Read Runyoro - rutooro Yoh 4 Bible Online

Yoh 4 - Runyoro - rutooro bible

Yoh 4

¹MUKAMA Yesu obu yamanyire nkooku Abafalisaayo bahuliire naatendeka abeegesebwa kandi naabatiza baingi kukira Yohaana

²(Yesu wenka noobu araaba atarabatiize, baitu abeegesebwa be nubo baabatiize),

⁴Eki kikamuhambiriza kuraba ogwa Samaliya.

⁵Nukwo yahikire ati omu rubuga rwa Samaliya orurukwetwa Siikari, haihi n'ekibanja Yakobbo eki akaba ahaire mutabani we Yosefu.

⁶Omu kiikaro eki hakaba harumu iziba lya Yakobbo. Kandi Yesu habw'okujwahibwa orugendo yaikarra ha rubaju rw'iziba. Zikaba ziri nka saaha mukaaga omu ihangwe.

⁷Hakaija omukazi Omusamaliya kutaha amaizi. Yesu yamusaba ati: “Mpa amaizi nnyweho.”

⁸Obu, abeegesebwa be bakaba bagenzire omu rubuga kugura ebyokulya.

⁹Omukazi Omusamaliya yamukaguza ati: “Kisoboka kita iwe Omuyudaaya kunsaba eky'okunywa, kunu nyowe ndi Musamaliya?” Habwokuba Abayudaaya tibateerana n'Abasamaliya.

¹⁰Yesu yamugarukamu ati: “Kakuba omanyire ekisembo kya Ruhanga n'ogu arukukusaba ati: ‘Mpa amaizi nnyweho’, na iwe waakumusabire akuhe amaizi g'obwomeezi.”

¹¹Nukwo omukazi kumukaguza ati: “Waitu k'otaina eky'okutahisa, kandi n'iziba lihamire; amaizi ago ag'obwomeezi noija kugaiha nkaha?

¹²Iwe nookira isenkuru itwe Yakobbo ayatuhaire iziba linu, uwe wenka eri yanywahoga n'abaana be, akeeseraho n'ente ze?”

¹³Yesu yamugarukamu ati: “Weena anyakunywa ha maizi ganu, aligaruka kukwatwa iroho;

¹⁴baitu weena alinywa ha maizi aga ndimuha, ogu taligaruka kukwatwa iroho ebiro byona. Amaizi aga ndimuha galifooka omuli uwe nsoro y'amaizi agarukugera okumuhikya omu bwomeezi obutahwaho.”

¹⁵Omukazi yamugambira ati: “Waitu mpaho amaizi ago, nukwo ndeke kukwatwaga iroho n'okugaruka hanu kuleeta amaizi.”

¹⁶Yesu yamugambira ati: “Genda oyete baro, ogaruke hanu.”

¹⁷Nandiki omukazi ati: “Tinyina iba nyowe.” Yesu yamugambira ati: “Obalize ekihikire kugamba oti: ‘Tinyina iba nyowe’;

¹⁸habwokuba okaswerwa abasaija bataano, kandi n'ow'oinawe hati, na uwe tali baro. Eki obalize ky'amazima.”

¹⁹Omukazi yamugambira ati: “Waitu, nyetegeriize nkooku oli murangi.

²⁰Baisenkuru itwe baaramizaaga ha rusozi runu; baitu inywe mugamba ngu, Yerusaalemu nikyo kiikaro abantu eki basemeriire kuramizamu.”

²¹Yesu yamugarukamu ati: “Mukazi iwe, onyikirize, habwokuba akasumi nikaija kuhika aka mutaliramizaamu Isenyowe ha rusozi runu, noobu haakuba omu Yerusaalemu.

²²Inywe muramya eki mutarukumanya; baitu itwe turamya eki turukumanya, habwokuba okujunwa kuruga omu Bayudaaya.

²³Baitu akasumi kali haihi, kandi nuko kanu, abaramya omu mazima aka baliramizaamu Isenyowe omu mwoyo n'omu mazima; abaramya bati, nubo Ruhanga asiima.

²⁴Ruhanga aba mwoyo, kandi abo abamuramya nibasemerra okumuramya omu mwoyo n'omu mazima.”

²⁵Nukwo omukazi kumugambira ati: “Mmanyire Mesiya (nuwe ogu Mukama ou yakomere namuseesaho amagita) nkooku ali w'okwija kandi obu aliija alitumanyisa ebintu byona.”

²⁶Yesu yamugambira ati: “Nyowe arukubaza na iwe, ninyowe ogu.”

²⁷Omu kasumi ako abeegesebwa be baagaruka, baahunirra habw'okumusanga naabaza n'omukazi, baitu busaho n'omu ayamukagwize ati: “Obaire noomugonzaaho ki?” Rundi ati: “Habwaki obaire noobaza na uwe?”

²⁸Omukazi yasigaho ensoha ye, yagaruka omu rubuga, yagambira abantu ati:

²⁹“Mwije murole omusaija angambiire byona ebi nakozire. Ogu taakuba Kristo?”

³⁰Bbo baaruga omu rubuga, baija nambere Yesu ali.

³¹Omu kasumi ako, abeegesebwa be baamwesengereza bati: “Mwegesa, ebyokulya mbinu, lyaaho.”

³²Uwe yabagarukamu ati: “Nyowe nyina ebyokulya inywe ebi mutarukumanya.”

³³Nukwo abeegesebwa be kukaguzangana bati: “Haroho anyakumuleetiire ebyokulya?”

³⁴Nandiki Yesu ati: “Ebyokulya byange nukwo kukora Ogu ayantumire ebi agonza, n'okuhikiriza omulimo gwe.

³⁵Inywe timurukugamba ngu: ‘Hakyasigaire ameezi ana, igesa lihike’? Nyowe nimbagambira nti: Mwimukye amaiso ganyu, murole emisiri nkooku eyezire, ehikire kugeswa.

³⁶Ogu anyakugesa aheebwa empeera kandi asorooza ebijuma eby'okumuhikya omu bwomeezi obutahwaho, nukwo omusigi n'omugesi basemererwe hamu.

³⁷Nikyo orufumo ruhikira orurukugamba ruti: ‘Omu asiga, ondi agesa.’

³⁸Nkabatuma kugesa eki mutaratalibaniire; abandi bakatalibana, baitu inywe mwaija, mwabagana ha kutalibana kwabo.”

³⁹Abasamaliya baingi ab'omu rubuga oru bakamwikiriza habw'ebi omukazi yababaliize ati: “Angambiire byona ebi nakakozire.”

⁴⁰Abasamaliya obu baamuhikireho, baamwesengereza aikale nabo; nawe nukwo kumarayo ebiro bibiri.

⁴¹Kandi ebigambo bye bikaleetera abandi baingi okwikiriza.

⁴²Baagambira omukazi oli bati: “Titukyaikiriza habw'ebi watugambiire byonka, baitu twehuliriire itwenka, twamanya ngu, onu nuwe Mujuni w'ensi mali.”

⁴³Ebiro bibiri obu byahingwireho, yarugayo yagenda Galiraaya.

⁴⁴Yesu wenka akakigumya ngu, Omurangi tagira kitiinisa omunsi y'owaabu.

⁴⁵Baitu obu yahikireyo, Abagaliraaya bakamutangirra habw'okurora byona ebi yakoliire Yerusaalemu. Nabo bakaba bagenzireyo habw'obugenyi bukuru.

⁴⁶Yairrayo yahika Kana orw'omu Galiraaya, nambere yahinduliire amaizi yagafoora viini. Kandi Kafaranaumu hakaba haliyo omunyoro ow'akaba aina mutabani we arwaire.

⁴⁷Obu yahuliire Yesu nkooku arugire Buyudaaya aizire Galiraaya, yagenda yamusaba aije akize mutabani we, habwokuba akaba ali haihi n'okufa.

⁴⁸Nubwo Yesu yamugambira ati: “Obu mutarora ebihuniriza n'ebyamahano, timwikiriza.”

⁴⁹Omunyoro yamwesengereza ati: “Waitu, hikayo omwana wange atakacwekaine.”

⁵⁰Yesu yamugambira ati: “Irooko otaahe, omwana waawe akizire.” Omusaija yaikiriza Yesu eki yamugambiire, yagenda.

⁵¹Obu akaba naagarukayo, abaheereza be baamutangaana baamugambira omwana we nkooku akizire.

⁵²Yabakaguza esaaha yatandikiireho kuba kurungi. Nandiki bbo bati: “Ijo ha saaha musanju nubwo omuswija gwamurugireho.”

⁵³Ise omwana yamanya ngu, niyo saaha Yesu yamugambiiremu ati: “Omwana waawe akizire.” Na uwe wenka yaikiriza n'ab'omuka ye boona.

⁵⁴Eki nikyo ekirukuhuniriza ekya kabiri Yesu yakozire obu yarugire Buyudaaya agarukire Galiraaya.