Read Runyoro - rutooro Yoh 8 Bible Online

Yoh 8 - Runyoro - rutooro bible

Yoh 8

¹Yesu akatemba ha rusozi rw'emiti Oliva.

²Omu rukyakya yagaruka omunju ya Ruhanga; abantu boona baija nambere ali, yaikarra yabeegesa.

³Abeegesa b'ebiragiro baaleeta omukazi ou baakwasire naasiihana. Baamwemereza hagati y'abantu,

⁴baagambira Yesu bati: “Mwegesa, omukazi onu akwasirwe naasiihana.

⁵Kandi omu Biragiro, Musa akaturagira omuntu nk'ogu kumuteeza amabaale, afe. Hati iwe noomugambaho ki?”

⁶Eki bakakikaguza nibamutega, nukwo batunge eki baraamujunaana. Baitu Yesu yainama hansi, yahandiika n'orukumu rwe ha itaka.

⁷Obu baayeyongiire kumukaguza, yainunuka yabagarukamu ati: “Omuli inywe atakasiisaga, nuwe abanze kumuhungurra ibaale,”

⁸Yagaruka yainama, yayongera kuhandiikisa orukumu ha itaka.

⁹Bbo obu baahuliire eki, baakwomoka omu omu, abakuru nubo baabandize, okuhika Yesu obu yasigaire wenka n'omukazi ayemeriire omu maiso ge.

¹⁰Yesu yainunuka yamukaguza ati: “Mukazi iwe, bali nkaha? Busaho n'omu anyakukusingisize omusango?”

¹¹Omukazi yamugarukamu ati: “Taroho, Mukama wange.” Nandiki Yesu ati: “Na nyowe tindukukusingisa musango. Irooko ogende, kyonka otaligarukira kusiisa obundi.”

¹²Yesu yayongera yabagambira ati: “Ninyowe kyererezi ky'ensi. Anyakumpondera taligendera omu mwirima, baitu alitunga ekyererezi ky'obwomeezi.”

¹³Nubwo Abafalisaayo baamugambiire bati: “Iwe nooyebazaaho wenka ebirungi, nikyo ebi orukwebalizaaho bitarukubeera by'amazima.”

¹⁴Yesu yabagarukamu ati: “Noobu ndaaba ninyebazaaho nyenka, ebi ndukwebazaaho by'amazima, habwokuba nimmanya nambere naarugire kandi nambere ndukugenda; baitu inywe timurukumanya nambere naarugire noobu haakuba nambere ndukugenda.

¹⁵Inywe mucwa emisango nimurorra ha nsisana y'omuntu, baitu nyowe tinyina ou ncwera omusango.

¹⁶Noobu ndaaba nincwa, encwa yange eba y'amazima, habwokuba tali nyowe nyenka anyakucwa; baitu ndi hamu n'Oli ayantumire.

¹⁷Omu Biragiro byanyu kikahandiikwa kiti: Obwakaiso bw'abantu babiri buba bw'amazima.

¹⁸Nsobora kuba ninyebazaaho nyenka, baitu Isenyowe ayantumire nawe ampaho obwakaiso.”

¹⁹Nukwo bbo kumukaguza bati: “Sso ali nkaha?” Yesu yabagarukamu ati: “Nyowe timurukummanya, kandi na Isenyowe timumumanyire. Kakuba mummanyire, na Isenyowe mwakumumanyire.”

²⁰Ebi akabigamba ali omu kikeeto, obu akaba naayegesa omunju ya Ruhanga; baitu busaho n'omu ayamukwasire, habwokuba akasumi ke kakaba katakahikire.

²¹Yesu yagaruka kubagambira ati: “Nyowe ninyija kugenda; inywe mulinserra, baitu mulifeera omu bibi byanyu; habwokuba nambere ndukugenda timusobora kwijayo.”

²²Nubwo Abayudaaya baakaguzangana bati: “Naija kweita? Nikyo arukugambira ati: ‘Nambere ndukugenda timusobora kwijayo’?”

²³Uwe yabagarukamu ati: “Inywe muli b'ensi enu, nyowe ndi w'omwiguru. Inywe muli b'ensi, baitu nyowe tindi w'omunsi munu.

²⁴Nikyo mbagambiriire nti: Mulifeera omu bibi byanyu. Mazimakwo obu muraaba mutarukunyikiriza nkooku ninyowe ogu, mulifeera kwo omu bibi byanyu.”

²⁵Nabo nukwo kumukaguza bati: “Baitu si niiwe oha?” Nandiki Yesu ati: “Eki nkakibasoborra okuruga kara.

²⁶Na hati nyina bingi eby'okubagambaho n'eby'okubasingisa omusango; hati Ogu ayantumire w'amazima, kandi ebi yanyegeseze nibyo ndangirra ensi yoona.”

²⁷Bbo bateetegereze nkooku arukubagambira hali Ise.

²⁸Yesu nukwo kubagambira ati: “Obu mulimara kuhanika Omwana w'omuntu, nubwo mulimanya nkooku ninyowe ogu; kandi nkooku ntarukukora ebyange habwange, baitu ndangirra Isenyowe ebi yanyegeseze.

²⁹Ogu ayantumire aikara na nyowe; atansige nyenka, habwokuba butoosa nkora ebi asiima.”

³⁰Obu akaba naabaza ebigambo ebi, baingi baamwikiriza.

³¹Nubwo Yesu yagambiire Abayudaaya abaamwikiriize ati: “Obu muraagumiraga ha kigambo kyange, muliba beegesebwa bange mali.

³²Mulimanya amazima, kandi amazima galibafoora b'obugabe.”

³³Bbo nukwo kumugarukamu bati: “Itwe tuli baijukuru ba Abburahamu, titukatungwaga muntu weena. Noogenderra ki kugamba oti: ‘Muliba b'obugabe’?”

³⁴Aho Yesu yabagarukamu ati: “Mazimakwo nimbagambira nti: Weena anyakukora ekibi, aba mwiru rubaale w'ekibi.

³⁵Kandi omwiru taikara omuka ebiro byona. Omwana nuwe aikarra kimu omuka.

³⁶Nahabweki Mwana wonyini obu araaba naabafoora b'obugabe, muliba b'obugabe mali.

³⁷Ninkimanya nkooku muli baijukuru ba Abburahamu; baitu nabwo nimuserra kunyita, habwokuba timurukwikiriza bigambo byange.

³⁸Nyowe ninyegesa ebi naarozire hali Isenyowe, kandi na inywe mukora ebi mwayegere hali isiinywe.”

³⁹Nukwo bbo kumugarukamu bati: “Abburahamu nuwe isiitwe.” Nandiki Yesu ati: “Kakuba mubaire baana ba Abburahamu, mwakukozire Abburahamu nkooku yakozire;

⁴⁰baitu hati nimuserra kunyita, nyowe anyakubagambiire amazima aga nahuliire hali Ruhanga. Abburahamu atakole ati.

⁴¹Inywe nimukora isiinywe nkooku yakozire.” Baamugarukamu bati: “Itwe tituli bitwekano; twina Isiitwe omu, nuwe Ruhanga.”

⁴²Nandiki Yesu ati: “Kakuba Ruhanga abaire ali Isiinywe, mwakungondeze, habwokuba nkaija ninduga hali Ruhanga. Ntaije habwange nyenka, baitu nuwe yantumire.

⁴³Habwaki mutarukwetegereza ebi ndukugamba? Habwokuba timwina mutima ogw'okworobera ebigambo byange.

⁴⁴Inywe, isiinywe nuwe Sitaani, nikyo mugondeza kukora isiinywe ebi agonza. Uwe akaba mwisi okuruga kara na kara, amazima tagaroho, habwokuba omuli uwe tihabamu mazima. Obu abiiha ebisuba, aba naayeyoleka nkooku ali; habwokuba mubiihi w'ebisuba, kandi nuwe ndugirro y'ebisuba.

⁴⁵Nyowe mbaza amazima, nikyo kibatanga kunyikiriza.

⁴⁶Nooha omuli inywe arukunyomereza ekibi? Obu ndaaba nimbaza amazima, habwaki mutanyikiriza?

⁴⁷Owa Ruhanga ahurra ebigambo bya Ruhanga. Inywe, eki mutarukubihulirra, habwokuba timuli ba Ruhanga.”

⁴⁸Abayudaaya baamugarukamu bati: “Tinikyo tugambire tuti: Oli Musamaliya, kandi oina omwoyo mubi?”

⁴⁹Nandiki Yesu ati: “Nangwa, tinyina mwoyo mubi, baitu ntamu Isenyowe ekitiinisa; kandi inywe nimungaya.

⁵⁰Nyowe tinyeserurra kitiinisa. Haroho omu anyakukinserurra kandi nuwe alicwa emisango.

⁵¹Mazimakwo nimbagambira nti: Weena anyakukwata ekigambo kyange, talifa ebiro byona.”

⁵²Abayudaaya nukwo kumugambira bati: “Hati, twamanya nkooku oina omwoyo mubi. Abburahamu akafa n'abarangi baafa, kandi iwe noogamba oti: ‘Weena anyakukwata ekigambo kyange talifa ebiro byona.’

⁵³Iwe nookira isenkuru itwe Abburahamu ayafiire? Abarangi nabo ka bakafa. Baitu nooyeyeta oha?”

⁵⁴Yesu yabagarukamu ati: “Obu ndaaba ninyeha nyenka ekitiinisa, ekitiinisa kyange kya busa. Isenyowe ou mweta Ruhanga wanyu, nuwe ampa ekitiinisa.

⁵⁵Baitu inywe timumumanyire; ninyowe arukumumanya. Kandi obu ndagamba nti: Timmumanyire, ninyija kuba mubiihi w'ebisuba nka inywe; baitu nyowe mmumanyire, kandi nkwata ebigambo bye.

⁵⁶Isiinywe Abburahamu akasemererwa okumanya nkooku alirora ekiro kyange. Akakirora kandi yakyanganuka.”

⁵⁷Nubwo Abayudaaya baamukagwize bati: “Tokahikize emyaka ataano y'obukuru, kandi niiwe warozire Abburahamu?”

⁵⁸Nandiki Yesu ati: “Mazimakwo nimbagambira nti: Abburahamu atakabaireho, nyowe nkaba ndoho.”

⁵⁹Nubwo baakomere amabaale kugamuhungurra; baitu Yesu yayesereka, yaturuka omunju ya Ruhanga.