Read Runyoro - rutooro Ebik 11 Bible Online

Ebik 11 - Runyoro - rutooro bible

Ebik 11

¹Abakwenda n'ab'oruganda abakaba bali Buyudaaya bakahurra nkooku Abanyamahanga nabo baikiriize ekigambo kya Ruhanga.

²Kandi Petero obu yagarukire Yerusaalemu, ab'omu kitebe ky'abasazirwe baamujunaana,

³nibamukaguza bati: “Kiki ekyakutwaire omu bantu abatasazirwe kandi walya nabo?”

⁴Petero yatandika kubasoborra byona nkooku byagenzire naagamba ati:

⁵“Kiro kimu obu nkaba ndi omu rubuga Yoppa ninsaba, nubwo nabonekiirwe, narora ekintu ekirukusisa esuuka enkooto nikisirimuka hansi kikwasirwe ha nsonda ina, kyampikaho.

⁶Obu nakyetegeriize, narora harumu ebisoro by'emiringo yoona, n'enyamaiswa, n'ebirukwekurra, hamu n'enyonyi z'omu mwanya.

⁷Kandi nahurra iraka niringambira liti: ‘Petero imuka; obiite olye.’

⁸Nyowe nagarukamu nti: ‘Nangwa, MUKAMA wange; habwokuba tinkalyaga kintu kyona ekirukuzirwa rundi ekitasemiire.’

⁹Baitu iraka lyaruga omu iguru omurundi gwa kabiri, nirigamba liti: ‘Ruhanga eki yayeriize, otalikyeta ky'omuziro.’

¹⁰Eki kikabaho emirundi esatu, hanyuma byona byagarurwa omu iguru.

¹¹“Omu kasumi ako konyini haija abasaija basatu, baahika ha nju ei tukaba turumu, batumirwe kuntabarra nibaruga Kaisaariya.

¹²Mwoyo Ahikiriire yandagira kugenda nabo ntarukugurukyagurukya. N'ab'oruganda abo mukaaga nabo baagenda na nyowe, twataaha mb'omusaija ogu Koroneeri.

¹³Kandi uwe yatusoborra nkooku yarozire malaika ayemeriire omu kisiika kye naagamba ati; ‘Tuma abantu Yoppa, beeteyo Simooni arukwetwa Petero;

¹⁴ogu alikwegesa ebigambo ebirukwija kukujuna hamu n'eka yaawe yoona.’

¹⁵Kandi nyowe obu natandikire kwegesa, Mwoyo Ahikiriire yabaijaho boona, nkooku yatwizireho itwe omu kubanza.

¹⁶Na nyowe naijuka MUKAMA eki yagambire ati: ‘Yohaana akabatiza n'amaizi, baitu inywe mulibatizibwa na Mwoyo Ahikiriire.’

¹⁷Hati Ruhanga obu araaba yabahaire ekisembo ekirukusisana n'eki yatuhaire obu twabandiize kwikiriza MUKAMA Yesu Kristo, nyowe ninyowe oha ayaakusoboire kutanga Ruhanga?”

¹⁸Abakwenda obu baahuliire eki, baabireka. Baatandika kukugiza Ruhanga nibagamba bati: “Hati Abanyamahanga nabo Ruhanga abahaire okwegarukamu okurukutungisa obwomeezi obutahwaho.”

¹⁹Abararangiibwe hanu na hali habw'okuhiiganizibwa okwabaireho habw'ebya Sitefano, bakagenda baahika Foinike na Kipuro na Antyokiya batarukutebeza muntu ondi weena Amakuru Amarungi kwihaho Abayudaaya bonka.

²⁰Omulibo hakaba harumu abasaija abamu, enzaarwa za Kipuro na Kirene. Obu baahikire Antyokiya baatandika kwegesa Abagiriiki, nibabarangirra Amakuru Amarungi ga MUKAMA Yesu.

²¹Obusobozi bwa MUKAMA bwabaiziramu, kandi abantu baingi baikiriza, baahindukira Mukama.

²²Ekitebe ky'abaikiriza ab'omu Yerusaalemu obu baahuliire eki, nubwo baatumire Baranaba agenda Antyokiya.

²³Obuyahikireyo, yarora embabazi Ruhanga ezi yabagiriire, yasemererwa. Boona yabateererra kugumira hali MUKAMA n'omutima gumu.

²⁴Baranaba ogu akaba ali musaija murungi, anyakwijwire Mwoyo Ahikiriire n'okwikiriza. Kandi Antyokiya oku, abantu baingi baahindukira MUKAMA.

²⁵Aho Baranaba yarugayo yagenda Taruso kuserra Saulo.

²⁶Obu yamuboine, yamuleeta Antyokiya. Bombi baamarayo omwaka gwona bali mu baikiriza baayo, nibeegesa abantu baingi. Kandi Antyokiya, nuho abeegesebwa baabandiize kwetwa Abakristo.

²⁷Obu bakaba bakyali oku, abarangi abamu bakaruga Yerusaalemu baahika Antyokiya.

²⁸Omu hali bo, omuntu anyakwetwa Agabo, yayemerra yarangisibwa Mwoyo nkooku harukwija kubaho kiihe omu nsi yoona. Niyo kiihe eyabaireho omu businge bwa Klahudiyo.

²⁹Abaikiriza bakacwamu buli muntu aheyo obukoonyezi nkooku arukusobora, ebintu babitwekere bagenzi baabo abaikara Buyudaaya.

³⁰Kandi nukwo baakozire. Ebintu baabitwekera abakuru ba Yerusaalemu, byatwarwa Baranaba na Saulo.