Read Runyoro - rutooro Ebik 10 Bible Online

Ebik 10 - Runyoro - rutooro bible

Ebik 10

¹Omu rubuga Kaisaariya hakaba harumu omusaija, ibara lye Koroneeri, omukuru w'ab'amahe ab'omu kihanda ekyayetwaga ky'Abaitale.

²Uwe n'ab'eka ye boona bakaba bali bantu abaayekambiraga ediini kandi abarukutiina Ruhanga. Yagabaga n'obwenda kukoonyera abanaku b'Abayudaaya, kandi yasabaga Ruhanga atarukulekerra.

³Kiro kimu ha saaha nka mwenda ez'orwebagyo, akabonekerwa, yarora butunu malaika wa Ruhanga nataaha omunju nambere ali, naamweta ati: “Koroneeri.”

⁴Kandi Koroneeri, anyakwijwire obutiini, yamuhanga amaiso nayetebuka ati: “Kiki Taata?” Malaika yamugambira ati: “Okusaba kwawe n'okugaba kwawe bitembere nk'ekiijukyo omumaiso ga Ruhanga.

⁵Hati nu, tuma abantu Yoppa, beeteyo omuntu Simooni, arukwetwa Petero,

⁶anyakuraara omwa Simooni omuhazi w'empu, enju ye eri ha musa gw'enyanja.”

⁷Malaika ayabalize nawe obu yamazire kugenda, Koroneeri yayeta babiri ha baheereza be hamu n'omu ha baserikale abaamulindaga, omuntu ayayekambiraga muno ediini.

⁸Obu yamazire kubasoborra byona ebibaireho, yabatuma Yoppa.

⁹Ha kiro ekyakuraasireho, abaatumirwe obu bakaba nibakyagenda, bali haihi kuhika orubuga ha saaha nka mukaaga, nubwo Petero yatembere ha nju eruguru kusaba.

¹⁰Omu kasumi ako enjara yamuruma kandi yagonza kulya akantu; baitu ab'omunju obu bakaba nibakyateekaniza ebyokulya, yabonekerwa.

¹¹Yarora iguru likingwirwe, kandi ekintu ekirukusisa esuuka nkooto nikisirimuka hansi, kikwasirwe ha nsonda ina.

¹²Kikaba kirumu emiringo yoona ey'ebisoro n'ebirukwekurra n'enyonyi z'omu mwanya.

¹³Yahurra iraka nirimugamba liti: “Petero imuka; obiite olye.”

¹⁴Petero yagarukamu ati: “Nangwa, MUKAMA wange! Nyowe tinkalyaga kintu kyona ekirukuzira rundi ekitasemiire.”

¹⁵Iraka lyagaruka nirimugambira liti: “Ruhanga eki yayeriize, otalikyeta ky'omuziro.”

¹⁶Eki kikabaho emirundi esatu, hanyuma ekintu kyagarurwa omwiguru.

¹⁷Petero obu akaba akyasobiirwe naagurukyagurukya amakuru g'okubonekerwa oku, nubwo haizire abasaija abatumirwe Koroneeri, bayemerra omu irembo ly'enju ya Simooni,

¹⁸baayeranga nibakaguza Simooni arukwetwa Petero obu araaba naaraara aho.

¹⁹Petero obu akaba naakyacumiitiriza amakuru g'okubonekerwa oku, Mwoyo Ahikiriire yamugambire ati: “Haizire abasaija basatu nibakuserra.

²⁰Rahuka osirimuke, ogende nabo otarukugurukyagurukya, habwokuba ninyowe mbatumire kwija hanu.”

²¹Petero yasirimuka, yahikaho abasaija abo, yabakaguza ati: “Ou murukuserra ninyowe, muleesirwe ki?”

²²Bbo baamugarukamu bati: “Koroneeri, mukuru w'ab'amahe, omuntu ahikiriire, arukutiina Ruhanga kandi arukusiimwa Abayudaaya boona, ahabwirwe malaika wa Ruhanga kukweta oije owe, nukwo ahurre ebi oraagamba.”

²³Aho Petero yabataahya omunju, baaba bagenyi be. Obwire obu bwakiire, Petero yaimuka, yagenda nabo asendekeriziibwe abaikiriza abamu ba Yoppa.

²⁴Orubuga rwa Kaisaariya bakarutaaha ha kiro ekyakuraasireho. Baasanga Koroneeri abategeriize, amazire kweta ab'oruganda rwe n'abanywani be abandi babeho.

²⁵Petero obu yahikire ha nju, Koroneeri yaturuka aheeru, yagenda kumutangirra, yajuumara ha bigere bya Petero, yamuramya,

²⁶Baitu Petero yamwimukya naagamba ati: “Yemerra; na nyowe ndi muntu nka iwe.”

²⁷Baagenda nibabaza, baataaha omunju, baasangamu abantu baingi abaayesoroize.

²⁸Petero yatandika kubeegesa ati: “Inywena mumanyire Ebiragiro nkooku bitanga Abayudaaya okuteerana rundi okubungira abantu b'ihanga erindi; baitu nyowe, Ruhanga akaanyoleka nkooku ntasemerire kugaya omuntu weena rundi kumunuga.

²⁹Nahabweki obu baanyesire, tinyangire kwija. Kandi nikyo ndukukaguliza nti: Munyetiire ki?”

³⁰Koroneeri yamugarukamu ati: “Ebiro bbina ebihingwire, obu nkaba ninsaba omu kisiika kyange, ha saaha nk'enu ey'omwenda, nkarora omusaija anyemeriire omumaiso, ajwaire ebijwaro ebirukwangasana,

³¹yangambira ati: ‘Koroneeri, Ruhanga ahuliire okusaba kwawe, kandi aijukire n'okugaba kwawe.

³²Hati nu, tuma abantu Yoppa, beeteyo omuntu Simooni arukwetwa Petero, anyakuraara omwa Simooni omuhazi w'empu, enju ye eri ha musa gw'enyanja.’

³³Nikyo nakutumiireho ahonaaho, kandi na iwe okozire kurungi kwija. Hati nu, itwena twesoroize hanu omumaiso ga Ruhanga, nukwo tuhurre byona MUKAMA ebi akuragiire kutugambira.”

³⁴Petero yatandika kwegesa naagamba ati: “Mazima mmanyire Ruhanga nkooku atasoroora mu bantu;

³⁵baitu omu buli ihanga, weena arukumutiina akakora ebihikire, Ruhanga amusiima.

³⁶Ruhanga akahikya ekigambo kye hali Abaisirairi barangirirwe Amakuru Amarungi ag'obusinge, nakirabya omu Yesu Kristo (MUKAMA w'abantu boona).

³⁷Na inywe mumanyire ebyabaireho omu Buyudaaya yoona, okubandiza Galiraaya nambere Yohaana yayegeseze ebyokubatiza.

³⁸Mumanyire Yesu owa Nazareeti nkooku Ruhanga yamuseesereho Mwoyo Ahikiriire, yamuha n'obusobozi. Kandi habw'okukonyerwa Ruhanga, Yesu yagendagendaga naakora ebirungi, kandi naakiza boona abakaba nibagadisibwa Sitaani.

³⁹Na itwe tuli bakaiso b'ebi byona ebi yakoliire omu Buyudaaya n'omu Yerusaalemu. Yesu ogu, abantu bakamwita nibamuhanika ha muti;

⁴⁰baitu Ruhanga akamuhumbuura obu haahingwireho ebiro bisatu, yamutwoleka.

⁴¹Atamwoleke bantu boona, baitu akamwoleka itwe abakaiso Ruhanga aba yakomere kara, abaaliire na Yesu kandi baanywa nawe amazire kuhumbuuka omu bafu.

⁴²Akaturagira kwegesa n'okunanura abantu nkooku nuwe ogu Ruhanga ou yakomere kuba mucwi w'emisango y'abomiire n'abafiire.

⁴³Kandi nuwe abarangi boona baajuliire nibagumya ngu, weena arukumwikiriza naaganyirwa ebibi habw'ibara lye.”

⁴⁴Petero obu akaba naakyabaza ebi, Mwoyo Ahikiriire yasirimuka hali boona abakaba nibamuhuliriza.

⁴⁵Abaikiriza abasazirwe abaizire na Petero, bakahunirra habw'okurora abanyamahanga nabo nibaseeswaho ekisembo kya Mwoyo Ahikiriire.

⁴⁶Baitu nabo bakabahurra nibabaza endimi kandi nibahaisaniza Ruhanga. Nubwo Petero yakagwize ati:

⁴⁷“Abantu banu abatungire Mwoyo Ahikiriire nka itwe, haroho asobora kubaima amaizi ngu batabatizibwa?”

⁴⁸Yaragira babatizibwe omu ibara lya Yesu Kristo. Hanyuma baamusaba amale nabo ebiro bike.