Read Runyoro - rutooro Yoh 7 Bible Online

Yoh 7 - Runyoro - rutooro bible

Yoh 7

¹Ebi obu byahoire, Yesu yatandika kugendagenda omu isaza Galiraaya; atagonze kuraba omu Buyudaaya, habwokuba Abayudaaya bakaba nibaserra kumwita.

²Kandi obugenyi bw'Abayudaaya obw'Ensiisira bukaba buli haihi kuhika.

³Nukwo bagenzi be kumugambira bati: “Ruga hanu, ogende Buyudaaya, abeegesebwa baawe barole ebi orukukora.

⁴Omuntu obu aserra kumanywa burole, ebye tabikora omu nsita. Kandi iwe nkooku orukukora ebi byona, obyoleke abantu boona, babirole.”

⁵Nangwa n'abagenzi be bakaba batakamwikiriize.

⁶Nukwo Yesu kubagarukamu ati: “Akasumi kange tikakahikire, baitu akasumi kanyu kaikaraho butoosa.

⁷Inywe abantu tibasobora kubanoba, baitu banobere nyowe, habwokuba nimbooleka ebikorwa byabo nkooku biri bibi.

⁸Inywe nu, mugende ha bugenyi; nyowe tindukwija kugendayo habwokuba akasumi kange tikakahikiire kimu.”

⁹Obu yamazire kugamba ebi, yaikara Galiraaya.

¹⁰Bagenzi be obu baamazire kugenda ha bugenyi, nawe yagendayo. Atagende abantu nibamurora, baitu omu nsereko.

¹¹Abayudaaya bakaba nibamuserra ha bugenyi, nibeekaguza bati: “Ali nkaha?”

¹²Hakabaho okuhwehweterrangana kwingi omu bantu hali uwe. Abamu baagamba bati: “Muntu murungi”; abandi bati: “Nangwa, naahabisa abantu”.

¹³Baitu habw'okutiina Abayudaaya, busaho n'omu ayamubalizeeho bbwa.

¹⁴Obugenyi obu bwahikire hagati, Yesu yaimuka, yagenda omunju ya Ruhanga, yatandika kwegesa.

¹⁵Abayudaaya baahunirra nibagamba bati: “Omuntu onu, amagezi ganu akagaiha nkaha kandi kunu takeegesebwaga?”

¹⁶Yesu nukwo kubagarukamu ati: “Ebi ndukwegesa tibiri byange, baitu by'Ogu ayantumire.

¹⁷Omuntu weena obu agonza kukora Ruhanga ebi asiima, naija kumanya ebi ndukwegesa obu biraaba nibiruga hali Ruhanga, rundi byange habwange.

¹⁸Anyakwegesa ebye habwe, aba naayeserurra ekitiinisa baitu arukuserra ekitiinisa ky'Ogu ayamutumire, nuwe w'amazima kandi ataina bugobya.

¹⁹Musa atabahe Biragiro? Baitu omuli inywe busamu n'omu arukubikwata. Nimuserurra ki kunyita?”

²⁰Nukwo abantu kumugarukamu bati: “K'oina Sitaani! Nooha arukuserra kukwita?”

²¹Nandiki Yesu ati: “Nyowe nkakora ekintu ekyabahuniriize inywena.

²²Musa akabaragira okusarwa (tinukwo kugamba ngu: okusarwa kunu kukatandikira hali Musa, nangwa; baitu kukarugirirra kimu hali baisenkuru inywe kuruga ira); kandi na inywe musara omuntu ha Sabbato.

²³Omuntu obu araaba naasarwa ha Sabbato, nukwo Ebiragiro bya Musa bireke kucwibwa, habwaki nimumbiihirirwa habw'okukiza omubiri gwona gw'omuntu ha kiro kya Sabbato?

²⁴Muleke kucwa emisango nimurorra ha nzooka y'omuntu, baitu mucwege emisango omu bwinganiza.”

²⁵Abantu abamu aba Yerusaalemu baakaguzangana bati: “Omusaija onu tinuwe barukuserra kwita?

²⁶Darawe naabaza bbwa, kandi tibaina eki bamugambiire! Rundi abalemi bananukire kwo onu nkooku ali Kristo?

²⁷Ningira itwe nitumanya onu nambere aruga; baitu Kristo obu aliija, busaho n'omu alimanya nambere arukuruga.”

²⁸Nubwo Yesu, ow'akaba naayegesa omunju ya Ruhanga, yagambire n'iraka likooto ati: “Ego, nyowe mummanyire, kandi nimumanya nambere naarugire. Ntaije habwange nyenka baitu haroho ayantumire, Ogu w'amazima, kandi inywe timurukumumanya.

²⁹Nyowe mmumanyire, habwokuba nkaruga hali Uwe, kandi nuwe yantumire.”

³⁰Aho baaserra kumukwata; baitu busaho n'omu ayamutaireho engaro, habwokuba akasumi ke kakaba katakahikire.

³¹Obu, abantu baingi bakamwikiriza nibagamba bati: “Mara Kristo obu aliija, alikora ebyamahano ebirukukira eby'onu?”

³²Abafalisaayo bakahurra abantu nkooku barukumubazaaho obuntamantama. Ekyarugiremu: banyakatagara abakuru n'Abafalisaayo nukwo kutuma abalinzi b'Enju ya Ruhanga bamukwate.

³³Nubwo Yesu yagambire ati: “Nkyali na inywe okumara akasumi kake; nukwo ngaruke hali Ogu ayantumire.

³⁴Mulinserra, timulinzoora; kandi nambere ndi timulisobora kuhikayo.”

³⁵Abayudaaya nukwo kukaguzangana bati: “Onu naagonza kugenda nkaha nambere tutalimuzoora? Naayenda kugenda omu Bayudaaya abaararangiire omu Bagiriiki nukwo ayegese Abagiriiki?

³⁶Naaba naamanyisa ki obu arukugamba ati: ‘Mulinserra, timulinzoora’; kandi ati: ‘Nambere ndi timulisobora kuhikayo’?”

³⁷Ha kiro kikuru eky'okumalirra obugenyi, Yesu akeemerra mu bantu naagamba n'iraka likooto ati: “Obu haraaba haroho anyakwina iroho, aije nambere ndi, anywe.

³⁸Anyakunyikiriza, nk'Ebihandiiko Ebirukwera oku bigamba: ‘Obwambu bw'amaizi g'obwomeezi buligera niburuga omunda ye.’”

³⁹Eki akakigamba ha Mwoyo Ahikiriire, abarukumwikiriza ou bakaba bali b'okutunga. Omu kasumi ako Mwoyo akaba atakagabirwe, habwokuba Yesu akaba atakanyumiziibwe.

⁴⁰Obu baahuliire ebigambo ebi, abamu muli bo baagamba bati: “Onu nuwe kwo murangi oli,”

⁴¹Abandi bati: “Onu nuwe Kristo.” Baitu abandi baakaguza bati: “Mara Kristo w'okuruga Galiraaya?

⁴²Ebyahandiikirwe tibirukugamba ngu, Kristo ali w'okuruga omu ruganda rwa Daudi, kandi omu Betelehemu, ekyaro Daudi eki yaikairemu?”

⁴³Nahabweki haabaho okwebaganiza omu bantu hali uwe.

⁴⁴Abamu bakagonza kumukwata, baitu busaho n'omu ayamutaireho engaro.

⁴⁵Nubwo abakuru b'abalinzi baagarukire hali baanyakatagara abakuru n'Abafalisaayo; abo baabakaguza bati: “Ekibatangire kumuleeta kiki?”

⁴⁶Abakuru b'abalinzi baabagarukamu bati: “Busaho n'omu arabalize nk'omuntu ogu!”

⁴⁷Abafalisaayo nukwo kubakaguza bati: “Kandi na inywe muhabisiibwe?

⁴⁸Omu balemi rundi omu Bafalisaayo harumu abaramwikiriize?

⁴⁹Ekitebe kinu ky'abantu ekitamanyire Biragiro, ky'okukyenwa.”

⁵⁰Baitu omu omuli bo, nuwe Nikodemo ayaizire hali Yesu kara, yabakaguza ati:

⁵¹“Ebiragiro byaitu bisingisa omuntu omusango batabandize kumutonganiza n'okumanya eki yakozire?”

⁵²Baamugarukamu bati: “Ntamanya na iwe oli Mugaliraaya? Serra, oraarora Galiraaya nkooku etali y'okurugwamu omurangi.”

⁵³Bbo baagenda, buli muntu yakwata ogw'owaabu.