Na iwe toli omu ha beegesebwa b'omuntu ogu?” Yamugarukamu ati: “Tindi mwegesebwa we.”

¹⁸Hakaba haroho embeho kandi abaheereza n'abakuru b'abaserikale bakaba bahembere omurro gw'amakara, beemeriire niboota, na Petero abarumu.

¹⁹Mukuru w'abanyakatagara yakaguza Yesu ha beegesebwa be na ha nyegesa ye.

²⁰Nukwo Yesu kumugarukamu ati: “Abantu boona nabagambiraga bbwa. Butoosa naayegesaaga omu masorrokaniro n'omunju ya Ruhanga, nambere Abayudaaya boona beesorooleza. Tinkabazaaga kintu kyona omunsita.

²¹Hati nyowe nonkaguliza ki? Kaguza abo abaampurraga ninyegesa; ebi nabagambiire nibabimanya.”

²²Obu yagambire eki, omu ha bakuru b'abaserikale abakaba beemeriire aho, yateera Yesu oruhi naagamba ati: “Noogarukamu oti mukuru w'abanyakatagara?”

²³Nandiki Yesu ati: “Obu ndaaba mbalize kubi, ndumiriza ekibi eki ngambire. Obu ndaaba mbalize kurungi, onteeriire ki?”

²⁴Nubwo Annasi yamutwekere hali Kaayafa, mukuru w'abanyakatagara aboherwe.

²⁵Simooni Petero akaba ayemeriire naayota. Baamukaguza bati: “Na iwe toli omu ha beegesebwa be?” Yayehooga naagamba ati: “Nangwa, tindi mwegesebwa we.”

²⁶Omu ha baheereza ba mukuru w'abanyakatagara, anyakwina obuzaale n'omuntu Petero ou yacwireho okutu, yamukaguza ati: “Timbarozirege muli hamu omu rugonjo?”

²⁷Petero yayehooga; ahonaaho enkoko yakooka.

²⁸Nubwo baihire Yesu omwa Kaayafa, baamutwara omunju ei baacweramuga emisango. Obwire bukaba nibukyanganuka. Bbo bonka batataahe omunju y'emisango habw'okuziza, batakamazire kulya obugenyi obw'okwijuka Okuhingurwaho.

²⁹Pilaato nukwo kuturuka yabasanga aheeru, yabakaguza ati: “Omuntu onu nimumujunaana musango ki?”

³⁰Baamugarukamu bati: “Omuntu onu kakuba atabaire mucwi w'Ebiragiro, titwakumukuleetiire.”

³¹Pilaato yabagambira ati: “Mumwetwarre, mumucwere omusango nimuhondera Ebiragiro byanyu.” Nandiki Abayudaaya bati: “Ebiragiro byaitu tibirukutwikiriza kwita omuntu n'omu.”

³²Eki kikabaho kihikirize ekigambo Yesu eki yagambire kwoleka emifeere ye.

³³Pilaato yagaruka yataaha omunju ey'okucweramu emisango, yayeta Yesu yamukaguza ati: “Niiwe Mukama w'Abayudaaya?”

³⁴Yesu yamugarukamu ati: “Ekikaguzo eki kyawe habwawe, rundi abandi nubo bakikugambiire hali nyowe?”

³⁵Pilaato yamungarukamu ati: “Nyowe ndi Muyudaaya? Ab'ihanga lyawe n'abanyakatagara abakuru nubo bakundeetiire. Okozire ki?”

³⁶Nandiki Yesu ati: “Obukama bwange tibuli bw'omunsi munu; obu bwakubaire buli bw'omunsi munu, abaheereza bange bakurwaine, ndeke kuheebwayo hali Abayudaaya; baitu obukama bwange tibuli bw'omunsi munu.”

³⁷Pilaato yamukaguza ati: “Nukwo kugamba oli mukama?” Yesu yamugarukamu ati: “Niiwe orukugamba nkooku ndi mukama. Ningira eki nikyo nazaalirwe, kandi nikyo naiziire omunsi, okumanyisa amazima. Ow'amazima weena akwata ebigambo byange.”

³⁸Pilaato yamukaguza ati: “Amazima kimanyisa ki?” Obu yamazire kugamba eki, Pilaato yaturuka, yagaruka hali Abayudaaya, yabagambira ati: “Timurozireho musango.

³⁹Baitu mwina engeso y'okubalekerra omunyankomo omu ha kiro kikuru eky'okwijuka Okuhingurwaho. Nimwenda mbalekerre Omukama w'Abayudaaya?”

⁴⁰Nubwo baatokiire haiguru bati: “Atali ogu, baitu otulekerre Baraaba!” Baaraba ogu akaba ali munyagi.