Read Runyoro - rutooro Yoh 20 Bible Online

Yoh 20 - Runyoro - rutooro bible

Yoh 20

¹Ha kiro ky'okubanza omu wiiki [1] Mariya Magadaleena akaija ha kituuro nyenkya kara, obwire butakakiire. Yasanga ibaale liihirwe ha munwa gw'ekituuro.

²Nukwo kwiruka yagenda hali Simooni Petero n'omwegesebwa oli, Yesu ou yagonzaaga. Yabagambira ati: “MUKAMA, omukituuro bamwihiremu, kandi titurukumanya nambere bamutaire.”

³Aho Petero n'omwegesebwa oli baaturuka, baagenda ha kituuro.

⁴Bombi bairuka, baitu omwegesebwa oli yasiga Petero, yamubanza ha kituuro.

⁵Obu yainamire kulinguzaamu, yarora engoye eza bafuta zitairwe aho, baitu uwe atataahemu.

⁶Nubwo Simooni Petero yaija amuhondiire, yataaha omu kituuro, yarora engoye eza bafuta zitairwe aho,

⁷n'ekitambaara ekikaba kiri ha mutwe gwe kitali hamu n'engoye eza bafuta; baitu kikubirwe, kitairwe ha wakyo kyonka.

⁸Nubwo omwegesebwa oli, ayabandize kuhika ha kituuro, nawe yataahamu, yarora, yaikiriza.

⁹Obusumi obu bwona, bakaba batakeetegeriize ekyahandiikirwe ekirukugamba ngu, kimuhikiriire kuhumbuuka omu bafu.

¹⁰Hanyuma abeegesebwa abo baagarukayo owaabubo.

¹¹Baitu Mariya yasigara ayemeriire aheeru y'ekituuro, narra. Nubwo yainamire kulinguza omu kituuro,

¹²yarora bamalaika babiri bajwaire ebirukwera, baikaliire nambere omutumbi gwa Yesu gukaba gutairwe, omu ha musego, ondi ha mirambi.

¹³Nukwo bbo kumukaguza bati: “Mukazi iwe, noolizibwa ki?” Yabagarukamu ati; “Habwokuba MUKAMA wange bamutwaire, kandi tindukumanya nambere bamutaire.”

¹⁴Obu yagambire eki yahinduka, yarora Yesu ayemeriire aho, baitu atamanye nkooku ali nuwe.

¹⁵Nukwo Yesu kumukaguza ati: “Mukazi iwe, noolizibwa ki? Nooserra oha?” Kandi Mariya habw'okugira ngu nuwe omulimi w'orugonjo oru, yamugarukamu ati: “Waitu, obu araaba ali niiwe omutwaire, ngambira nambere omutaire, ngende mmwiheyo.”

¹⁶Nubwo Yesu yamwesire ati: “Mariya.” Uwe yakubuutuka, yamwetebuka omu Ruhebburaayo ati: “Rabboni!” (amakuru gaakyo: Mwegesa).

¹⁷Yesu yamugambira ati: “Otankwataho, habwokuba tinkatembere hali Isenyowe, baitu genda hali bagenzi bange obagambire oti: nintemba hali Isenyowe kandi Isiinywe, hali Ruhanga wange kandi Ruhanga wanyu.”

¹⁸Mariya Magadeleena yagenda, yagambira abeegesebwa ati: “Ndozire MUKAMA waitu”; kandi yabamanyisa ebigambo ebi yamuragiire.

¹⁹Ha kiro eki omu kairirizi, ekiro eky'okubanza omu wiiki, abeegesebwa bakaba beekingiire omu nju habw'okutiina Abayudaaya. Yesu akaija yabeemerra hagati, yabaramukya ati: “Obusinge bube na inywe.”

²⁰Obu yamazire kugamba eki, yabooleka ebiganja bye n'orubaju rwe. Aho abeegesebwa baasemererwa habw'okurora MUKAMA.

²¹Yesu yayongera yagamba ati: “Obusinge bube na inywe, Isenyowe nkooku yantumire na nyowe nukwo ndukubatuma.”

²²Obu yamazire kugamba eki, yabaikiza orwoya, nabagambira ati: “Mutunge Mwoyo Ahikiriire.

²³Aba muliganyira ebibi biribaganyirwa; kandi aba mutaliganyira ebibi, tibiribaganyirwa.”

²⁴Baitu Tomasi, arukwetwa Omurongo, omu ha ikumi na babiri, akaba atali nabo Yesu obu yaizire.

²⁵Nukwo abeegesebwa abandi kumugambira bati: “Turozire MUKAMA.” Uwe yabagarukamu ati: “Obu ntaarole bihuta by'emisumaali omu biganja bye nkabitamu orukumu rwange, ntakakwasire n'engaro zange omu rubaju rwe, tindukwija kwikiriza.”

²⁶Obu haahingwireho ebiro munaana, abeegesebwa be nabwo bakaba bali omunju, na Tomasi abarumu. Enyigi zikaba zikingirwe, baitu Yesu yaija yabeemerra hagati, yabaramukya ati: “Obusinge bube na inywe”.

²⁷Nubwo yagambiire Tomasi ati: “Taahya hanu orukumu rwawe, kandi rora ebiganja byange; leeta engaro yawe ogite omu rubaju rwange; leka kuhakana, baitu ikiriza.”

²⁸Tomasi yamugarukamu ati: “MUKAMA wange kandi Ruhanga wange!”

²⁹Nandiki Yesu ati: “Waikiriza habw'okundora? Baina omugisa abaikiriza bataina eki baarozire.”

³⁰Haroho n'ebikorwa ebindi bingi Yesu ebi yakoliire omu maiso g'abeegesebwa be, ebitarahandiikirwe omu kitabu kinu;

³¹baitu binu bikahandiikwa nukwo mwikirize Yesu nkooku ali Kristo, Omwana wa Ruhanga; kandi habw'okwikiriza oku, mutunge obwomeezi omuli Uwe.