Read Runyoro - rutooro Yoh 6 Bible Online

Yoh 6 - Runyoro - rutooro bible

Yoh 6

¹Ebi obu byahoire, Yesu yarugayo yayambuka nseeri y'Enyanja ya Galiraaya, niyo Enyanja ya Tiberiya.

²Ekitebe ky'abantu baingi kyamuhondera, habw'okurora ebihuniriza ebi yakozire naakiza abarwaire.

³Yesu yatemba omu nsozi, yaikarra hansi hamu n'abeegesebwa be.

⁴Obu, ekiro kikuru ky'Abayudaaya eky'okwijuka Okuhingurwaho kikaba kiri haihi kuhika.

⁵Yesu obu yaimukize amaiso, yarora ekitebe ky'abantu baingi nikiija nambere ali, yakaguza Filipo ati: “Turaagura nkaha emigaati abantu banu ei baraalya?”

⁶Eki akakimukaguza naamulenga, habwokuba uwe wenka akaba naamanya eki araakora.

⁷Filipo yamugarukamu ati: “Edinali bikumi bibiri tizisobora kugura migaati erukumara nukwo buli omu alyeho akacweka.”

⁸Omu ha beegesebwa be, Andereya, mugenzi wa Simooni Petero, yamugambira ati:

⁹“Hanu haroho omwojo anyakwina emigaati etaano n'encu ibiri; baitu ebi biragasa ki ha bantu abarukwingana aho?”

¹⁰Nandiki Yesu ati: “Mwikalize abantu.” Aho hakaba haroho obunyansi bwingi; abasaija abakaba nibahika nk'enkumi itaano baikarra hansi.

¹¹Aho Yesu yakwata emigaati, obu yamazire kusiima, yagigabira abakaba baikaliire; yabaha n'encu balya nkooku barukugonza.

¹²Obu baigusire, yagambira abeegesebwa be ati: “Oburagalika obusigaireho mubusorooze, hataburaho na kamu.”

¹³Baabusorooza, baijuza ebigega ikumi na bibiri oburagalika obwasaagire ha migaati etaano ey'engano ei baaliire.

¹⁴Abantu obu baarozire ekintu ekirukuhuniriza eki akozire, baagamba bati: “Mananukwo onu nuwe murangi ow'okwija omunsi!”

¹⁵Yesu obu yakengere nkooku barukwija kumukwata n'amaani bamufoole omukama wabo, yabarugamu, yagaruka wenka omu nsozi.

¹⁶Obu bwahikire rwebagyo, abeegesebwa be baasirimuka, baahika ha nyanja,

¹⁷baagwerra omu bwato, baatandika kwambuka enyanja nibagenda Kafaranaumu. Obwire bukaba bwaira, kandi na Yesu akaba atakabahikireho.

¹⁸Enyanja yasikuka habw'omuyaga mwingi ogukaba niguteera.

¹⁹Obu baagoyereho nka kilomita ina rundi itaano, baarora Yesu naarubatira ha maizi nairirra obwato, baatandika kutiina.

²⁰Baitu uwe yabahuumuza ati: “Ninyowe, muleke kutiina.”

²¹Obu, baasemererwa kumutaahya omu bwato, kandi ahonaaho obwato bwahika ha bwerre nambere bakaba nibagenda.

²²Ha kiro ekyakurasireho, abantu abakaba basigaire nseeri y'enyanja barora nkooku hakaba haroho obwato bumu bwonka, kandi Yesu nkooku atabugweriiremu n'abeegesebwa be, baitu bbo bakaba bagenzire bonka.

²³Nubwo amato agandi agaarugire Tiberiya gairra haihi n'ekiikaro nambere baliriire emigaati, MUKAMA obu yamazire kusiima.

²⁴Abantu obu baayetegeriize Yesu nkooku ataliyo, noobu baakubaire abeegesebwa be, baagwerra omu maato ago, baagenda Kafaranaumu nibamuserra.

²⁵Obu baamusangire nseeri y'enyanja, baamukaguza bati: “Mwegesa, kunu oizireyo di?”

²⁶Nandiki Yesu ati: “Mazimakwo nimbagambira nti: Timunserwire habw'okurora ebihuniriza, baitu munserwire habwokuba mukalya emigaati, mwaiguta.

²⁷Muleke kutalibanira ebyokulya ebirukuhwaho, baitu mwekambire ebirukwikaraho, ebiribahikya omu bwomeezi obutahwaho. Ebi nibyo Omwana w'omuntu alibaha, habwokuba Ruhanga Ise akamutaho emanyikirizo ey'obusobozi bwe.”

²⁸Baamukaguza bati: “Tuli b'okukora ki okuhikiriza emirimo Ruhanga ei asiima?”

²⁹Yesu yabagarukamu ati: “Omulimo Ruhanga ogu asiima nugwo gunu: inywe kwikiriza ogu ou yatumire.”

³⁰Baamukaguza bati: “Kihuniriza ki eki osobora kutwoleka nukwo tukakwikiriza? Waakukora ki?

³¹Baisenkuru itwe bakalya maanu omwirungu nkooku kyahandiikirwe kiti: ‘Akabaha ebyokulya ebyarugire omwiguru, baalye.’ ”

³²Yesu yabagarukamu ati: “Mananukwo nimbagambira nti: Musa ti nuwe yabahaire ebyokulya ebyarugire omwiguru; baitu Isenyowe akabaha ebyokulya eby'amazima ebiruga omwiguru.

³³Habwokuba ebyokulya bya Ruhanga nibyo ebi ebiruga omwiguru kandi ebyomeeza ab'omunsi.”

³⁴Nandiki bbo bati: “Waitu ebyokulya ebi obituhege butoosa.”

³⁵Yesu yabagarukamu ati: “Ninyowe by'okulya by'obwomeezi. Anyakwija nambere ndi, talirumwa njara; kandi anyakunyikiriza, taligaruka kukwatwa iroho.

³⁶Naruga kubagambira nti: Okurora mukandora, baitu mutaikirize.

³⁷Boona Isenyowe aba ampa, baliija nambere ndi; kandi anyakwija nambere ndi, tindimubinga.

³⁸Habwokuba ntaruge omwiguru kukora ebi ndukugonza, baitu kukora ayantumire ebi agonza;

³⁹kandi ayantumire eki agonza nukwo kutaburwaho n'omu hali abo aba yampaire, baitu mbahumbuule ha kiro kya ha mpero.

⁴⁰Habwokuba Isenyowe eki agonza nikyo kinu: weena anyakurora Mwana, akamwikiriza, atunge obwomeezi obutahwaho; kandi ndimuhumbuura ha kiro kya hampero.”

⁴¹Nubwo Abayudaaya baamuhyemiire, habwokuba akagamba ati: “Ninyowe byokulya ebyarugire omwiguru.”

⁴²Bbo baakaguzangana bati: “Onu ti nuwe Yesu mutabani wa Yosefu, ise na nyina aba turukumanya? Kandi hati naagamba ata, ngu: ‘Nkaruga omwiguru?’ ”

⁴³Yesu yabagarukamu ati: “Muleke kutontoroma inywenka.

⁴⁴Busaho n'omu asobora kwija nambere ndi, ataleesirwe Isenyowe ayantumire; kandi ogu ndimuhumbuura ha kiro kya ha mpero.

⁴⁵Kikahandiikwa omu bitabu by'abarangi kiti: ‘Boona balyegesebwa Ruhanga.’ Omuntu weena ayahuliire kandi ayayegesiibwe Isenyowe, nuwe anyakwija nambere ndi.

⁴⁶Tikuli kugamba ngu, haroho ararozire Isenyowe, kwihaho ogu ayarugire hali Ruhanga, nuwe yamurozire.

⁴⁷Mazimakwo nimbagambira nti: Anyakwikiriza, nuwe atunga obwomeezi obutahwaho.

⁴⁸Ninyowe byokulya by'obwomeezi.

⁴⁹Baisenkuru inywe bakalya maanu omwirungu, baafa.

⁵⁰Baitu binu nibyo byokulya ebiruga omwiguru, ebyokulya omuntu ebyasobora kulyaho nukwo aleke kufa.

⁵¹Ninyowe byokulya eby'obwomeezi ebyarugire omwiguru. Weena anyakulya ha byokulya binu alyomeera ebiro byona; kandi ebyokulya ebindiha ab'omunsi kuboomeeza nugwo mubiri gwange.”

⁵²Nubwo Abayudaaya baatandikire kuteera empaka bonka na bonka nibakaguzangana bati: “Onu naasobora ata kutuha omubiri gwe kugulya?”

⁵³Yesu yabagarukamu ati: “Mazimakwo nimbagambira nti: Obu muraaba mutaliire omubiri gw'Omwana w'omuntu, mukanywa n'esagama ye, timulyomeera.

⁵⁴Anyakulya omubiri gwange, akanywa n'esagama yange, aba n'obwomeezi obutahwaho kandi ndimuhumbuura ha kiro kya ha mpero.

⁵⁵Habwokuba omubiri gwange nikyo kyokulya mali, n'esagama yange nikyo kyokunywa mali.

⁵⁶Anyakulya omubiri gwange akanywa n'esagama yange, aikara omuli nyowe na nyowe nyikara omuli uwe.

⁵⁷Isenyowe omwomeezi nkooku yantumire, na nyowe nyomeera habwe, nukwo na weena anyakundya araayomeera habwange.

⁵⁸Binu nibyo byokulya ebyarugire omwiguru, tibiri nk'ebi baisenkuru inywe baaliire, baafa. Anyakulya ebyokulya binu alyomeera ebiro byona.”

⁵⁹Ebi akabigambira omu isorrokaniro ly'Abayudaaya, obu akaba naayegesa omu Kafaranaumu.

⁶⁰Baingi omu beegesebwa be obu baahuliire ebi, baagamba bati: “Ebigambo binu ka bigumire. Nooha asobora kubihuliriza?”

⁶¹Baitu Yesu obu yamanyire abeegesebwa nkooku babihyemiire, yabakaguza ati: “Eki kibeesitaize?

⁶²Kandi kyakubaire kita kakuba murozire Omwana w'omuntu naatemba naagaruka nambere yarugire?

⁶³Omwoyo, nugwo gwomeeza omuntu; omubiri tigwina mugaso. Ebigambo ebi mbagambiire nibyo by'omwoyo n'obwomeezi.

⁶⁴Baitu haroho abamu omuli inywe abatarukwikiriza.” Okuruga omu kubanza Yesu akamanya abo abataramwikiriize, yamanya n'ogu arukwija kumugobeza.

⁶⁵Yayongera yagira ati: “Nikyo mbagambiriirege nti: Busaho n'omu asobora kwija nambere ndi rundi buli aikiriziibwe Isenyowe.”

⁶⁶Okuruga obu baingi ha beegesebwa be baamurugaho, batagaruke kugenda na uwe.

⁶⁷Nubwo Yesu yakagwize ikumi na babiri ati: “Na inywe nimugonza kundugaho?”

⁶⁸Simooni Petero yamugarukamu ati: “MUKAMA wange, turaagenda hali oha? Ka niiwe oina ebigambo by'obwomeezi obutahwaho.

⁶⁹Itwe tukaikiriza kandi twamanya nkooku oli Ahikiriire wa Ruhanga.”

⁷⁰Nukwo Yesu kubagarukamu ati: “Tali nyowe ayabakomere inywe ikumi na babiri? Baitu omu omuli inywe, wa Sitaani.”

⁷¹Obu, akaba naabazaaho Yuda mutabani wa Simooni wa Kalyota, habwokuba omu ikumi na babiri nuwe ow'akaba naija kumugobeza.