Read Runyoro - rutooro Yoh 19 Bible Online

Yoh 19 - Runyoro - rutooro bible

Yoh 19

¹Nubwo Pilaato yaragiire batwale Yesu, bamuteere enkoba.

²Abaserikale baaruka ekondo y'amahwa, baagimuta ha mutwe, baamujweka orugoye rwa kahuukya;

³baatandika kwija omu omu nibagamba bati: “Mirembe, Omukama w'Abayudaaya!” Baamuteera empi.

⁴Pilaato yayongera yaturuka aheeru yabagambira ati: “Hati kammubaleetere, nukwo mumanye nkooku ntamuzoireho musango.”

⁵Yesu nukwo kuturuka aheeru, ajwaire ekondo y'amahwa n'orugoye rwa kahuukya. Pilaato yabagambira ati: “Omuntu ngugwo!”

⁶Baanyakatagara abakuru hamu n'abakuru b'abaserikale obu baamurozire, baatokera haiguru bati: “Mubambe! Mubambe ha musaraba!” Pilaato yabagambira ati: “Inywe inywenka mumutwale, mumubambe, habwokuba nyowe timmuzoireho musango.”

⁷Abayudaaya baamugarukamu bati: “Twina ekiragiro, kandi ekiragiro eki nkooku kirukugamba, uwe asemeriire kufa, habwokuba akeeyeta Mwana wa Ruhanga.”

⁸Pilaato obu yahuliire ebigambo ebi yayongera kutiina.

⁹Yagaruka yataaha omunju ey'okucweramu emisango, yakaguza Yesu ati: “Okaruga nkaha?” Baitu Yesu tiyamugarukamu.

¹⁰Pilaato nukwo kumukaguza ati: “Torukwenda kungarukamu? Tomanyire nkooku nyina obusobozi obw'okukulekera rundi obw'okukubamba ha musaraba?”

¹¹Nandiki Yesu ati: “Tokubaire n'obusobozi bwona hali nyowe, kakuba butarakuhairwe kuruga omwiguru; nahabweki anyakundiraine yampikya hanu, nuwe aina ekibi ekirukukira ekyawe.”

¹²Okuruga obu Pilaato yaserra amagezi ag'okumulekera, baitu Abayudaaya baatokera haiguru bati: “Omuntu onu obu oraamulekera, buli toli nganjani ya Kaisaali; habwokuba weena anyakwefoora mukama, aba naarwanisa Kaisaali.”

¹³Pilaato obu yahuliire ebigambo ebi, yaragira baturukye Yesu aheeru, yaikarra ha kitebe ky'okucweraho emisango, omu kiikaro ekirukwetwa Amabaale Agaaliriirwe, kandi omu Ruhebburaayo: Gabbata.

¹⁴Ekiro eki kikaba kiri ky'Okwetekaniriza ekiro kikuru eky'okwijuka Okuhingurwaho; kandi zikaba ziri saaha nka mukaaga. Nubwo Pilaato yagambiire Abayudaaya ati: “Mukama wanyu ngugwo!”

¹⁵Baatokera haiguru muno bati: “Mwiheho! Mwiheho! Mubambe ha musaraba!” Pilaato yabakaguza ati: “Ndabamba mukama wanyu?” Nandiki abanyakatagara abakuru bati: “Titwina mukama ondi kwihaho Kaisaali.”

¹⁶Aho Pilaato yamubakwasa, bamubambe ha musaraba.

¹⁷Nubwo baatwaire Yesu, yagenda ahimbire omusaraba gwe, baahika omu kiikaro ekirukwetwa eky'Oruhanga, kandi omu Ruhebburaayo: Gologota.

¹⁸Oku nuho baamubambire hamu n'abandi babiri, omu ha rubaju rw'obulyo ondi ha rubaju rw'emoso, Yesu abali hagati.

¹⁹Pilaato yahandiika ekirango, yakita ha musaraba. Kihandiikirweho kiti: “Yesu owa Nazareeti, Omukama w'Abayudaaya.”

²⁰Ekirango eki kikasomwa Abayudaaya baingi, habwokuba ekiikaro nambere akaba abambirwe kikaba kiri haihi n'orubuga; kandi kikaba kihandiikirwe omu Ruhebburaayo, omu Rulatini, n'omu Rugiriiki.

²¹Baanyakatagara abakuru b'Abayudaaya nukwo kugambira Pilaato bati: “Otahandiika oti: ‘Omukama w'Abayudaaya’; baitu handiika oti: ‘Omuntu onu akeeyeta Omukama w'Abayudaaya.’ ”

²²Pilaato yabagarukamu ati: “Eki mpandiikire, nikyo mpandiikire.”

²³Abaserikale obu baamazire kubamba Yesu, baatwara ebyokujwara bye, baabiteeka emiteeko ena, buli muserikale yabagana omuteeko gumu. Baitu ekanzu ye ekaba etaina rubaziiro, ekaba erukirwe yoona kuruga ha bikya kuhika ha mukugiro.

²⁴Nukwo bbo kugambirangana bati: “Tutagitaagura, baitu tugiterre itomo, turole ow'aragitwara.” Eki kikabaho okuhikiriza ekyahandiikirwe kiti: “Bakabagana ebijwaro byange, ekanzu yange bakagiterra itomo.”

²⁵Kandi abaserikale abo nukwo baakozire bati. Haihi n'omusaraba gwa Yesu hakaba heemeriireho nyina, na nyinento, na Mariya muka Kileyopa, na Mariya Magadaleena.

²⁶Yesu obu yarozire nyina n'omwegesebwa ou yagonzaaga beemeriire haihi, yagambira nyina ati: “Mukazi, omwana waawe ngugwo!”

²⁷Kandi yagambira omwegesebwa ogu ati: “Nyoko ngugwo!” Okuruga obu omwegesebwa yamutwara omuka ye.

²⁸Ebi obu byahoire, Yesu amazire kumanyire kimu byona nkooku bihoire (kandi okuhikiriza Ebyahandiikirwe), yagamba ati: “Iroho lindi kubi.”

²⁹Aho hakaba hateekerweho ebbakuli ijwire amarwa agasaaliire, baibikamu ekijumankuba, baakita ha rubingo, baakihikya ha kanwa ke.

³⁰Yesu obu yamazire kunyunyuguza amarwa agasaaliire, yagamba ati; “Kihoire”; yainamya omutwe, yacwekana.

³¹Ekiro eki kikaba kiri ky'Okweteekaniriza ebiro bikuru. Habw'okutagonza emitumbi ikale ha misaraba ha kiro kya Sabbato (habwokuba Sabbato egi ekaba eri nkuru), Abayudaaya nukwo kusaba Pilaato abaserikale ab'okuhenda amaguru g'abaabambirwe, nukwo bahanuule emitumbi.

³²Abaserikale baija, baahenda amaguru g'ow'okubanza, n'ag'ondi abakaba babambirwe nawe.

³³Obu baahikire hali Yesu, baasanga afiire ira, tibaamuhenda maguru.

³⁴Baitu omu ha baserikale yamucumita icumu omu rubaju, ahonaaho haarugamu esagama n'amaizi.

³⁵Ogu ayarozire kinu, akakigumya-kandi eki yagumize ky'amazima, naamanya nkooku arukubaza amananu-nukwo na inywe mwikirize.

³⁶Ebi bikabaho bihikirize ekyahandiikirwe kiti: “Talihendwa igufa na limu.”

³⁷Kandi ekyahandiikirwe ekindi ekirukugamba kiti: “Balimurora ou baacumisire.”

³⁸Ebi obu byahoire, Yosefu owa Arimateya, ow'akaba ali mwegesebwa wa Yesu, hatali bwerebwere habw'okutiina Abayudaaya, yasaba Pilaato amwikirize kutwara omutumbi gwa Yesu. Pilaato yamwikiriza. Yosefu yaija, yahanuura omutumbi, yagutwara.

³⁹Nikodemo, ogu ayaizire hali Yesu ekiro, nawe yaija yaleeta ekitabe ky'emigaju n'eseeta, ebirukuhika kilo nka makumi ana na itano.

⁴⁰Baatwara omutumbi gwa Yesu, baaguzinga omu ngoye za bafuta, batairemu ebirukuboya, engeso z'Abayudaaya ez'okuziika nkooku zikaba ziri.

⁴¹Haihi n'ekiikaro eki yabambirwemu, hakaba haroho orugonjo orunyakurumu ekituuro ekihyaka ekitakaziikwamuga muntu.

⁴²Omu nuho baaziikire Yesu, habwokuba kikaba kiri kiro ky'Abayudaaya eky'okweteekaniriza Sabbato, kandi ekituuro eki kikaba kiri haihi.