Read Runyoro - rutooro Ebik 12 Bible Online

Ebik 12 - Runyoro - rutooro bible

Ebik 12

¹Omu biro ebi, Herode omukama akatandika kuhiiganiza abamu ab'omu kitebe ky'abaikiriza.

²Yakobbo, mugenzi wa Yohaana, akamwisa empirima.

³Kandi obu yarozire Abayudaaya nkooku bakisiimire, yaragira bakwate na Petero. Eki kikabaho omu biro eby'obugenyi obw'okwijuka Emigaati Etatumbisiibwe.

⁴Herode obu yamazire kukwata Petero, yamuta omu nkomo, yamukwasa ebihanda bbina eby'abaserikale, bali bbana mu buli kihanda, nukwo bamulinde nibahonderangana, naagenderra kumuleeta omu maiso g'abantu ekiro kikuru eky'okwijuka Okuhingurwaho kimazire kuhwa.

⁵Petero nukwo kulindirwa omu nkomo ebiro ebi byona; baitu ekitebe ky'abaikiriza bakeekamba kumusabira hali Ruhanga.

⁶Ha kiro eki kyonyini Herode eki akaba araaliire kumuleeta omu rukurato, Petero akaba agwijagiire, ali hagati y'abaserikale babiri, aboherwe n'enjegere ibiri, kandi abalinzi abandi bali ha irembo nibalinda enkomo.

⁷Aho malaika wa MUKAMA yamubonekera, kandi ekyererezi kyayaka omu kasiika ke. Malaika yateerateera Petero ha ibega, yamusisiimura ati: “Matuka bwango!” Enjegere zaamuruga ha mikono, zaaragara.

⁸Malaika yamugambira ati: “Weteege orukoba rwawe, sabikira enkaito zaawe.” Petero nukwo yakozire, kandi malaika yayongera yamugira ati: “Wefubike omunagiro gwawe, onkurate.”

⁹Petero yaruga mu kasiika, yamukurata; kyonka atarukugumya malaika nkooku arukumwiha kwo omu nkomo, baitu akateekereza ngu, abonekiirwe.

¹⁰Obu baamazire kurabaho abalinzi ab'okubanza n'aba kabiri, baahika ha rwigi rw'ekyoma, orurukutaahya omu rubuga. Orwigi oru rwabeekingurra rwonka; baaturuka aheeru. Bairrayo omumaiso okuhika malaika obu yamurugireho.

¹¹Petero nubwo yagarukirwemu amagezi, yagamba ati: “Hati namanyira kimu MUKAMA nkooku atumire malaika we kunyiha omu mikono ya Herode, kandi yanjuna byona Abayudaaya ebi bakaba bategekere kunkora.”

¹²Ebi obu yamazire kubyetegereza, yayongera yahika ha nju ya Mariya nyina Yohaana, abandi ou barukweta Mariko, nambere abaikiriza baingi bakaba beesoroliize hamu kumusabira.

¹³Obu yayerangire ha rwigi rw'irembo, omwisiki arukwetwa Roda yaija kwetegereza.

¹⁴Obu yamanyiriire iraka lya Petero, habw'omuhimbo, tiyakinguraho rwigi, baitu yairuka yagaruka omunju naabagambira ngu, Petero ayemeriire ha irembo.

¹⁵Bbo baamugarukamu bati: “Ohungutukire.” Baitu omwisiki yagumiza kimu ngu, nukwo kiri. Kandi bbo bamugambira bati: “Rundi malaika we!”

¹⁶Baitu Petero yayongera kwerangira ha rwigi, kandi obu bakingwireho baamurora, baahunirra muno.

¹⁷Uwe yabaculeeza n'omukono gwe, yatandika kubasoborra MUKAMA nkooku amwihire omu nkomo. Yayongera yagamba ati: “Ebi byona mubimanyise Yakobbo n'abagenzi baitu.” Nubwo yabarugaho, yagenda handi.

¹⁸Obu bwakiire nyenkya, abaserikale bakaba omu mwetunturo mwingi habw'okutamanya Petero nambere agiire.

¹⁹Kandi Herode obu yaragiire kumuserra, baalemwa kumuzoora. Yakaguliriza muno abalinzi, nukwo hanyuma yaragira babaite. Nubwo Herode yaruga Buyudaaya, yagenda Kaisaariya, yaikarayo.

²⁰Herode akaba abiihirirwe muno abantu ba Tiiro na Sidooni; nukwo omuganda gw'abantu kwija nambere ali obu baamazire kusoonasoona Bulasito, omukuru wa bagaragara, baasaba obusinge, habwokuba abantu baabo baasakiraga muno ebyokulya omu nsi y'Omukama Herode.

²¹Ha kiro eki yakomere, Herode yajwara ebijwaro by'obukama, yasinga ha kitebe kye, yababaliza orubazo.

²²Abantu nukwo kumuswagira nibagamba bati: “Arukugamba nuwe ruhanga, takyali muntu!”

²³Omu kasumi ako malaika wa Ruhanga yamuteera kandi yagwa hansi. Yajunaanwa okutaha Ruhanga ekitiinisa; yaliibwa enzito, yafa.

²⁴Baitu ekigambo kya Ruhanga kyayeyongera kandi kyararanga muno, baingi baakiikiriza.

²⁵Baranaba na Saulo obu baamazire obutumwa bwabo, baaruga Yerusaalemu, baagaruka Antyokiya baina Yohaana, abamu ou barukweta Mariko.