Read Runyoro - rutooro Yoh 2 Bible Online

Yoh 2 - Runyoro - rutooro bible

Yoh 2

¹Obu haahingwireho ebiro bisatu, hakabaho obugenyi bw'obugole omu Kana orwa Galiraaya; na nyina Yesu akabutaaha.

²Yesu nawe akaraalizibwa ha bugenyi hamu n'abeegesebwa be.

³Eviini obu yahoire, nyina Yesu yamugambira ati: “Eviini ebahoireho.”

⁴Yesu nukwo kumugarukamu ati: “Mukazi, okwetaaga kwawe tinukwo kwange akasumi kange tikakahikire.”

⁵Baitu nyina yagambira abaheereza ati: “Kyona eki arakabagambira, mukikole.”

⁶Kandi hakaba haroho entugiro z'amabaale mukaaga ezi baataireho habw'omurwa gw'Abayudaaya ogw'okunaaba; buli emu yarugwamuga engemeko makumi abiri rundi makumi asatu.

⁷Yesu nukwo kugambira abaheereza ati: “Entugiro ezi muziijuze amaizi.” Baaziijuliza kimu okuhika ha migoma.

⁸Yabagambira ati: “Hati mutaheho, mutwarre mukuru w'obugenyi.” Baamutwarra.

⁹Mukuru w'obugenyi obu yarolezeeho amaizi agafookere viini, kandi atamanyire nambere yarugire (baitu abaheereza abaatahire amaizi bbo bakamanya), nukwo kweta kigabura,

¹⁰yamugambira ati: “Omuntu weena abanza kuteeka eviini enungi; abantu obu bamara kuhaaguka, nubwo abaha kaizi; baitu iwe okyaina empotole okuhika hati!”

¹¹Eki nikyo ekyamahano eky'okubanza Yesu eki yakozire. Akakikorra omu Kana orwa Galiraaya, yayoleka ekitiinisa kye; n'abeegesebwa be baamwikiriza.

¹²Ebi obu byahoire, Yesu yagenda Kafaranaumu, hamu na nyina n'abagenzi be n'abeegesebwa be; baamarayo ebiro bike.

¹³Ekiro eky'obugenyi bw'Abayudaaya obw'okwijuka Okuhingurwaho kikaba kiri haihi kuhika, Yesu nukwo kugenda Yerusaalemu.

¹⁴Obu yataahire omunju ya Ruhanga yasangamu abantu abakaba nibatunda ente, entaama, n'amaiba, hamu n'abarukuhingisa sente nibakora emirimo yabo.

¹⁵Uwe yayongosa omuguha, boona yababinga omunju ya Ruhanga, hamu n'ente n'entaama zaabo. Sente z'abarukuhingisa yaziseesa hansi, yajuumika emeeza zaabo.

¹⁶Yagambira abo abakaba nibatunda amaiba ati: “Ebi byona mubiihe hanu. Enju ya Taata muleke kugifoora nju y'obusuubuzi.”

¹⁷Abeegesebwa nubwo baijukire nkooku kyahandiikirwe kiti: “Ihali ry'enju yaawe likammaramu omutima.”

¹⁸Aho Abayudaaya baamukaguza bati: “Oratwoleka karorwaho ki akarukukukoza binu?”

¹⁹Yesu yabagarukamu ati: “Museese Enju ya Ruhanga enu, nyowe ndagaruka ngyemereze omu biro bisatu.”

²⁰Nukwo Abayudaaya kumugambira bati: “Enju ya Ruhanga enu ekatwara emyaka makumi ana na mukaaga kugyombeka, kandi iwe oraagyemerereza omu biro bisatu?”

²¹Baitu uwe, Enju ya Ruhanga yabalizeeho, nugwo mubiri gwe.

²²Kandi obu yamazire kuhumbuuka omu bafu, abeegesebwa be nubwo baijukire nkooku yakibalizeeho; baikiriza Ebyahandiikirwe n'ebigambo Yesu ebi yagambire.

²³Obu akaba ali Yerusaalemu ha bugenyi obw'okwijuka Okuhingurwaho, baingi bakamwikiriza, bamazire kurora ebirukuhuniriza ebi yakozire;

²⁴baitu Yesu atabahwereyo,

²⁵habwokuba akaba naamanya abantu boona, kandi akaba atarukwetaaga muntu n'omu amumanyise ebya mugenzi we. Ningira uwe wenka akaba naamanya ebiri omu mutima gw'omuntu.