Read Runyoro - rutooro Yoh 9 Bible Online

Yoh 9 - Runyoro - rutooro bible

Yoh 9

¹Yesu obu akaba naahingura, yarora omuntu ayazairwe ali mufu w'amaiso.

²Nukwo abeegesebwa be kumukaguza bati: “Mwegesa, onu kuzaarwa afiire amaiso, ayasiisire nooha? Nuwe rundi abazaire be?”

³Yesu yabagarukamu ati: “Onu atasiise, noobu baakubaire abazaire be; baitu kinu kikabaho nukwo entegeka ya Ruhanga eyolekerwe omuli uwe.

⁴Nyowe kimpikirirre kuhikiriza entegeka y'Ogu ayantumire bukyali nyamusana; obwire nibwija kwira, omuntu obw'atasobora kukorramu.

⁵Akasumi koona aka nkyali omunsi, ndi musana gwayo.”

⁶Obu yamazire kugamba eki, yacwa amacwanta hansi, yatuga itaka, yalimusiiga ha maiso,

⁷yamugambira ati: “Genda onaabe omu kiyanja kya Silohamu” (amakuru gaakyo ngu, Atumirwe). Yagenda yanaaba, yagaruka naarora.

⁸Nukwo abataahi be n'abandi abaamuroraga naasabiiriza kukaguza bati: “Onu tinuwe muntu ayaikarraga naasabiiriza?”

⁹Abamu baagarukamu bati: “Ego, nuwe”; n'abandi bati: “Nangwa, naamusisana kwonka.” Nukwo omusaija kubagambira ati: “Ninyowe.”

¹⁰Bbo baamukaguza bati: “Amaiso gaawe gaigukire gata?”

¹¹Nandiki uwe ati: “Omuntu arukwetwa Yesu atugire itaka, yalinsiiga ha maiso, yandagira ati: ‘Genda onabe omu kiyanja kya Silohamu’; nagenda, nanaaba, narora.”

¹²Baamukaguza bati: “Ali nkaha ogu?” Yabagarukamu ati: “Timmanyire.”

¹³Omusaija ow'akaba afiire amaiso bamutwarra Abafalisaayo.

¹⁴Kikaba kiri kiro kya Sabbato, Yesu obu yatugire itaka, yaigura amaiso ge.

¹⁵Abafalisaayo baagaruka baamukaguza nkooku amaiso ge gaigukire. Yabagarukamu ati: “Ansiigire itaka ha maiso, nagenda, nanaaba, narora.”

¹⁶Abamu omu Bafalisaayo nukwo kugamba bati: “Omuntu onu tatumirwe Ruhanga, habwokuba tafaaho Sabbato.” Abandi baakaguza bati: “Omuntu omusiisi naasobora ata kukora ebirukuhuniriza nka binu?” Boona tibaasobora kwikirraniza.

¹⁷Baagaruka baakaguza ow'akaba afiire amaiso bati: “Ogu akwigwire amaiso, iwe noomugambaho ki?” Yabagarukamu ati: “Murangi.”

¹⁸Abayudaaya bataikirize nkooku akaba afiire amaiso kandi gaiguka, okuhika obu baayesire abazaire be,

¹⁹baabakaguza bati: “Onu nuwe mutabani wanyu, ou murukugamba ngu, akazaarwa afiire amaiso? Hati naarora ata?”

²⁰Abazaire be baabagarukamu bati: “Tumanyire onu nkooku ali mwana waitu, kandi akazaarwa afiire amaiso;

²¹baitu hati nkooku arukurora, titurukukimanya; kandi n'ogu amwigwire amaiso titurukumumanya. Mumukaguze; muntu mukuru, ayegambirre wenka.”

²²Abazaire be ekyabagambisize kiti, nukwo kutiina Abayudaaya, habwokuba bakaba baikirraniize ngu, weena araayatura Yesu nkooku ali Kristo, w'okubingwa omu isorrokaniro lyabo.

²³Nikyo abazaire be bagambiire bati: “Muntu mukuru, mumwekagulize.”

²⁴Abayudaaya baagaruka baayeta omusaija ow'akaba afiire amaiso, baamugambira bati: “Kugiza Ruhanga! Itwe nitumanya omusaija ogu nkooku ali musiisi.”

²⁵Uwe yabagarukamu ati: “Nyowe tindukumanya obu araaba ali musiisi. Kinu nikyo ndukumanya: nkaba nfiire amaiso, hati nindora.”

²⁶Baamukaguza bati: “Akukozireho ki? Amaiso gaawe agaigwire ata?”

²⁷Yabagarukamu ati: “Mbagambiire ira, baitu mwayanga kuhurra. Nimugondeza ki kukihurra obwa kabiri? Na inywe nimwenda kufooka beegesebwa be?”

²⁸Bbo baatandika kumujuma nibagamba bati: “Niiwe mwegesebwa we, itwe tuli ba Musa.

²⁹Nitumanya Ruhanga nkooku yabalize na Musa, baitu omuntu ogu titurukumanya nambere yarugire.”

³⁰Nandiki omusaija ati: “Ka kyamahano inywe okutamanya nambere yarugire, kandi kunu anyigwire amaiso!

³¹Tumanyire Ruhanga nkooku atahurra basiisi; baitu weena anyakumuramya, akakora ebi agonza, nuwe Ruhanga ahurra.

³²Ensi yakaba kubaho tikikahulirwaga nkooku haroho ayaigwire amaiso g'omuntu ayazairwe ali mufu w'amaiso.

³³Omuntu ogu kakuba atararugire hali Ruhanga, busaho eki yakusoboire kukora.”

³⁴Bbo baamugarukamu bati: “Iwe ayazaalirwe omu bibi bisa, waija kutwegesa?” Baamubingira aheeru.

³⁵Yesu akahurra nkooku bamubingire. Obu yamuzoire, yamukaguza ati: “Noikiriza Omwana w'omuntu?”

³⁶Uwe yamugarukamu ati: “Waitu nuwe oha, nukwo mmwikirize?”

³⁷Nandiki Yesu ati: “Omurozire, nuwe ogu arukubaza na iwe.”

³⁸Yagamba ati: “MUKAMA wange, ninyikiriza.” Yamuramya.

³⁹Yesu nukwo kugambira ekitebe ky'abantu ati: “Ekyandeesire omunsi nukwo kucwa emisango. Nukwo abatarukurora barole, kandi abarukurora bafooke bafu b'amaiso.”

⁴⁰Abamu ha Bafalisaayo abakaba bamuli haihi, obu baahuliire eki, nubwo bamukagwize bati: “Na itwe tuli bafu b'amaiso?”

⁴¹Nandiki Yesu ati: “Kakuba mubaire muli bafu b'amaiso, timwakubaire na musango; baitu hati habw'okugamba muti: ‘Niturora’, nikyo omusango gwanyu gurukwikarraho.”