Read Runyoro - rutooro Yoh 3 Bible Online

Yoh 3 - Runyoro - rutooro bible

Yoh 3

¹Omu Bafalisaayo hakaba harumu omuntu omu, ibara lye Nikodemo, ow'akaba ali mulemi mu Bayudaaya.

²Omusaija ogu akaija hali Yesu ekiro, yamugambira ati: “Rabbi, nitumanya nkooku oli mwegesa ayarugire hali Ruhanga; habwokuba busaho muntu n'omu asobora kukora ebihuniriza nk'ebi okora, rundi buli Ruhanga ali nawe.”

³Yesu yamugarukamu ati: “Mali mali ninkugambira nti: Omuntu obu atazaarwa buhyaka, tasobora kurora obukama bwa Ruhanga.”

⁴Nukwo Nikodemo kumukaguza ati: “Omuntu asobora ata kuzaarwa, kandi kunu akuzire? Asobora kugaruka omu nda ya nyina, nukwo azaarwe?”

⁵Yesu yamugarukamu ati: “Mazimakwo ninkugambira nti: Omuntu obu atazaarwa omu maizi n'omu Mwoyo Ahikiriire, tasobora kutaaha omu bukama bwa Ruhanga.

⁶Eki ekizaarwa omubiri guba mubiri, kandi eki ekizaarwa Omwoyo guba mwoyo.

⁷Baitu oleke kuhunirizibwa eki nkugambiire nti: ‘Nimusemerra okuzaarwa buhyaka.’

⁸Omuyaga guteera, nigutwara nambere gurukugonza, kandi iwe oguhurra nkooku gurukuteera; baitu tomanya nambere gurukuruga rundi nambere gurukugenda. Nukwo kiba kiti na hali abo abazairwe Mwoyo.”

⁹Nikodemo yamukaguza ati: “Mara eki nikisoboka kita?”

¹⁰Nandiki Yesu ati: “Ebi iwe torukubimanya, kandi kunu oli mwegesa w'Abaisirairi?

¹¹Mazimakwo ninkugambira nti: Nyowe ngamba ebi ndukumanya, kandi ngumya ebi ndozire; baitu inywe timwikiriza obwakaiso bwange.

¹²Obu ndaaba mbagambiire eby'omunsi, timwabiikiriza; muraasobora muta kwikiriza obu ndabagambira eby'omwiguru?

¹³Busaho n'omu aratembere omwiguru, kwihaho ogu ayarugireyo, nuwe Mwana w'omuntu.

¹⁴Kandi Musa nkooku yahanikire enjoka omwirungu, n'Omwana w'omuntu nukwo asemeriire kuhanikwa ati;

¹⁵weena arukumwikiriza atunge obwomeezi obutahwaho.”

¹⁶Kumanya Ruhanga yagondeze ensi, akahayo Omwana we omu wenka, nukwo weena arukumwikiriza aleke kuhwerekerra, baitu atunge obwomeezi obutahwaho.

¹⁷Ningira Ruhanga atatume Omwana we omunsi kugisingisa omusango; baitu akamutuma agijune.

¹⁸Anyakumwikiriza tasingwa musango; baitu atamwikiriza gumazire ira kumusinga, habwokuba taikiriize Omwana omu wenka owa Ruhanga.

¹⁹Ha gurukumusingira nuho hanu: omusana gukaija omunsi, baitu abantu baagonza omwirima kukira omusana, habwokuba ebikorwa byabo byali bibi.

²⁰Weena anyakukora kubi anoba omusana kandi agwetantara, nukwo ebikorwa bye bireke kurorwa.

²¹Baitu weena anyakukora eby'amazima ayehikye ha musana, nukwo ebikorwa bye birorwe bwerebwere, habwokuba bikozirwe nkooku Ruhanga agonza.

²²Ebi obu byahoire, Yesu yagenda n'abeegesebwa be omwisaza lya Buyudaaya; yaikarayo nabo naabatiza.

²³Yohaana nawe akaba naabatiriza Ainoni haihi na Saliimu, habwokuba hakaba haliyo amaizi maingi. Abantu baijaga nibabatizibwa.

²⁴Obu, Yohaana akaba atakatairwe omu nkomo.

²⁵Aho hakaimukaho empaka hagati y'abeegesebwa ba Yohaana n'Omuyudaaya omu, ha by'okwezibwa.

²⁶Nukwo boona kwija hali Yohaana baamugambira bati: “Mwegesa, omusaija ow'akaba ali na iwe nseeri ya Yorudaani, omuntu ou watubalizeeho, ngunu ali hanu naabatiza; kandi abantu boona nibagenda nambere ali.”

²⁷Yohaana yabagarukamu ati: “Omuntu tasobora kutunga kintu kyona atakihairwe Ruhanga.

²⁸Inywe inywenka nimugumya nkooku nagambire nti: Nyowe tindi Kristo, baitu nkatumwa kumwebembera.

²⁹Anyakuba n'omugole nuwe muswezi; enganjani y'omuswezi anyakumwikara haihi naamuhuliriza, uwe asemererwa muno okuhurra iraka ly'omuswezi. Okusemererwa nk'oku nukwo nyinakwo, kandi kwijwire.

³⁰Uwe naasemerra kweyongera omu kitiinisa, baitu nyowe ninsemerra kugarukirra.”

³¹Anyakuruga haiguru akira boona; baitu anyakuruga omunsi aikara ali w'ensi, kandi agamba eby'ensi. Anyakuruga omwiguru akira boona,

³²kandi agumya ebi yarozire n'ebi yahuliire; baitu busaho n'omu anyakwikiriza obwakaiso bwe.

³³Anyakwikiriza obwakaiso bwe aba agumiize kimu Ruhanga nkooku ali w'amazima.

³⁴Ningira Ruhanga ou yatumire, ayegesa ebigambo bya Ruhanga, habwokuba akamuha Mwoyo atarukubalirra.

³⁵Ruhanga Ise agonza Mwana, kandi ebintu byona akabimukwasa.

³⁶Anyakwikiriza Mwana, aina obwomeezi obutahwaho; baitu atarukworobera Mwana, talitunga bwomeezi; kandi obukaya bwa Ruhanga obutagarukirra bumwikaraho.