Read Runyoro - rutooro Yoh 5 Bible Online

Yoh 5 - Runyoro - rutooro bible

Yoh 5

¹Ebi obu byahoire, hakabaho ekiro kikuru eky'obugenyi bw'Abayudaaya, na Yesu yagenda Yerusaalemu.

²Kandi Yerusaalemu, haihi n'Irembo ly'Entaama, hakaba haliyo ekidiba eki baayetaga omu Ruhebburaayo: Beetizata. Kikaba kiroho empuumuro itaano.

³Omu numwo haabyamaga abarwaire baingi: abafu b'amaiso, abalema, n'abazingamire, (bategeriize okucambaituka kw'amaizi.

⁴Obundi n'obundi malaika wa MUKAMA yasirimukaga omu kidiba eki, nukwo acambaitule amaizi. Omurwaire weena ayabanzaaga kwenagamu, amaizi gamazire kucambaituka, nuwe yakiraga endwara yoona ei yabaga arwaire.)

⁵Omu kiikaro eki hakaba harumu omusaija arwaliire emyaka asatu na munaana.

⁶Nukwo Yesu kumukaguza ati: “Noogonza kukira?”

⁷Omurwaire yamugarukamu ati: “Waitu tinyina muntu ow'okunta omu kidiba, amaizi obu gacambaituka. Nyowe obu mba ninkyagenda, nsanga ondi ambandizeemu ira.”

⁸Yesu yamugambira ati: “Imuka, ohimbe akarago kaawe, ogende.”

⁹Ahonaaho omusaija yakira, yahimba akarago ke, yagenda. Kandi ekiro eki kikaba kiri Sabbato.

¹⁰Nukwo Abayudaaya kugambira omusaija ayakiziibwe bati: “Hati kiro kya Sabbato, Ebiragiro tibirukukwikiriza kwetweka karago kaawe.”

¹¹Baitu uwe yabagarukamu ati: “Omusaija anyakunkirize nuwe angambiire ati: ‘Himba akarago kaawe, ogende.’ ”

¹²Nabo baamukaguza bati: “Ogu nuwe oha akugambiire ati: ‘Himba akarago kaawe, ogende’?”

¹³Baitu omusaija ayakiziibwe akaba atamumanyire ibara, habwokuba Yesu akaba arugire omu kitebe kyabantu baingi abakaba baijwire aho.

¹⁴Obu hahingwireho akacu kake, Yesu yamusanga omunju ya Ruhanga, yamugambira ati: “Oboine, hati wakira! Otaligaruka kusiisa, okagwerwa akabi akarukukira aho.”

¹⁵Omusaija yagenda, yagambira Abayudaaya nkooku Yesu nuwe amukirize.

¹⁶Nikyo Abayudaaya bahiiganiriize Yesu, habwokuba eki akakikora ha Sabbato.

¹⁷Baitu Yesu yabagarukamu ati: “Isenyowe nakyakora na hati hoona, kandi na nyowe ninkora.”

¹⁸Eki nikyo Abayudaaya baaseruliire muno okwita Yesu, habwokuba atacwe kiragiro kya Sabbato kyonka, baitu n'okweta Ruhanga Ise, naayeyinganiza nawe.

¹⁹Yesu nukwo kubagarukamu ati: “Mazimakwo nimbagambira nti: Mwana tasobora kukora ekintu kyona habwe wenka, rundi eki kyonka eki arora Ise naakora; habwokuba byona Ise ebi akora, Mwana nawe nibyo akora.

²⁰Ningira Ise agonza Mwana, kandi amwoleka byona ebi akora; kandi alimwoleka ebirukukira ebi, nukwo inywe muhunirre.

²¹Ise nkooku ahumbuura abafu akaboomeeza, Mwana nawe nukwo aha obwomeezi abaagonza kubuha.

²²Isenyowe tacwera muntu weena omusango, baitu okucwa omusango kwona akakulekera Mwana,

²³nukwo boona bahe Mwana ekitiinisa nkooku bakiha Ise. Ogu anyakwanga kuha Mwana ekitiinisa, takiha na Ise ayamutumire.

²⁴Mananukwo nimbagambira nti: Anyakuhurra ebigambo byange akaikiriza n'ayantumire, uwe aina obwomeezi butahwaho; kandi takyacwerwa musango; baitu aba amazire kuruga omu rufu, ataahire omu bwomeezi.

²⁵“Mazimakwo nimbagambira nti: Akasumi nikaija, kandi kahikire, abafu obu balihurra iraka ly'Omwana wa Ruhanga, kandi abalirihurra balyomeera.

²⁶Isenyowe nkooku ali ndugirro y'obwomeezi, nukwo yahaire Mwana nawe abe ndugirro y'obwomeezi;

²⁷kandi akamuha obusobozi obw'okucwa emisango, habwokuba nuwe Mwana w'omuntu.

²⁸Eki kitabahuniriza, ningira akasumi nikaija, abali omu bituuro boona obu balihurra iraka lye,

²⁹bakarugamu. Abo abaakozire ebirungi bakahumbuukira obwomeezi; kandi abo abaakozire ebibi bakahumbuukira okucwerwa omusango.

³⁰“Nyowe tinsobora kukora kintu kyona habwange, Isenyowe nkooku andagiire, nukwo ncwa omusango; kandi encwa yange y'obwinganiza, habwokuba tinserra eki ndukugonza, baitu nserra ayantumire ebi agonza.

³¹Kakuba ninyehaisa nyenka, buli obwakaiso bwange tibuli bw'amazima.

³²Haroho ondi arukumpeera obwakaiso, kandi nimmanya obwakaiso obu arukumpeera nkooku buli bw'amazima.

³³Inywe mukatuma abantu hali Yohaana, na uwe yaha obwakaiso ha mazima.

³⁴Obwakaiso obu naatungire butagumibwe muntu; baitu eki nkigambire nukwo inywe mujunwe.

³⁵Yohaana akaba ali taara erukwaka kandi erukumulika, na inywe mukaikiriza kandi mukasiima abamulikire kumara akasumi kake.

³⁶Baitu nyowe nyina obwakaiso oburukukira obwa Yohaana; habwokuba emirimo Isenyowe yampaire kuhikiriza, emirimo egi ei ndukukora, niyo yonyini erukungumya nkooku naatumirwe Isenyowe.

³⁷Kandi Isenyowe ayantumire nuwe wonyini yamperiire obwakaiso. Iraka lye timukalihurraga, n'ensisana ye timukagiroraga;

³⁸ekigambo kye tikiri omu myoyo yanyu habwokuba timurukwikiriza ogu ou yatumire.

³⁹“Muserra muno omu Byahandiikirwe, nimuteekereza ngu, omuli byo numwo muliiha obwomeezi obutahwaho; kandi kunu ninyowe mbiheera obwakaiso;

⁴⁰baitu inywe mwanga kwija hali nyowe, nukwo mutunge obwomeezi.

⁴¹Nyowe tinserra kitiinisa omu bantu;

⁴²baitu nimbamanya nkooku mutarukugonza Ruhanga.

⁴³Nkaija omwibara lya Isenyowe, timwantangirra; kakuba ondi naija omu ibara lye wenka, ogu nimwija kumutangirra.

⁴⁴Nimusobora muta okwikiriza, inywe abarukuhangana ekitiinisa kandi mutarukuserra kitiinisa ekiruga hali Ruhanga omu wenka?

⁴⁵Muleke kuteekereza ngu, ninyija kubarumiriza kubasingisa omusango hali Isenyowe; kyonka Musa ou murukwesiga, nuwe akubarumiriza omusango.

⁴⁶Kakuba mwaikiriize Musa, na nyowe mwakunyikiriize, habwokuba ninyowe yahandiikireho;

⁴⁷baitu obu muraaba mutarukwikiriza ebi yahandiikire, muraikiriza muta ebi ndukugamba?”