Read Runyoro - rutooro Yoh 21 Bible Online

Yoh 21 - Runyoro - rutooro bible

Yoh 21

¹Ebi obu byahoire, Yesu yagaruka yayeyoleka abeegesebwa be ha nyanja ya Tiberiya. Akabeeyoleka ati:

²Simooni Petero, na Tomasi arukwetwa Omurongo, Nasanairi owa Kana orwa Galiraaya, na batabani ba Zebedaayo, n'abeegesebwa abandi babiri bakaba bali hamu.

³Simooni Petero yabagambira ati; “Nyowe ningenda kusoha.” Nabo baamugarukamu bati: “Na itwe katugende hamu.” Baagenda, baataaha omu bwato; baitu ekiro eki batakwase kantu.

⁴Obwire obu bukaba nibukya, Yesu yayemerra ha musa gw'enyanja; baitu abeegesebwa be batamanye nkooku ali uwe.

⁵Yesu yabakaguza ati: “Boojo, mukwasizeho encu?” Baamugarukamu bati: “Nangwa.”

⁶Nandiki uwe ati: “Munage akatimba ha rubaju rw'obulyo orw'obwato, nimwija kukwasa.” Baakanagayo, baitu hanyuma batasobole kukasika kukataahya omu bwato, habw'encu kuba nyingi.

⁷Nubwo omwegesebwa Yesu ou yagonzanga yagambiire Petero ati: “Ni MUKAMA!” Obu yahuliire ngu, nuwe MUKAMA, Simooni Petero ou akaba ali busa habw'okusoha, yajwara orugoye rwe, yayesimba omu nyanja.

⁸Baitu abeegesebwa abandi baija nibagoya obwato, nibacunda akatimba akaijwire encu, habwokuba bakaba bali haihi n'obwerre nka mita kikumi mu abiri.

⁹Obu baahikire ha bwerre, baasanga omurro gw'amakara hatalikirweho encu n'emigaati.

¹⁰Yesu yabagambira ati; “Muleeteho encu ezimu ezi mwaruga kukwasa.”

¹¹Simooni Petero nukwo kugaruka omu bwato, yakurra akatimba, yakahikya ha bwerre kaijwire encu nkooto kikumi mu ataano na isatu; baitu noobu ziraaba zabaire nyingi ziti, akatimba katataaguke.

¹²Yesu yabagambira ati: “Mwije, mulye ekyanyenkya.” Kandi busaho n'omu ha beegesebwa ayalengereho kumukaguza ati: “Niiwe oha?” Bakamanya nkooku ali nuwe MUKAMA.

¹³Yesu yaija, yakwata omugaati, yagubagabira, kandi encu nayo yagibagabira.

¹⁴Ogu nugwo gwabaire murundi gwa kasatu Yesu okubonekera abeegesebwa be, amazire kuhumbuuka omu bafu.

¹⁵Obu baamazire kulya ekyanyenkya, Yesu yakaguza Simooni Petero ati: “Simooni, mutabani wa Yohaana, nongonza kukira banu?” Yamugarukamu ati: “Ego, MUKAMA wange, noomanya nkooku ndukukugonza.” Nandiki Yesu ati: “Liisa obwana bw'entaama zange.”

¹⁶Yesu yamukaguza omurundi gwa kabiri ati: “Simooni, mutabani wa Yohaana nongonza?” Yamugarukamu ati: “Ego, MUKAMA wange, noomanya nkooku ndukukugonza.” Nandiki Yesu ati: “Rolerra entaama zange.”

¹⁷Yamukaguza omurundi gwa kasatu ati: “Simooni, mutabani wa Yohaana, nongonza?” Petero yatuntura habw'okumukaguza omurundi gwa kasatu ati: “Nongonza?” Nukwo kumugarukamu ati: “MUKAMA wange, iwe omanyire byona; noomanya nkooku ndukukugonza.” Nandiki Yesu ati: “Liisa entaama zange.

¹⁸Mali mali ninkugambira nti: Obu okaba oli musigazi, wayeteegaga orukoba, ogenda nambere wagonzaaga; baitu obu oliba ogurusire, oligorra, emikono yaawe, ondi akubohe, akutwale nambere otarukugonza kugenda.”

¹⁹(Eki akakigamba kwoleka omulingo Petero ogu alifeeramu nkooku gulihaisa Ruhanga ekitiinisa.) Nubwo yamugambiire ati: “Mpondera.”

²⁰Petero yakubuutuka, yarora omwegesebwa oli Yesu ou yagonzaaga, abahondiire. Nuwe ogu ayaigamiire Yesu ha kifuba nibalya ekyekiro, kandi ayamukagwize ati: “MUKAMA, nooha arukwija kukugobeza?”

²¹Petero obu yamuboine, yakaguza Yesu ati: “MUKAMA wange, kandi onu aliba ata?”

²²Nandiki Yesu ati: “Obu ndaaba ningonza aikaleho okuhika obu ndiija, iwe nookijunaana ki? Mpondera!”

²³Orugambo oru rwararanga omu bagenzi babo ngu, omwegesebwa ogu talifa. Yesu atagambire Petero ngu, talifa; baitu akagamba ati: “Obu ndaaba ningonza aikaleho okuhika obu ndiija, iwe nookijunaana ki?”

²⁴Omwegesebwa oli nuwe arukugumya binu byona, kandi nuwe yabihandiikire; nitumanya ebi arukugamba nkooku biri by'amazima.

²⁵Haroho n'ebindi bingi Yesu ebi yakozire; byona kakuba byahandiikirwe buli kimu, ninteekereza nti: tihaakubaireho mwanya omunsi ogw'okubyahuramu.