Read Runyoro - rutooro Ebik 1 Bible Online

Ebik 1 - Runyoro - rutooro bible

Ebik 1

¹Omu kitabu eky'okubanza eki nakuhandiikiire, Teofilo, nkahandiikamu byona Yesu ebi yakozire n'ebi yayegeseze okuruga ha kubanza

²okuhika ha kiro eki yatwaliirweho omwiguru, amazire kuraganiza abakwenda aba yayekomiire kubatwekera Mwoyo Ahikiriire.

³Obu yamazire kufa ha musaraba, akabeeyoleka ayomiire, naakigumya n'ebirukuhuniriza bingi. Kandi akamara ebiro makumi ana naababonekera, naabagambira eby'Obukama bwa Ruhanga.

⁴Obu akaba akyali nabo ha meeza, akabaragira kutaruga Yerusaalemu, baitu baikaleyo bategeriize Ise eki yaraganiize. Eki nikyo mwahuliire nimbazaaho nti:

⁵“Yohaana akabatiza n'amaizi; baitu inywe, omu biro ebitali bingi, nimwija kubatizibwa Mwoyo Ahikiriire.”

⁶Abakwenda obu bakaba beesoroize hamu, bakakaguza Yesu bati: “Mukama, kanu nuko kasumi oraagarurramu Isirairi obukama?”

⁷Uwe yabagarukamu ati: “Tikiri kyanyu kumanya akasumi rundi ebiro Isenyowe ebi yataireho habw'obusobozi bwe.

⁸Baitu muliheebwa amaani, Mwoyo Ahikiriire obu alibaijaho; kandi muliba bakaiso bange omu Yerusaalemu, n'omu Buyudaaya yoona, n'omu Samaliya, n'okuhika ha mpero y'ensi.”

⁹Amazire kugamba ebi, yatwarwa omwiguru bamuroleriire, ekicu kyaija kyamubasiikirizaaho.

¹⁰Obu bakaba bakyaroleriire haiguru, uwe naagenda, haazooka abasaija babiri babeemeriire haihi, bajwaire engoye ezirukwera.

¹¹Baabakaguza bati: “Inywe basaija ba Galiraaya, kiki ekibeemeriize muroleriire haiguru? Yesu onu, anyakubaihirweho yatwarwa omwiguru, nukwo aligaruka ati, nkooku mwamurora naagenda.”

¹²Nubwo Abakwenda baagarukire Yerusaalemu nibaruga ha rusozi orw'emiti Oliva, oruli haihi na Yerusaalemu, nk'orugendo orwarubatwaga ha Sabbato;[1]

¹³Obu baahikireyo, baatemba omu kainabiri, nambere banu boona baikaire: Petero na Yohaana, Yakobbo na Andereya, Filipo na Tomasi, Batolomayo na Matayo, Yakobbo mutabani w'Alifaayo na Simooni Omurwanirizi w'ihanga Iye, hamu na Yuda mutabani wa Yakobbo.

¹⁴Abo boona bakaikara hamu bataireho muno omutima ha kusaba, baina na Mariya nyina Yesu hamu n'aboruganda rwe.

¹⁵Omu biro ebi, Petero akeemerra hagati y'abagenzi be (abakaba nibahika nka kikumi n'abiri), yabagambira ati:

¹⁶“Bagenzi bange, Ebyahandiikirwe bisemeriire kuhikirizibwa. Nibyo Mwoyo Ahikiriire ebi yagambisize Daudi, naaranga hali Yuda ayayebembiire abo abaakwasire Yesu.

¹⁷Ningira uwe akaba naabalirwa omuli itwe, kandi akaba ahairwe omugabo gwe omu buheereza bwaitu bunu. [

¹⁸Baitu omusaija ogu, sente ezi yasaswirwe habw'ekibi kye, akaiguramu omusiri. Hanyuma yayekenya hansi, yahuulika enda, amara goona gaseeseka.

¹⁹Eki kikamanywa boona abaikaraga Yerusaalemu; nikyo omusiri ogu, omu ngambo yabo, gwayetiirwe Akelidama, amakuru gaakyo: Omusiri gw'Esagama.]

²⁰Nkooku kyahandiikirwe omu Kitabu kya Zabbuli kiti: ‘Eka ye, leka efooke kifurukwa, hatalibaho n'omu agiikaramu.’ Kandi kiti: ‘Omulimo gwe gutwarwe ondi.’

²¹“Nahabweki tusemeriire kukoma omu ha basaija aba twagendaga nabo ebiro byona MUKAMA Yesu ebi yamazire na itwe,

²²okurugirra Yohaana obu akaba naabatiza, okuhika ha kiro Yesu eki yatwihiirweho yatwarwa omu iguru. Leka omuntu ogu afooke kaiso hamu na itwe, agumye eby'okuhumbuuka kwa Yesu.”

²³Nubwo baaleeta amabara abiri: Yosefu arukwetwa Barasaba, abamu ou baayetaga Yusito, hamu n'ondi arukwetwa Matiya.

²⁴Nukwo boona kusaba nibagamba bati: “Ai MUKAMA, iwe arukumanya emitima y'abantu boona, hali banu bombi otwoleke ou okomere,

²⁵kutwara obuheereza bunu n'obukwenda Yuda obu yanagire yayegendera.”

²⁶Baabaterra itomo, lyakwata Matiya; yabalirwa omu bakwenda ikumi n'omu.